1 Dän Schwaken em Gloowen nämt opp, oba nich, om äwa Meenungen to strieden. Ree 15:1; 1Kor 8:9 2 Wiels eena jleeft, daut hee aules äten kaun; oba de Schwaka at Jemies. 1Mo 1:29; 9:3 3 Wäa at, ve-acht dän nich, dee nich at; un wäa nich at, recht dän nich, dee doa at; wiels Gott haft am aunjenomen. Kol 2:16 4 Wäa best du, daut du eenem aundren sien Kjnajcht rechtst. Ver sienem ieejnen Harn steit ooda felt hee. Hee kaun oba oppjerecht woaren; wiels Gott kaun am stonen moaken. Mat 7:1; Jak 4:11-12

5 Eena helt eenen Dach hecha aus dän aundren; de aundra helt jieda Dach jlikj. Een jiedra sie sikj en sienem ieejnen Senn voll äwazeicht! Gal 4:10 6 Wäa opp dän Dach acht, acht dän fa dän Harn; un wäa nich opp dän Dach acht, acht dän nich, fa dän Harn. Dee, waut at, at fa dän Harn, wiels hee dankt Gott; un dee, waut nich at, at nich fa dän Harn un dankt Gott. 7 Wiels kjeena von ons läft fa sikj selfst, un kjeena stoaft fa sikj selfst. 8 Wiels läw wie, dan läw wie fa dän Harn; stoaw wie, dan stoaw wie fa dän Harn. Doawäajens, wan wie läwen ooda stoawen, sent wie däm Harn siene. 2Kor 5:15; Gal 2:20 9 Wiels hiatoo es Christus jestorwen un oppjestonen un wada läwendich jeworden, daut Hee mucht äwa Doodje un uk äwa Läwendje Har sennen.

10 Oba du, wuarom rechtst du dienen Brooda? Ooda uk du, waut ve-achtst du dienen Brooda? Wiels wie woaren aula ver Christus sien Rechtastool stonen. Mat 25:31-32; Apj 17:31; 2Kor 5:10 11 Wiels daut steit jeschräwen: "Soo woa aus Ekj läw, sajcht de Har; ver Mie saul sikj jieda Kjnee bieejen, un jieda Tung woat Gott bekjanen." Jes 45:23; Flp 2:10-11 12 Soo woat dan een jiedra von ons fa sikj selfst aun Gott Räakjenschoft jäwen. Gal 6:5

13 Doawäajens well wie nich mea ons eenaunda rechten; oba dit recht leewa, daut kjeena sienem Brooda eenen Aunstoos ooda Oajanis jeft. 1Kor 10:33 14 Ekj weet un sie en däm Harn Jesus äwazeicht, daut nuscht aun sikj selfst onrein es, buta fa dän, dee daut fa onrein acht, fa dän es et onrein. Mat 15:11; Apj 10:15; Tit 1:15 15 Wan oba dien Brooda wäajens dien Äten truarich woat, dan waundelst du aul nich no de Leew no. Vedoaw dän nich met dien Äten, fa wäm Christus jestorwen es. 1Kor 8:11-13 16 Lot nich, daut jun Goot jelastat woat. 17 Wiels Gott sien Rikj es nich Äten un Drinkjen, oba Jerajchtichkjeit un Fräd un Freid en däm Heiljen Jeist. 1Kor 8:8; Heb 13:9 18 Wäa en dise Dinja Christus deent, dee es Gott wooljefellich un aunjenäm ver de Menschen.

19 Lot ons aulsoo daut nojoagen, waut toom Fräd deent un waut toom eenaunda Oppbuen deent. Ree 12:19; 15:2 20 Bräakj nich wäajens Äten Gott sien Woakj dol. De Dinja sent woll aula rein, oba daut es däm Mensch schlajcht, dee daut met eenem Aunstoos at. 21 Daut es goot, kjeen Fleesch to äten, uk kjeenen Wien to drinkjen, uk nuscht, wuamet dien Brooda sikj stat ooda beleidicht ooda schwak woat. Ree 14:2; 1Kor 10:25-27 22 Hast du Gloowen, dan hab dän bie die selfst ver Gott. Seelich es, wäa sikj selfst nich recht en daut, waut hee goot-heet. 23 Wäa oba twiewelt, wan hee at, es vedaumt, wiels hee at nich utem Gloowen. Un aules, waut nich utem Gloowen es, es Sind.