1 Mandânə, trawaya nə̂ Ndjapä nə yîsə̂ âgbɔ̂ kola ə̂ngû ə̂në ə za sorô kɔ kə əmə, ə̂në ə sə ngewle ngewle kɔ, ə̂në ə tô lə mbata ngerə nə̂ Ndjapä nə də Aya Ndalimi nə kɔ. 2 Ə̂ngû nə gû ə̂grû âgbɔ̂ äwä tshelə gala nə. Â tə̂ aama ə̂ngû nə, ə̈bə̈ ayɔ ə̂në ə sə kə za sorô kɔ ə̂në ə sə kə le äwä morofo amanə bishi kɔ sə̂ je â ə le lə yipʉ bale bale. Akako nə sə ndə kə grɔ rəka tə̂ azü aəgɔ nɔ̂. 3 Kə dra ətshe sə sə je kwatə̂ye ne.

Mbata ngerə nə̂ Ndjapä də Aya Ndalimi nə sə kə sə lə gala nə, â alayïkosəra nə̂ Ndjapä nə ə vrɔ ətshə je. 4 Əndje sə kə wu tshitshi ye â əɨrɨ ye sə kə sə tə̂ matshi əndje. 5 Tsheləbu ə sə sə kwatə̂ye je ne â əzü sə sə kə ma əgo ə̂yî lamba wala ə̂yî alɔ ne, mbrə ə̂në Əyïlingû tə Ndjapä kə tshe tə̂ əndje. Â əndje mbrə ngerə də ə̂ngû də ə̂ngû piii je.

6 Mandânə, trawaya nə̂ Ndjapä nə pâ kə əmə ə pa: «Aəpʉ səye sə tə adjatra aəpʉ, ə̂në əzü lï ndə kə za lɔsu ye gâ pâ nə. Əyïlingû, tə Ndjapä ə̂në tshə sə kə za əpʉ gâ lə ama aawopandəma ye kɔ, tshə wlâ trawaya nə̂ ye ndə kə pa tshə yisə̂ ərə ə̂në ə lï ndə kə wutu katshä katshä səye kɔ kə alayïkosəra nə̂ ye.»

7 Jezu pâ əpʉ ə pa: «Wü-a, mə sə kə na nə katshä katshä səye. Ənə̂ ye tə ə̂rɔ̂nə, əzü ə̂në tshə mbrə ndəma aəpʉ ama Ndjapä ə̂në ə sə lə fraka səye kɔ!»

8 Əmə Zââ kə sə̂ â djî əpʉ aərə səkɔ â wû gâ ye kɔ. Alɔ ə̂në mə djî ə wû gâ ye kɔ, mə tê gâ tshekudu trawaya nə̂ Ndjapä nə ə̂në tshə yîsə̂ nə kə əmə kɔ, ndə kə pa mə vrɔ tə̂ əmə kə ətshə. 9 Bale, tshə pâ kə əmə ə pa: «Mbə̈ mbrə̈ rə ne! Mə sə kʉ tə bəngâ zə də̂ əyïkosəra də bəngâ alaye zə də̂ aawopandəma Ndjapä də ənə̂ azü ə̂në əndje sə kə mbrə ndəma aəpʉ tshelə fraka səke kɔ. Vrɔ̈ tə̂ zə gâ ətshi Ndjapä!» 10 Mandânə, tshə pâ kə əmə ə pa: «Kö kö aəpʉ ama Ndjapä tshelə fraka səke wû ne, mbrə ə̂në alɔ nə ndô trö gâ ye. 11 Əzü ə̂në tshə sə tə əmbrʉ əzü, tshə däka pə tə əmbrʉ əzü nə; əzü ə̂në tshekotə̂ ye sə də əbru, tshə däka pə tə kə tshe tshekotə̂ ye nə; bale, ə̂rɔ̂ əzü däka pə tə kə mbrə ərə də äwänə, â əzü ə̂në tshə sə kpî mbrə Ndjapä kɔ, tshə däka pə tə kə bata tə̂ ye kpî mbrə Ndjapä nə.»

12 Jezu pâ əpʉ ə pa: «Wü-a, mə sə kə na nə katshä katshä səye, â mə sə kə na də aərə nə̂ əmə mbrə azü, ndə kə pa mə za ərə kə əzü bale bale ə lï də ərə ə̂në tshə mbrə kɔ. 13 Əmə, mə də̂ Alfa də Ɔmega, əlî nə də bale nə, kə vɔtə̂ ərə də kə nglɔ nə.»

14 Ənə̂ əndje tə ə̂rɔ̂nə, azü ə̂në əndje sə kə yutu aləba nə̂ əndje, kanika əndje za äwä kə əndje ndə kə pa əndje zɨ leyɔ ə̂në ə za sorô kɔ ə li gâ lə gala nə lə amanda nə. 15 Gashu, azü ə̂në əndje sə mata ayavrɔ kɔ, də alayïəndro də alayïə̂trû də aawowo azü də aawovrɔ aamba andjapä gâ ndə azü nɔ̂ ə̂në əndje yində əterə ə pa əterə nə kɔ!

16 «Əmə Jezu, mə wlâ trawaya nə̂ əmə nə̂ tshelafɔ ndə kə pa tshə na ə pa əpʉ səke kə azü lə Alaglizə. Əmə də̂ əngbʉ nə ə̂në ə tɔ̂ tə əshe əyïngerə Davidə kɔ â sə tə angwa ye kɔ, mə də̂ təmble ə̂në ə tshe ro pâ nə də əzɨ kɔ.»

17 Âgbɔ̂ Yîrə̂ gâ ndə yashe nə ə̂në Aya Ndalimi nə tô ətshə kɔ pa: «Nä gâ əmə!»

Əzü ə̂në tshə sə kə dji əpʉ səke, tshə pä: «Nä gâ əmə!»

Əzü ə̂në əgo ə̂ngû mi ətshə, tshə nä gâ əmə; əzü ə̂në tshə yində nə, tshə ndjü ə̂ngû ə̂në ə za sorô kɔ tə ambanə!

18 Əmə Zââ, mə pa orâ kə azü nɔ̂ ə̂në əndje sə kə dji ndəma Ndjapä ə̂në ə sə lə fraka səke kɔ ə pa: kədə ə̈bə̈ əzü kə za ə̈bə̈ əpʉ gâ pâ nə, Ndjapä ə ko aəmbrʉ aərə ə̂në əndje pâ ndə nə lə fraka səke kɔ gâ lə akrɔ ye je. 19 Â kədə ə̈bə̈ əzü kə gi alabə̈ aəpʉ tshelə fraka ndəma Ndjapä səke gashe, Ndjapä ə gi ətshə gashe je tə̂ ə̂sə̂ ənə̂ ye leyɔ ə̂në ə za sorô kɔ də tshelə gala nə ə̂në ə sə kpî mbrə Ndjapä nə kɔ, ə̂në əndje pâ ndə nə lə fraka səke kɔ.

20 Ətshə nə ə̂në tshə pâ əpʉ nə sə tə djatra əpʉ kɔ, tshə pa: «Ayî, mə sə kə na nə katshä katshä səye.» Asərəmə! Nä gâ əmə, Âgbɔ̂ Əyïngerə Jezu!

21 Ə̂rɔ̂tə̂ Âgbɔ̂ Əyïngerə Jezu sə̈ də e nɔ̂!