1 Wiels wie nu jerajchtfoadicht worden sent derch dän Gloowen, hab wie Fräd met Gott derch onsen Harn Jesus Christus, Jes 53:5; Ree 3:24,28 2 derch woonen wie uk em Gloowen Toogank haben to dise Jnod, en dee wie stonen, un riemen ons äwa de Hopninj von Gott siene Harlichkjeit. Joh 14:6; Efs 3:12 3 Un nich bloos daut, oba wie riemen ons uk en de Triebsaul, wiels wie weeten, daut de Triebsaul Jedult wirkjt Jak 1:2-3 4 un de Jedult Erfoarunk un de Erfoarunk Hopninj; Jak 1:12 5 de Hopninj oba lat nich toschaund woaren; wiels Gott siene Leew es utjegoten en onse Hoaten derch dän Heiljen Jeist, dee ons jejäft worden es. Ps 25:3,20; Heb 6:18-19

6 Wiels Christus es, aus wie noch krauftloos wieren, en siene Tiet fa de Gottloose jestorwen. 7 Doa stoaft schwoa wäa fa eenen Jerajchten; oba fa eenen Gooden mucht veleicht wäa stoawen. 8 Oba Gott bewiest siene Leew aun ons doarenn, daut Christus, aus wie noch Sinda wieren, fa ons jestorwen es. Joh 3:16; 1Joh 4:10 9 Väl mea nu, wiels wie derch sien Bloot sent jerajchtfoadicht worden, woa wie derch Am von däm Oaja jerat woaren. Ree 1:18; 2:5,8 10 Wiels wan wie, aus wie noch Fiend wieren, met Gott veseent worden sent derch dän Doot von sien Sän, väl mea woa wie, dee wie veseent sent, derch sien Läwen jerat woaren. Ree 8:7; 2Kor 5:18; Kol 1:21 11 Nich bloos daut, oba wie riemen ons uk en Gott derch onsen Harn Jesus Christus, derch woonen wie nu de Veseenunk jekjräajen haben.

12 Doawäajens, soo aus derch eenen Mensch de Sind en de Welt jekomen es un derch de Sind de Doot, soo es de Doot derchjekomen opp aule Menschen, wiels see aula jesindicht haben; 1Mo 2:17; 3:19; Ree 6:23 13 (wiels de Sind wia enne Welt bat daut Jesaz, oba de Sind woat doa nich toojeräakjent, wua kjeen Jesaz es. Ree 4:15 14 Dannoch harscht de Doot von Adam bat Moses uk äwa dee, dee nich met deeselwje Äwaträdunk jesindicht haben aus Adam, dee een Bilt von däm Tookjinftjen es. 15 Oba daut vehelt sikj met de Äwaträdunk nich soo aus met de Jnodengow. Wiels wan derch eenem siene Äwaträdunk väle jestorwen sent, soo es väl mea Gott siene Jnod un daut Jnoden-Jeschenkj, von eenem Mensch, Jesus Christus, väle rikjlich to-deel jeworden. 16 Un de Gow es nich soo aus derch dän eenen, dee jesindicht haft. Wiels daut Uadeel wort von däm Eenem to de Vedaumnis; oba de Jnodengow woat von väle Äwaträdungen to de Jerajchtichkjeit. 17 Wiels wan derch däm eenen siene Äwaträdunk de Doot derch dän eenen jeharscht haft, väl mea woaren dee, dee dän Äwafluss von Jnod un de Gow von de Jerajchtichkjeit kjrieen, em Läwen harschen derch dän eenen, Jesus Christus).

18 Aulsoo, soo aus derch eenem siene Äwaträdunk de Vedaumnis opp aule Menschen kjeem, soo uk derch eenem siene Jerajchtichkjeit de Rajchtfoadjunk toom Läwen to aule Menschen. 1Kor 15:21-22 19 Wiels jrodsoo, aus derch een Mensch sien Onjehuarsom väle Sinda jemoakt worden sent, soo woaren uk derch däm eenen sien Jehuarsom väle Jerajchte jemoakt woaren. Jes 53:11; Ree 3:26 20 Oba daut Jesaz kjeem nenn, om daut de Äwaträdunk tooneem. Wua oba de Sind tooneem, doa neem de Jnod väl mea too, Ree 7:8,13; Gal 3:19 21 om daut, jrodsoo aus de Sind jeharscht haft toom Doot, soo uk de Jnod harscht derch Jerajchtichkjeit toom eewje Läwen derch Jesus Christus, onsen Harn. Ree 6:23