2 Â mə wû gala nə ə̂në ə sə kpî mbrə Ndjapä kɔ, tafa Jeruzalamə nə, ə̂në ə tô mâ lafɔ, mâ ngotə̂ Ndjapä nə â ə sə̂ kə jerə nə kɔ, ə gâmba tə̂ ye gâ ye mata yashe ə̂në koshe tô ətshə â tshə mbrə̂ gao ndə kə ka mbrə äkɔ̈ nə kɔ. 3 Mə djî ə̈bə̈ âgbɔ̂ tshema ə̂në ə tô djoko tə̂ mbata ngerə nə ə pâ əpʉ ə pa: «Ə̂sə̂ kə sə Ndjapä sə lə takpa tə̂ azü gâ ye! Ə̂sə̂ kə sə ətshə sə kə sə lə takpa tə̂ əndje â əndje sə kə sə tə azü nə̂ ye. Ətshə də ə̂tə̂ ye sə kə sə lə takpa tə̂ əndje, â tshə sə kə sə tə Ndjapä nə̂ əndje. 4 Tshə sə kə tru ngɔla nɔ̂ lə ala əndje. Kuzu ə sə sə je kwatə̂ye ne, â əpʉ mbadja wala əkɨ wala kə wu əyo ə sə sə je kwatəndje ne, mbrə ə̂në aangbʉlî aərə rô gâ ye.»

10 Tshə zâ əmə ə rô də əmə tə̂ äwä Yîrə̂ gâ pâ ə̈bə̈ əgerə ə̈ngrʉ̈ kaga, ə yîsə̂ gala nə ə̂në ə sə kpî kɔ, Jeruzalamə nə, ə̂në ə tô mâ lafɔ, mâ ngotə̂ Ndjapä, ə sə kə jêrə kɔ kə əmə. 11 Ə̂yî Ndjapä tshe ə tshe lə nə. Kə tshe nə kô kə tshe ə̈bə̈ əkpʉ âgbɔ̂ ndogɔ, ə kô kə tshe ə̈bə̈ əkpʉ ə̂në əndje ê ə pa jasəpə kɔ, ə̂në ə sə yîrə̂ yîrə̂ mata ərə ə̂në əndje ê ə pa krisətalə kɔ. 12 Ə̈bə̈ əgerə ə̈ngrʉ̈ dati sə̂ dji nə nɔ̂. Amanda nə sə̂ morofo amanə bishi â atrawaya nə̂ Ndjapä morofo amanə bishi kâ gâ pâ amanda nə. Â əndje tâ aəɨrɨ gâ tə̂ amanda nə, aəɨrɨ amarä morofo amanə bishi nə̂ azü əgɔ Isərayalə. 13 Djoko tshepalɔ, amanda sə̂ vəta, vəta djoko tshepagəle, vəta djoko tshepakɔnɔ â vəta djoko lɔtebanga. 14 Dati nə ə̂në ə sə̂ dji tshelə gala nə kɔ, ə kâ gâ pâ əgbro aəkpʉ morofo amanə bishi â aəɨrɨ azü-awla nə̂ Aya Ndalimi nə morofo amanə bishi nə sə̂ pâ aəkpʉ nə.

22 Bale, mə wû Anda Ndjapä wû lə gala nə ne, mbrə ə̂në Əyïlingû tə Ndjapä nə, Âgbɔ̂ Əyïworɔgbɔ nə, gâ ndə Aya Ndalimi nə sə tə Anda Ndjapä tshelə gala nə. 23 Tshelə gala nə yu yu tshuku alɔ wala yipʉ ndə kə pa ə tshe lə nə ne, mbrə ə̂në ə̂yî Ndjapä nə sə kə tshe lə nə, â lamba tshelə nə kə də̂ Aya Ndalimi nə.

1 Mandânə, trawaya nə̂ Ndjapä nə yîsə̂ âgbɔ̂ kola ə̂ngû ə̂në ə za sorô kɔ kə əmə, ə̂në ə sə ngewle ngewle kɔ, ə̂në ə tô lə mbata ngerə nə̂ Ndjapä nə də Aya Ndalimi nə kɔ. 2 Ə̂ngû nə gû ə̂grû âgbɔ̂ äwä tshelə gala nə. Â tə̂ aama ə̂ngû nə, ə̈bə̈ ayɔ ə̂në ə sə kə za sorô kɔ ə̂në ə sə kə le äwä morofo amanə bishi kɔ sə̂ je â ə le lə yipʉ bale bale. Akako nə sə ndə kə grɔ rəka tə̂ azü aəgɔ nɔ̂. 3 Kə dra ətshe sə sə je kwatə̂ye ne.

Mbata ngerə nə̂ Ndjapä də Aya Ndalimi nə sə kə sə lə gala nə, â alayïkosəra nə̂ Ndjapä nə ə vrɔ ətshə je. 4 Əndje sə kə wu tshitshi ye â əɨrɨ ye sə kə sə tə̂ matshi əndje. 5 Tsheləbu ə sə sə kwatə̂ye je ne â əzü sə sə kə ma əgo ə̂yî lamba wala ə̂yî alɔ ne, mbrə ə̂në Əyïlingû tə Ndjapä kə tshe tə̂ əndje. Â əndje mbrə ngerə də ə̂ngû də ə̂ngû piii je.

16 Bale, əndje ma əgo ə̈bə̈ əgɔ ə̂në ə rô ənə̂ səkɔ gâ ye, ə̂në ə sə mâ lafɔ kɔ. Âdârə ə̂në gana ngɔ Ndjapä ngɔ ndə kə pa əndje e ətshə tə Ndjapä nə̂ əndje ne. Mbrə ə̂në tshə gâmba ə̈bə̈ gala mbrə əndje gâ ye.

22 Bale, e nâ trö gâ tə̂ kaga Siɔ də tshelə gala nə̂ Ndjapä ə̂në tshə sə tə sorô kɔ, ə̂në ə tə nə kə də̂ gala Jeruzalamə tshelafɔ, də ə̂kpû atrawaya nə̂ Ndjapä sake sake sake ə̂në əndje ngbô tə̂ əndje gâ tə̂ nə lə ə̂rû kɔ. 23 E nâ trö gâ tə̂ aangbɔ nə̂ ayiya aneshe* nə̂ Ndjapä, ə̂në əndje tâ aəɨrɨ əndje mâ lafɔ gâ ye kɔ. E nâ trö də Ndjapä nə, tə awowa ngbanga azü nɔ̂ kɔ gâ ye, ndje gâ tə̂ ayirə̂ azü ə̂në əndje sə tə aə̂rɔ̂ azü lə ala Ndjapä nə kɔ, ə̂në əndje tɔ̂ gâ tə̂ ərə ə̂në ə lï nɔ̂ kɔ gâ ye. 24 E nâ trö gâ tə̂ Jezu, tə əyïkɔkɔ̂ nə̂ ə̈bə̈ tafa mbʉkʉ ə̂në Ndjapä nə mbrə̂ də əzə̂ gâ ye kɔ, ndje gâ tə̂ ə̈ndjï ye ə̂në ə tû gâ ye kɔ, ə̂në ə sə kə pa əpʉ tə âgbɔ̂ ə rô ənə̂ Abalə kɔ.

26 Bale, gala Jeruzalamə tshe lafɔ sə ndə tshelə ye, â ə tə nə kə sə tə əyï əzə̂ nə kɔ.

1 Jezu pâ kə atrawaya nə̂ ye ə pa: «E lï lï tshelə e ne, e zä lɔsu e kə Ndjapä ə zä lɔsu e ndje kə əmə. 2 Aətshe kə sə tə̂ nə sə ngbatshe mâ lə anda nə̂ Abä əmə. Də̂ ne, mə pa kə e ə pa: "Mə sə kə na ndə kə gamba ə̈bə̈ ətshe mbrə e a?" 3 Rəkɔ, kədə mə na â gamba ətshe nə kə e gâ ye, mə sə kə do tə̂ əmə ə gu ə ko e gâ ngotə̂ əmə, kanika ətshe ə̂në, əmə, mə sə tə̂ nə, e-e ndje, e sə kə sə tə̂ nə.

11 Mə sə kə na katshä katshä səye. Tëgbɔ ərə ə̂në bə sə də nə kɔ nge nge nge, kanika ə̈bə̈ əzü bale za za âkrâ nə̂ zə tə̂ zə ne. 12 Əzü ə̂në tshə sɔ lagbanga, mə sə kə mbrə ətshə tə ə̈bə̈ yêrɔ̂ kowɔ anda lə Anda Ndjapä nə̂ əmə â tshə sə sə kə wutu lə nə alɔ bale ne. Mə sə kə ta əɨrɨ Ndjapä nə̂ əmə də əɨrɨ gala nə̂ Ndjapä nə̂ əmə, tafa Jeruzalamə nə, gâ pâ ye, gala nə ə̂në ə to mâ lafɔ, mâ ndə Ndjapä nə̂ əmə nə â ə jerə kɔ. Mə sə kə ta ndje tafa əɨrɨ əmə gâ pâ ye.

19 Â kədə ə̈bə̈ əzü kə gi alabə̈ aəpʉ tshelə fraka ndəma Ndjapä səke gashe, Ndjapä ə gi ətshə gashe je tə̂ ə̂sə̂ ənə̂ ye leyɔ ə̂në ə za sorô kɔ də tshelə gala nə ə̂në ə sə kpî mbrə Ndjapä nə kɔ, ə̂në əndje pâ ndə nə lə fraka səke kɔ.