1 Oba doa wia een jewessa Maun en Cäsarea, met Nomen Kornelius, een Hauptmaun von de soojenande italienische Schoa*, 2 fromm un fercht Gott met sien gaunzet Hus, dee daut Volkj väl Aulmoosen jeef un emma to Gott bäd. 3 Dee sach kloa en eene Vision, onjefäa de näajende Stund aum Dach, eenen Enjel von Gott bie am nenkomen, dee säd to am: Kornelius! 4 Hee oba kjikjt am aun, veschrock un säd: Har, waut es? Hee oba säd to am: Diene Jebäda un diene Aulmoosen sent noppjekomen en daut Jedajchnis ver Gott. 5 Un nu, schekj Mana no Joppe un lot Simon, met däm Bienomen Petrus, häaholen. 6 Disa blift bie eenem jewessen Simon, een Ladajoawa, wäms Hus aum Mäa licht; dee woat die sajen, waut du doonen saust. Apj 9:43 7 Un aus de Enjel, waut met Kornelius räd, wajchjegonen wia, roopt hee twee von siene Hus-Kjnajchts un eenen frommen Soldot von dee, dee emma rom am wieren 8 un vetald äant aules un schekjt äant no Joppe. Apj 11:5-17

9 Dän näakjsten Dach oba, aus see reisden un sikj de Staut nodaden, stieech Petrus bie de saste Stund opp daut Dak nopp, om to bäden. 10 Hee wort oba sea hungrich un wull äten; wäarent see am waut reedmuaken, kjeem eene Entzikjunk* äwa am. 11 Un hee sach dän Himmel opjemoakt un een jewesset Jefäss, soo aus een grootet Loaken, aun vea Akjen jebungen, wort raufjeloten ver am bat opp de Ieed. 12 Doabennen wieren aulahaunt vea-feetje Tieren von de Ieed un wille Tieren un Krupende un Väajel vom Himmel. 13 Un dan kjeem eene Stemm no am: Sto opp, Petrus, schlacht un at! 14 Petrus oba säd: Oo nä, Har; wiels ekj hab noch niemols waut Jemeenet ooda Onreinet jejäten. 3Mo 11:1-47; Hes 4:14 15 Un de Stemm säd toom tweedemol to am: Waut Gott jereinicht haft, daut moak du nich jemeen. Ree 14:14 16 Un dit passieed dreemol; un daut Jefäss wort wada oppjenomen en dän Himmel.

17 Aus oba Petrus en sikj selfst vewundat wia, äwa waut de Vision doch wia, dee hee jeseenen haud, kjikj, doa stunden dee von Kornelius jeschekjte Mana, dee no Simon sien Hus jefroacht hauden, ver de Puat 18 un roopten un forschten, auf Simon, met däm Bienomen Petrus, hia bleef. 19 Wäarent oba Petrus äwa de Vision nodocht, säd de Jeist to am: Kjikj, dree Mana sieekjen die. 20 Oba sto opp, stie rauf un go onen Twiewel met äant, wiels Ekj hab äant jeschekjt. 21 Dan stieech Petrus rauf no de Mana, dee von Kornelius no am jeschekjt wieren, un säd: Kjikj, ekj sie dee, dän jie sieekjen; waut es de Uasoak, wuarom jie komen? 22 See oba säden: Kornelius, de Hauptmaun, een jerajchta Maun un eena, dee Gott fercht, dee een goodet Zeichnis haft bie daut gaunze Judenvolkj, haft von eenem heiljen Enjel eenen jettlichen Befäl jekjräajen, daut hee die en sien Hus nenholen sull, om Wieed von die to hieren. 23 Dan roopt hee äant nenn un neem äant opp. Un aum foljenden Dach wankt Petrus met äant met, un atelje Breeda von Joppe jinjen met am. 24 Un aum foljenden Dach kjeemen see no Cäsarea. Kornelius oba wacht no äant un haud sien Frintschoft un noste Frind toopjekroacht.

25 Un aus Petrus nenkjeem, jinkj am Kornelius entjäajen, foll am vere Feet un bäd am aun. 26 Petrus oba recht am opp un säd: Sto opp! Ekj selfst sie uk een Mensch. Apj 14:15; Opb 19:10 27 Un aus hee met am jerät haud, jinkj hee nenn un funk, daut väle toopjekomen wieren. 28 Un hee säd to äant: Jie weeten, daut et eenem judischen Maun nich erlaupt es, met eenem Framden* sikj toop to doonen ooda sikj am to nodren; oba Gott haft mie jewäsen, kjeen Mensch jemeen ooda onrein to heeten. 29 Doawäajen sie ekj uk onen Jäajen-Räd jekomen, aus mie jeholt wort. Un nu froag ekj: Ut waut fa Grunt hab jie mie komen loten?

30 Un Kornelius säd: Vea Doag trigj faust ekj bat aun dise Stund, un om de näajende Stund bäd ekj en mien Hus; un kjikj, doa kjeem een Maun ver mie en een jlenzendet Kjleet 31 un säd: Kornelius, dien Jebäd es jehieet worden, un aun diene Aulmoosen es jedocht worden ver Gott. 32 Doawäajen schekj nu no Joppe un lot Simon, met däm Bienomen Petrus, holen. Dee blift em Hus von Simon, een Ladajoawa, aum Mäa; dee woat to die räden, wan hee kjemt. 33 Dan schekjt ekj fuaz no die, un du hast goot jedonen, daut du jekomen best. Nu sent wie aula hia tojäajen ver Gott, om aules to hieren, waut die von Gott befolen es.

34 Dan muak Petrus sien Mul op un säd: Nu bejriep ekj en Woarheit, daut Gott de Persoon nich aunsitt; 5Mo 10:17; 1Sa 16:7; Ree 2:11 35 oba en jieda Nazion, wäa Am fercht un rajcht deit, dee es Am aunjenäm. Joh 10:16 36 Daut Wuat, woont Hee de Kjinja Israel jeschekjt haft, endäm Hee Fräd vekjindjen leet derch Jesus Christus (Hee es Har äwa aules), Efs 2:17 37 daut kjan jie, daut Zeichnis waut derch gaunz Judäa jegonen es un aunfunk en Galiläa no de Doop, dee Johanes prädijd, Mat 4:12-17 38 woo Gott dän Jesus von Nazaret met däm Heiljen Jeist un Krauft jesaulft haft, dee romjinkj Goodet doonen un aule heeld, dee vom Diewel unjadrekjt wieren, wiels Gott wia met Am. Mat 3:16 39 Un wie sent Zeijen von aul daut, waut Hee beides, en daut judische Launt un en Jerusalem jedonen haft. Dän haben see dootjemoakt un aun een Holt jehongen. 40 Disen haft Gott aum dredden Dach opperwakjt un haft Am loten openboa woaren, 1Kor 15:4-7 41 nich to daut gaunze Volkj, oba ons, de verhäa jewälde Zeijen von Gott, dee wie met Am toop jejäten un jedrunken haben, nodäm Hee von de Doodje oppjestonen wia. Luk 24:30,43 42 Un Hee haft ons jeboden, toom Volkj to prädjen un to zeijen, daut Hee een Rechta es, von Gott bestemt, äwa de Läwendje un de Doodje. Joh 5:22 43 Von disem jäwen aul de Profeeten Zeichnis, daut een jiedra, dee aun Am jleeft, derch sienen Nomen Sinden-Vejäwunk kjrieen saul. Jes 53:5-6; Jer 31:34

44 Wäarent Petrus noch dise Wieed räd, foll de Heilja Jeist opp aul dee, dee daut Wuat hieeden. 45 Un de Jleewende ut de Beschniedunk, sooväl aus met Petrus toop jekomen wieren, vewundaden sikj, daut uk äwa de Heiden de Gow vom Heiljen Jeist utjegoten wort; 46 wiels see hieeden, daut see met Tungen räden un Gott lowden. Dan auntwuad Petrus: Apj 2:4 47 Kaun irjentwäa daut Wota vebeeden, daut dise nich jedeept woaren, dee dän Heiljen Jeist jekjräajen haben, krakjt soo aus wie? 48 Un hee befool, daut see em Nomen vom Harn jedeept worden. Dan prachaden see am, atelje Doag to bliewen.