1 Un aus de Pinjstdach* erfelt wia, wieren see aula eenstemmich opp eene Städ. 3Mo 23:15-21 2 Un doa passieed haustich een ruzhendet Jelud vom Himmel, soo aus een jewaultja Wint, un erfeld daut gaunze Hus, wua see sauten. 3 Un doa kjeemen Tungen verendach, vedeelt, soo aus von Fia un saden sikj opp eenen jiedren von äant. Mat 3:11 4 Un see worden aula met däm Heiljen Jeist jefelt un fungen aun, en aundre Tungen to räden, doano aus de Jeist äant jeef ut to spräakjen. Apj 4:31; 10:44-46

5 Doa wonden oba en Jerusalem Juden, gottesferchtje Mana, von ut jieda Nazion unja däm Himmel. Apj 13:26 6 Aus oba dit Jelud passieed, kjeem de Häad toop un wort derchenaunda; wiels een jiedra hieed äant en siene ieejne Sproak räden. 7 See staunden oba aula, vewundaden sikj un säden to eenaunda: Kjikj; sent nich aul dise, dee doa räden, von Galiläa? 8 Woo hia wie dan een jiedra onse ieejne Sproak, en dee wie jebuaren sent? 9 Parta un Meeda un Elamita un dee wie en Mesopotamien un en Judäa wonen un Kapadozien un Pontus un Asien, 10 Friegien un Pamfielien, Ägipten un daut Poat von Libien bie Kiereen un dee hia wonende Reema un beides, Juden un Judenjenossen*, 11 Kreeta un Araba; wie hieren dee en onse ieejne Tungen Gott siene groote Wundawoakjen räden. 12 See staunden aula un jerooden en Veläajenheit un säden eena toom aundren: Waut mucht dit sennen? 13 Aundre oba spotten un säden: See sent voll seeten Wien.

14 Oba Petrus stunt opp met de Alw, hoof siene Stemm opp un räd to äant: Judische Mana, un aula, dee jie en Jerusalem wonen, dit sell jie weeten, un horcht opp miene Wieed. 15 Wiels dise sent nich bedrunken, soo aus jie meenen; daut es je noch mau de dredde Stund aum Dach. 16 Oba dit es daut, waut derch dän Profeet Joel jesajcht worden es: Joel 2:28-32 17 "Un daut woat passieren en de latste Doag, sajcht Gott, Ekj woa von mienem Jeist utjeeten äwa aul daut Fleesch; un june Säns un june Dajchta woaren profezeien, un june junga Mana woaren Visionen seenen, un june elre Mana woaren Dreem dreemen; 18 un soogoa opp miene Kjnajchts un miene Deenstmäakjes woa Ekj en dee Doag von mienem Jeist utjeeten, un see woaren profezeien. 19 Un Ekj well Wunda doonen bowen em Himmel un Tieekjens unjen opp Ieeden: Bloot un Fia un Ruakdaump; 20 de Sonn woat en Diestanis vewaundelt woaren un de Mon en Bloot, ea däm Harn sien groota un oppfaulenda Dach kjemt. 21 Un daut saul passieren, daut een jiedra, dee dän Nomen vom Harn aunroopen woat, saul jerat woaren."

22 Jie Mana von Israel, horcht no dise Wieed: Jesus von Nazaret, een Maun von Gott, mank junt bewäsen derch majchtje Woakjen un Wunda un Tieekjens, dee Gott derch Am mank junt deed, soo aus uk jie selfst weeten; 23 disa, dee no Gott sien fausta Rot un Verhäa-Weeten hanjejäft wort, dän hab jie jenomen un derch gottloose Henj jekjriezicht un dootjemoakt. Apj 4:28 24 Dän haft Gott oppjewakjt un Am de Doodes-Weedoag aufjeleest, wiels daut onmäajlich wia, daut Hee von däm wudd faustjehoolen woaren. 25 Wiels David säd von Am: "Ekj sach dän Harn emma ver mie, wiels Hee es bie miene rajchte Haunt, om daut ekj nich bewäajcht woa. Ps 16:8-11 26 Doawäajen freid sikj mien Hoat un miene Tung wia froo; jo, uk mien Fleesch woat en Hopninj ruen, 27 wiels Du woascht miene Seel nich enne Hal loten un daut nich tooloten, daut dien Heilja daut Vewäsen seenen woat. 28 Du hast mie de Wäaj vom Läwen weeten loten; Du woascht mie erfellen met Freiden ver* dien Aunjesecht."

29 Mana un Breeda, lot et erlaupt sennen, frie to junt to räden von däm Staumvoda David: Hee es jestorwen un begroft, un sien Grauf es bie ons bat opp disen Dach. 1Kje 2:10 30 Wiels hee nu een Profeet wia un wist, daut Gott am met eenem Eit jeschwuaren haud, daut ut de Frucht von siene Hoften, nom Fleesch no, wudd Hee dän Christus oppwakjen, om opp sienem Troon to setten, 2Sa 7:12-13; Ps 89:4-5 31 haft hee, aus hee daut em verut sach, von Christus siene Opparstonunk jerät, daut siene Seel nich enne Hal jeloten wort un sien Fleesch uk nich daut Vewäsen jeseenen haft. 32 Disen Jesus haft Gott oppjewakjt; wuavon wie aula Zeijen sent. 33 Wiels Hee nu es derch Gott siene rajchte Haunt erhowen worden, haft Hee de Vespräakjunk vom Heiljen Jeist vom Voda jekjräajen un haft dit utjegoten, waut jie nu seenen un hieren. Joh 5:26 34 Wiels David es nich noppjefoaren en de Himmels, oba hee selfst sajcht: "De Har säd to mienem Harn: Sat Die to miene rajchte Haunt, Ps 110:1 35 bat Ekj diene Fiend fa diene Feet to eene Footbenkj hanlaj." 36 Nu saul daut gaunze Hus Israel secha weeten, daut Gott disen Jesus, dän jie jekjriezicht haben, toom Harn un Christus jemoakt haft. Apj 5:31

37 Aus see oba daut hieeden, jinkj äant daut derch daut Hoat, un see säden to Petrus un de aundre Apostel: Mana un Breeda, waut sell wie doonen? Luk 3:10; Apj 16:30 38 Petrus säd to äant: Doot Busse, un een jiedra von junt lot sikj deepen opp dän Nomen Jesus Christus fa de Sinden-Vejäwunk, dan woa jie de Gow vom Heiljen Jeist kjrieen. Luk 24:47; Apj 3:17-19 39 Wiels dit Vespräakjen es fa junt un june Kjinja un fa aul dee, dee wietauf sent, waut de Har, ons Gott, bieroopen woat. Joel 3:5 40 Un noch met väl aundre Wieed bewees hee äant un ermond äant un säd: Lot junt raden ut dise vekjieede Jennerazion! Mat 17:17; Flp 2:15

41 Dee nu jieren sien Wuat aunneemen, worden jedeept; un doa worden äant aun däm Dach bie dree-dusent Seelen biejedonen. 42 Un see bleewen bestendich en de Apostel Lia un en de Jemeenschoft un em Broot-Bräakjen un em Jebäd. Apj 20:7 43 Dan kjeem äwa jieda Seel eene Forcht, un väle Wunda un Tieekjens passieeden derch de Apostel. 44 Aul dee oba, dee doa jleewent wieren, wieren toop un hauden aule Dinja jemeensom. Apj 4:32-35 45 Un see vekoften äare Jieta un Hab-un-Goot un vedeelden dee unja aulem, doano aus een jiedra Noot haud. 46 Un jieda Dach wieren see emma eenstemmich em Tempel un bruaken daut Broot han un häa en de Hiesa, neemen daut Äten met Freiden un Eenfachheit von Hoaten 47 un lowden Gott un hauden een Jefaulen bie daut gaunze Volkj. De Har oba deed aule Dach doabie, dee doa jerat worden, to de Jemeent. Apj 4:4; 6:7; 11:21; 14:1