1 Rom dise Tiet läd de Kjennich Herodes siene Henj aun atelje von de Jemeent, dee to tualeiden. 2 Un hee leet Jakobus, Johanes sien Brooda, met daut Schwieet dootmoaken. Mat 20:23 3 Un aus hee sach, daut de Juden daut jefoll, muak hee wieda un neem uk Petrus faust. (Daut wieren oba de Doag von de onjesuade Brood.) 4 Aus hee am faustjenomen haud, stopt hee am en daut Jefenkjnis un äwajeef am vea Gruppen von vea Soldoten, om am to bewoaren, met de Aufsecht, am nom Passafast daut Volkj väa to stalen. 5 Soo wort Petrus em Jefenkjnis bewoat; oba von de Jemeent wort een aunhoolendet Jebäd to Gott fa am jemoakt.

6 Aus Herodes am oba wull väabrinjen, en deeselwje Nacht schleep Petrus tweschen twee Soldoten, met twee Kjäden jebungen, un Wajchta ver de Däa bewoakten daut Jefenkjnis. 7 Un kjikj, däm Harn sien Enjel stunt doa, un een Licht dacht en de Jefenkjnis-Stow; un hee schluach Petrus aun de Sied un wakjt am opp un säd: Sto schwind opp! Un de Kjäden follen am von de Henj. Apj 5:19 8 Un de Enjel säd to am: Nemm die dien Gort om un binj die de Sandalen too. Un hee deed daut. Un hee säd to am: Nemm die dien Mauntel om un folj mie no! 9 Un hee jinkj rut un foljd am un wist nich, daut et Werkjlichkjeit wia, waut derch dän Enjel passieed, oba docht, hee sach eene Vision. 10 Aus see oba derch de ieeschte un de tweede Woak jegonen wieren, kjeemen see bat de iesane Puat, dee no de Staut fieet; dee deed sikj fa äant veselfst op, un see jinjen rut un jinjen eene Gaus delenjd; un fuaz veleet de Enjel am. 11 Un aus Petrus toosikj selfst kjeem, säd hee: Nu weet ekj woarhauftich, daut de Har sienen Enjel jeschekjt haft un mie jerat haft ut Herodes siene Haunt un von aul daut, wua daut judische Volkj met räakjend. 12 Aus hee sikj besonn, kjeem hee ver daut Hus von Maria, de Mutta von däm Johanes, met däm Bienomen Markus, wua väle vesaumelt wieren un bäden. Apj 12:25; 13:5,13; 15:37

13 Aus Petrus oba aun de Däa aum Väahoff klopt, kjeem eene Deenstmejal, met Nomen Rode, om to horchen. 14 Un aus see Petrus siene Stemm erkjand, muak see de Däa nich op fa Freid, oba see rand nenn un vekjindijd, daut Petrus ver de Däa stunt. 15 See oba säden to ar: Du best onsennich! Oba see bestunt doaropp, daut et soo wia. See oba säden: Daut es sien Enjel. 16 Petrus oba klopt wieda aun; un aus see dan opmuaken, sagen see am un vewundaden sikj. 17 Hee died äant met de Haunt aun, daut see sullen stell sennen, un vetald äant, woo de Har am utem Jefenkjnis rutjebrocht haud; un hee säd: Sajcht Jakobus un de Breeda daut. Un hee jinkj rut un reisd no eene aundre Städ.

18 Aus daut ieescht Dach wort, jeef daut eene nich kjliene Oppräajunk mank de Soldoten, äwa waut et doch met Petrus jejäft haud. Apj 5:21-32 19 Herodes oba, aus dee am socht un nich funk, unjasocht hee de Wajchta un befool, dee wajch to fieren toom Doot; un hee jinkj von Judäa rauf no Cäsarea un bleef doa.

20 Herodes wia oba vebettat met dee von Tierus un Sidon. Oba dee kjeemen eenstemmich no am, un see äwaräden Blastus, dän Kjennich sien Offiziella, un prachaden om Fräd, wiels äa Launt von däm Kjennich sient ernäat wort. Hes 27:17 21 Oba aun eenem bestemden Dach trock Herodes sikj een kjennichlichet Kjleet aun un sad sikj opp dän Rechtastool un hilt eene Räd aun äant. 22 Daut Volkj oba roopt ut: Daut es een Gott siene Stemm un nich een Mensch siene! Hes 28:2 23 Un fuaz schluach am däm Harn sien Enjel, wiels hee Gott nich de Iea jeef, un hee wort von Warm vefräten un jeef dän Jeist opp. Dan 5:20

24 Oba Gott sien Wuat woss un vemieed sikj. Apj 6:7 25 Un Barnabas un Saulus kjeemen von Jerusalem trigj, nodäm see de Methelp* erfelt hauden, un neemen uk Johanes, met däm Bienomen Markus, met sikj. Apj 11:29-30