1 Dän ieeschten Berecht hab ekj jemoakt, leewa Teofilus, äwa aules, waut Jesus aunfunk, beides, to doonen un uk to lieren, Luk 1:3 2 bat aun dän Dach, aus Hee oppjenomen wort, nodäm Hee de Apostel, dee Hee sikj jewält haud, derch dän Heiljen Jeist Befäl jejäft haud, Mat 28:19-20; Mat 10:1-4; Luk 6:12-16 3 to woone Hee sikj no sien Lieden met väl Tieekjens läwendich väastald, wäarent Hee derch vieetich Doag von äant jeseenen wort un räd met äant äwa Gott sien Rikj. 4 Un aus Hee met äant toop wia, befool Hee äant, nich von Jerusalem wajch to gonen, oba daut Vespräakjen vom Voda auf to wachten, daut jie, säd Hee, von Mie jehieet haben; Luk 24:49; Joh 15:26 5 wiels Johanes deept woll met Wota; jie oba sellen met däm Heiljen Jeist jedeept woaren, nich lang no dise Doag. Mat 3:11

6 Aus see nu toopjekomen wieren, fruagen see Am un säden: Har, woascht Du en dise Tiet fa Israel daut Kjennichrikj wada opprechten? Luk 19:11; 24:21 7 Hee säd to äant: Daut es nich fa junt, Tieden ooda Stunden to weeten, woone de Voda en siene ieejne Macht jesat haft. Mat 24:36 8 Oba jie woaren Krauft kjrieen, wan de Heilja Jeist ieescht opp junt jekomen es; un jie woaren miene Zeijen sennen beides, en Jerusalem un en gaunz Judäa un Samaria un bat aum Enj von de Ieed. Luk 24:48 9 Un aus Hee dit jesajcht haud, wort Hee oppjehowen, wäarent see Am sagen, un eene Wolkj neem Am wajch ver äare Uagen. Mrk 16:19; Luk 24:51 10 Un aus see stia nom Himmel kjikjten, aus Hee noppfua, kjikj, doa stunden twee Mana en witte Kjleeda bie äant, Luk 24:4 11 dee uk säden: Jie Mana von Galiläa, wuarom sto jie hia un kjikjen nom Himmel? Dis Jesus, dee von junt noppjenomen es en dän Himmel, woat jrod soo komen, aus jie Am haben seenen noppfoaren nom Himmel. Luk 21:27

12 Dan kjieeden see trigj no Jerusalem von däm Boajch, dee Oliewen-Boajch heet, dee dichtbie Jerusalem es, soo wietauf aus een Sabatwajch. 13 Un aus see nenkjeemen, jinjen see nopp en de Bowastow, wua dan bleewen, beid, Petrus un Jakobus, Johanes un Andreas, Filippus un Tomas, Bartolomäus un Matäus, Jakobus, Alfäus sien Sän, un Simon de Zelotes un Judas, Jakobus sien Sän. Luk 6:13,16 14 Dise aula bleewen eenstemmich em Jebäd un Prachren met de Frues un Maria, Jesus siene Mutta, un met siene Breeda. Joh 7:3

15 Un en dise Doag stunt Petrus medden mank de Jinja opp un säd (doa wia oba eene Häad von hundat-twintich Persoonen toop): Joh 21:15-19 16 Jie Mana un Breeda, dise Schreft must erfelt woaren, woone de Heilja Jeist derch David sien Mul verhäa jesajcht haft äwa Judas, dee een Wajchwiesa wort fa dee, dee Jesus faustneemen; Ps 41:9 17 wiels hee wia met ons jetalt un haud daut Loss von disem Deenst jekjräajen. 18 Disa haft eenen Aka aunjegonen von däm Loon von de Ojjerajchtichkjeit un es väarenäwa jefollen un enne Medd twei-jeplauzt, un aul siene Doarm sent utjeschett. Mat 27:3-10 19 Un dit es aulem bekaunt jeworden, dee en Jerusalem wonen, soo daut de Aka en äare ieejne Sproak Akeldama jenant woat, daut meent: Bloot-Aka. 20 Wiels daut steit jeschräwen en daut Buak von de Psalmen: "Siene Behusunk saul vewillat woaren, un kjeena saul doa bennen wonen", un: "Sien Aumt lot een aundra nämen". Ps 69:25; 109:8 21 Aulsoo mott nu von dise Mana, dee met ons de gaunze Tiet jegonen sent, aus de Har Jesus bie ons nenn un rutjinkj, 22 aunfangen von Johanes siene Doop bat aun dän Dach, aus Hee von ons jenomen wort, von dise mott eena Zeij met ons woaren von sien Oppstonen.

23 Un see stalden twee väa: Josef, jenant Barsabas, met däm Bienomen Justus, un Matias. 24 See bäden un säden: Du, Har, dee Du aule Hoaten kjanst, wies aun, wäm von dise twee Du jewält hast, Apj 6:6 25 daut Loss von disem Deenst un Apostelaumt to nämen, von woont Judas wajchjefollen es, om han to gonen no siene ieejne Städ. 26 Un see jeewen äare Lessa, un daut Loss foll opp Matias. Un hee wort bie de alw Apostel biejetalt. Spr 16:33