1 Un no fief Doag kjeem de Huagapriesta Ananias met de Eltestasch un eenem Rädna Tertullus; dee kjeemen ver dän Gowernia jäajen Paulus. 2 Un aus hee dan jeroopt wort, funk Tertullus am aun to vekloagen un säd: Wiels wie en grooten Fräd läwen unja die un dise Nazion väl Goodet toojekomen es derch diene Väasecht, 3 näm wie daut en aules un aulawäajen aun, aula-dieeschta Felix, met aule Dankboakjeit. 4 Oba om daut ekj die nich too lang opphool, pracha ekj die, daut du ons kort aunhieren muchst no diene Jelindichkjeit. 5 Wie haben disen Maun aus eene Ploag jefungen, aus eena, dee doa Opprua aunräajcht mank aule Juden en de gaunze Welt, aus een Aunleida von de Nazarena äare Sekt, Apj 17:6 6 dee uk vesocht dän Tempel to entheiljen, dän wie jreepen un wullen am no ons Jesaz no rechten. Apj 21:28-29 7 Oba Liesias, de bowaschta Offizia, kjeem doa mank un fieed am met groote Jewault ut onse Henj 8 un befool siene Vekjläaja, no die to komen, von wäm du daut selfst aula utforschen kaust, wuawäajen wie am vekloagen. 9 Un de Juden wieren uk doamet envestonen un säden, daut sikj dise Dinja soo vehilden.

10 Dan jeef Paulus Auntwuat opp daut Toonekjen von däm Gowernia, to räden: Wiels ekj weet, daut du en dise Nazion nu väle Joaren een Rechta jewast best, well ekj mie met Freiden veteidjen. 11 Soo aus du erkjanen kaust, daut et nich lenja aus twalw Doag sent, von donn aus ekj noppkjeem no Jerusalem, aun to bäden. Apj 21:17 12 Un see haben mie uk nich em Tempel jefungen, daut ekj mie met irjentwäm street ooda een Volkjs-Opprua jemoakt hab, nich en de Synagogen uk nich en de Staut. 13 See kjennen die daut uk nich bewiesen, wuawäajen see mie nu aunkloagen. 14 Oba daut bekjan ekj to die, daut ekj no däm Wajch, dän see eene Sekt nanen, däm Gott von miene Vodasch soo deen, daut ekj aun aules jleew, waut em Jesaz un en de Profeeten jeschräwen steit, 15 un hab de Hopninj to Gott, opp dee uk see selfst luaren, daut doa eene Opparstonunk von de Doodje kjemt, beides, de Jerajchte uk de Ojjerajchte. Dan 12:2; Joh 5:28-29 16 Un en dit eew ekj mie, auletiet een Jewessen to haben onen Aunstoos, ver Gott un de Menschen. Apj 23:1 17 Oba no väle Joaren sie ekj jekomen, Aulmoosen un Opfa no miene Nazion to brinjen. Ree 15:25-26; Gal 2:10 18 Doabennen fungen mie atelje Juden ut Asien, aus ekj em Tempel jereinicht wia, onen eene Volkjshäad un onen Jetimmel. 19 Dee hauden sult ver die komen un mie vekloagen, wan see waut jäajen mie hauden. 20 Ooda lot dise selfst sajen, waut see fa een Orrajcht aun mie jefungen haben, wäarent ekj ver däm huagen Rot stunt; 21 buta wäajens daut eene Wuat, daut ekj utroopt, aus ekj mank äant stunt: Wäajens daut Opparstonen von de Doodje woa ekj vondoag von junt jerecht. Apj 23:6

22 Un aus Felix dise Dinja hieed, dee disen Wajch jeneiwa kjand, wees hee äant no eene lotre Tiet un säd: Wan Liesias, de bowaschta Offizia, raufkjemt, well ekj june Dinja unjasieekjen. Apj 23:26 23 Un hee befool däm Hauptmaun, Paulus to bewoaren met jewesse Frieheit un sull kjeenem von de Sienje vebeeden, am to deenen ooda no am to komen. Apj 27:3

24 Un no atelje Doag kjeem Felix met siene Fru Drusilla, dee eene Judin wia, un hee leet Paulus holen; un hee horcht am äwa dän Gloowen aun Christus. 25 Aus oba Paulus von Jerajchtichkjeit un von Selfstbeharschen un von daut tookjinftje Jerecht räd, veschrock Felix un auntwuad: Go fa nu wajch; wan ekj jeläajene Tiet hab, well ekj die loten roopen. 26 Hee hopt oba uk, daut am von Paulus wudd Jelt jejäft woaren, daut hee am loosleet. Doawäajen leet hee am foakna holen un räd met am. 27 Oba aus twee Joa om wieren, kjeem Porcius Festus en Felix siene Städ. Felix oba wull de Juden eenen Jefaulen doonen un hinjaleet Paulus jefangen.