28 Yesu akamanya kabindiiza ndima yakwe ya uohozi, naho akagombeka ili Maandiko ya Muungu yadahe kuigania, "Naona khiu."

29 Aho nee hana wiga wekumemao divai yekusasayo, akadoa dodoki akadiginta mwe divai yekusasayo, wakaigea uwanga ya lasi, wakamwiikiya mwe muomo. 30 Yesu ekusonaho iyo divai yekusasayo akamba, "Yaigania!"

Naho akenamiza mtwi wakwe, akauya na nyuma.

23 Maasikai wekubindaho kumgong’ondea Yesu he mhamba, wakadoa magwanda yakwe wakayapanga mafungu mane, fungu dimwe kwa kia asikai, wakadoa viyaviya na gwanda dakwe, gwanda ido diwa difumwa na kuwa kintu kimwe kulawa uwanga adi asi. 24 Awo masikai wakamamakhanya, "Tisekuitatua iya tiitwee kula yendaiwe ya ndai." Mbui iyo igosoka ili Maandiko ya Muungu yaiganie, yagombekayo,

"Wapangana magwanda yangu

Na gwanda dangu wakaditwee kula."

Ivyo nee wekugosoavyo wada maasikai.

25 Hehi ya mti wa mhamba wa Yesu nee wagooka mami yakwe da Yesu, na mami yakwe mdodo da Yesu na Maliamu mkaza Kileopa na Maliamu wa mzi wa Magidala. 26 Yesu ekumuonaho mami yakwe, na hehi naye kagooka yuda mhina ekumkundisae, akamwamba mami yakwe, "Mmaa uyo nee mwanao."

27 Akabinda akamwamba yuda mhina, "Kauwa uyo nee mami yako." Na kuvokeya mda uda mhina akahauka nae kaya kwakwe.

33 Wekubuwaho hantu hetwangwao, "Fufu da Mtwi," naho wakamgong’ondea Yesu he mhamba. Wada mabagaa waidi wakagong’endewa kia yumwe he mhamba wakwe, yumwe phande ya kuume na mtuhu phande ya kumoso. 34 Yesu akamba, "Tate, waekee kwa viya khawamanya wagosoado."

Naho wakapangana magwanda yakwe kwa kuyatoeya kula. 35 Wantu ne wawa wagooka hada wakakauwa. Nawo waongoezi wa Kiyahudi wakambeya na kumsizigia wakagombeka, "Kawaohowa watuhu, isasa na eohoe mwenye, inga yee ne Klistu, mwekusagulwa ni Muungu!"

36 Asikai nao nee wambea, wakamtimia wakamwekha divai yekusasayo 37 naho wakamba, "Inga kwei wee nee Seuta wa Wayahudi eohoe mwenye."

38 Nee waika kibao chekundikwacho, "Uyu nee Seuta wa Wayahudi."

39 Yumwe wa wada mabagaa wekugong’ondwae he mhamba, akamdumuwa akamba, "Ati wee nee Klistu? Eohoe mwenye, utuohoe na swiswi."

40 Akini yuda bagaa mtuhu akamwakia mweziwe akagombeka, "Wee khumuogoha Muungu? Wee kwekhigwa sugusa iyoiyo? 41 Wee na miye niamuiwa kwa haki, kwaviya haya ni maiho ya yada tekugosoayo. Akini mntu uyu khekugosoa dodose da ufyaimu." 42 Naho akagombeka, "Ee Yesu! Unikumbuke kisingi wendaho wengie mwe Useuta wako."

43 Yesu akamtambaisa, "Nakwamba kwa kwei, ivyeoo wendauwe hamwe hantu ha Muungu."

33 Kuvokea saa mtandatu wa musi adi saa kenda kiza kikuu kikagwa mwe si yose. 34 Saa kenda guoni Yesu akaiya kwa mgutio mkuu, akamba, "Eloi, Eloi, lama, Sabakitani?" Mana yakwe, "Muungu yangu, Muungu yangu mbona kunibada?"

51 Ahoaho pazia da Nyumba ya Muungu dikatatuka ntii mbii, kulawa uwanga hadi asi, na inusi ikazingiza na maiwe makuu yakabondekabondeka, 52 mambiya yakavuguka na wantu wa Muungu wakayuyuswa. 53 Bada ya kuyuyuka kwakwe Yesu, wakalawa mwe mambiya na wakengia mzi wa Muungu na wantu wangi wakawaona.

54 Yuda mkuu wa maasikai hamwe na weziwe wekuwao wakamuinda Yesu wekuonaho zingizo da inusi na zia mbui zekulawiiazo wakaogoha muno na wakagombeka kwei, "Mntu uyu neekawa Mwana wa Muungu."

13 Sia khuu muno ya kuonyesha wawakundisa wambuya zako, ni kuuya na nyuma ili wowo wekae.

16 Kwaviya Muungu kaikundisa inusi ata akamlavya mwanawe wa ikedu, ili kia mntu endae amzumiiye asekwaga, iya awe na ugima wa misi yose kwesiho kisiikizi.

10 Kwaviya, tekuwaho wamasa wakwe Muungu katitenda kuwa wambuya kwembokea ufe wa Mwanawe na inga titendwa wambuya wakwe, ivyo tamanya tendatioholwe. Klistu endaatiohoe kwaajii yee ni mwenye ugima misi yose.

16 Swie timanya ukundiso ni mbwai, kwaviya Klistu nee kalavya ugima wakwe kwaajii yetu. Viyaviya swie takundigwa tilavye ugima wetu kwaajii ya wantu watuhu.

2 Yee Klistu nee ntambiko ya kuusia mavigaviga yetu, naho khio kwa mavigaviga yetu du, iya viyaviya kwa mavigaviga ya wantu wose wa mwe inusi.

8 Nee kazumiia na kutegeeza adi kuuya na nyuma

adi kuuya na nyuma he mhamba.

9 Kwaviya tamanya kuwa Klistu nee kayuyuswa. Naho tamanya kuwa khadaha kuuya na nyuma vituhu na ufe khauna udaho kwakwe. 10 Kuuya kwakwe na nyuma ni kwaajii ya mavigaviga kauya na nyuma kamwe du na ekakaa hamwe na Muungu.

3 Kwaviya, mwamanya kuwa swie tekubatizwao tikaungana na Klistu Yesu, nee tibatiizwa na kuungana na ufe wakwe. 4 Tekubatizwaho nee tiungana na ufe wakwe, tikagewa mwe mbia hamwe naye, ili inga via Klistu ekuyuyuswavyo kwa ntendwa ya ukuu wa Tate, viavia swie tidahe kwekaisa ugima mhya.

27 Inga viya wantu wekuikiwavyo kuuya na nyuma kamwe du, na wekubindaho kuuya na nyuma ni uamuiiyo. 28 Viyaviya Klistu kaavigwa maa mwenga du na kuwa ntambiko ili ayadoe mavigaviga ya wantu watuhu nae endaeze maa ya kaidi na khio kwakudoa mavigaviga iya kuwaetea uohozi wada wamkauwiiyao kwa hovu muno.

22 Petulo akaendeea kugombeka, "Nywie wantu wa Isilaeli, tegeezani mbui izi vitana! Muungu nee kawaonyesha nywie kuwa agosoa ndima kwembokea Yesu wa mzi wa Nazaleti, nywie wenye mwamanya kuwa kwembokea Yesu uyo nee awaonyesha vihii na viozo na utangio nyingi kwenu. 23 Kutongeana na uteganyi wakwe mwenye, Muungu nekawa kaamua kuwa Yesu ekhiizwe kwenu, nanywi mkamkoma kwa kuwabadia mabagaa wamgong’ondee he mhamba. 24 Akini Muungu akamyuyusa Yesu kulawa kwa wekufao, akamuusia masuumizi ya ufe kwaviya khayekudahika yee kutozoezwa na udaho wa ufe.

11 "Miye ni muisi yedi. Muisi yedi ni yuda azumiiyae kuulavya ugima wakwe kwaajii ya ngoto zakwe.

26 Kwaviya kia mdaho bumunda na kudomea kikombe icho, mwabiikia ufe wa Zumbe, adi aho endahoeze.