1 Oba nodäm daut Jetimmel opphieed, roopt Paulus de Jinja no sikj un omoarmd äant un jinkj wajch, om no Mazedonien to reisen. 2Kor 2:13 2 Un aus hee derch de Städen jereist wia un äant met väle Wieed ermont haud, kjeem hee no Griechenlaunt. 3 Doa bleef hee dree Moonat, un wiels am de Juden nostunden, aus hee no Sierien säajlen wull, beschloot hee, derch Mazedonien trigj to reisen. 4 Un doa reisden met am toop bat Asien Sopater von Beria, un von Tessalonich Aristarchus un Sekundus, un Gajus von Derbe un Timotäus; un von Asien Tiechikus un Trofimus. Apj 17:10 5 Dise jinjen veropp un wachten opp ons en Troas. 6 Oba wie säajelden no de Doag von onjesuade Brood von Filippi wajch un kjeemen no äant en Troas en fief Doag, wua wie dan säwen Doag bleewen.

7 Oba aum ieeschten Dach enne Wäakj, aus de Jinja toopkjeemen, Broot to bräakjen, prädijd Paulus to äant; wiels hee aum näakjsten Dach aufreisen wull, muak hee siene Räd lank, bat medden enne Nacht. Mat 28:1 8 Un doa wieren väl Laumpen en de Bowastow, wua see vesaumelt wieren. 9 Un doa saut een junga Maun, met Nomen Eutiechus, em Fensta, dee foll en eenen deepen Schlop, wiels Paulus soo lang räd; un vom Schlop benomen, foll hee von daut dredde Stock rauf un wort doot oppjehowen. 10 Paulus oba jinkj rauf un foll opp am, omoarmd am un säd: Moakt kjeen Opprua, wiels siene Seel es en am. 1Kje 17:21 11 Dan jinkj hee wada nopp un bruak daut Broot un eet un räd noch lang met äant, bat dän Dach-Aunbruch, un dan reisd hee wieda. 12 See brochten oba dän Jung läwendich un worden nich weinich jetreest.

13 Oba wie jinjen veropp no daut Schepp un säajelden no Asos, om Paulus doa opp to nämen; wiels soo haud hee daut aunjeordent, un hee wull tofoot gonen. 14 Un aus hee ons en Asos troff, neem wie am opp un kjeemen no Mitilene. 15 Un dan säajelden wie un kjeemen aum foljenden Dach jäajenäwa Chios; un dän näakjsten Dach kjeem wie no Samos un bleewen en Trogyllion; dan kjeem wie dän näakjsten Dach bat Milet. 16 Wiels Paulus haud beschloten, aun Efesus vebie to säajlen, daut hee en Asien nich tooväl Tiet vebrinjen wudd; wäajens hee spood sikj, wan et mäajlich wia, dän Pinjstdach en Jerusalem to sennen. Apj 18:21

17 Oba von Milet schekjt hee no Efesus un leet de Eltestasch von de Jemeent roopen. 18 Un aus see no am jekomen wieren, säd hee to äant: Jie weeten, woo ekj mie vom ieeschten Dach aun, aus ekj no Asien kjeem, de gaunze Tiet mank junt vehoolen hab Apj 18:19; 19:10 19 un däm Harn deend met aule Deemoot un met väl Tronen un Aunfajchtungen, dee mie derch de Juden äa Nostonen passieeden; 20 woo ekj nuscht trigj-hilt von daut, waut junt to Nutzen wia, daut ekj junt daut nich vekjindicht hab un jelieet hab, effentlich un en de Hiesa; 21 un zeijd to beid, Juden un Griechen, de Omkjia to Gott un dän Gloowen aun onsen Harn Jesus Christus. 22 Un nu kjikj, ekj go jebungen em Jeist no Jerusalem, onen to weeten, waut mie doa bejäajnen woat, Apj 19:21 23 buta daut de Heilja Jeist mie en jieda Staut bewiest un sajcht, daut Kjäden un Triebsaul no mie luaren. Apj 9:16; 21:4,11 24 Oba ekj tal daut aula nich, ekj hool mien Läwen uk selfst nich too wieetvoll, om daut ekj mien Ranen un dän Deenst vollbrinj met Freiden, dän ekj von däm Harn Jesus jekjräajen hab, om daut Evangelium von Gott siene Jnod to bewiesen. Apj 21:13 25 Un nu kjikj, ekj weet, daut jie aula mien Aunjesecht nich mea seenen woaren, mank dee ekj romjegonen sie un Gott sien Rikj jeprädicht hab. 26 Doawäajens bewies ekj junt aun disem Dach, daut ekj rein sie von eenem jiedren sien Bloot. Hes 3:17-19 27 Wiels ekj hab nuscht trigj-jehoolen, daut ekj junt nich vekjindicht hab von aul Gott sien Rot. 28 Aulsoo habt nu acht opp junt selfst un opp de gaunze Häad, wuarenn de Heilja Jeist junt aus Oppsechta jesat haft, Gott siene Jemeent to weiden, dee Hee derch sien ieejnet Bloot jekoft haft. 1Tim 4:16 29 Wiels dit weet ekj, daut no mienem Aufscheet woaren mank junt jresliche Wilw komen un de Häad nich veschoonen. Mat 7:15 30 Un ut junt selfst woaren Mana oppstonen, vedreide Dinja räden, om de Jinja opp äare Sied to schlapen. 1Joh 2:18-19 31 Doawäajen woakt un denkjt doaraun, daut ekj nich oppjehieet hab, dree Joa Dach un Nacht, eenen jiedren met Tronen to woarnen.

32 Un nu, Breeda, äwajäw ekj junt Gott un daut Wuat von siene Jnod, dee majchtich es, junt opp to buen un junt daut Oafgoot to jäwen mank aul de Jeheilichte. 33 Selwa ooda Golt ooda Kjleeda hab ekj von kjeenem velangt. 34 Oba jie weeten selfst, daut fa mien Bederfnis un fa deejanje, waut met mie wieren, haben dise Henj jedeent. Apj 18:3; 1Kor 4:12; 1Tess 2:9 35 Aules hab ekj junt jewäsen, daut eena soo oabeiden mott, de Schwake to halpen un to denkjen aun de Wieed vom Harn Jesus, daut Hee säd: Jäwen es seelja aus nämen.

36 Un nodäm hee daut jesajcht haud, kjneed hee dol un bäd met äant aula. 37 Un see hielden aula sea un follen Paulus rom sien Jenekj un kusten am, 38 truaden aum mieeschten äwa daut Wuat, daut hee säd, see wudden sien Aunjesecht nich mea seenen; un see jinjen met am nom Schepp.