3 Kaha uavalekele viuma viavingi mukulikuasesa visimo nguendi,

"Muka kukuva uayile nakukuva. 4 Kaha omo uakele nakukuva vimbuto vimo viauililile ku mukulo ua ngila, kaha tuzila vezile nakuvilia. 5 Kaha vimbuto vikuavo viauililile ha mavue aje kuhakele livu lialingi, kaha hajevene viasokele, muomu kuhakele livu lia lingi. 6 Vuno honi omo litangua liatuhukile kaha vije vimbuto viajujuamene, muomu mizi yavio kuyakovelele cikuma mu livu, kaha vije vimbuto viomine. 7 Vimbuto vikuavo viauililile hakati ka mingonga, kaha ije mingonga yakolele nakuvituva. 8 Vimbuto vikuavo viauililile ha mavu acili kaha viemine muacili, vimo vimbuto vihita, vimo viemine vimbuto makumi atanu na limo, kaha vikuavo naua viemine vimbuto makumi atatu kupulakana vije vivakunine. 9 Uoshe uje hali na matuitui ovue."

25 Hajevene mulongisi ua mashiko uemanene mukueseka Yesu nguendi, "Mulongisi," "Nkuma njinapande kulinga vika ngeci njikakale na muono uayaye?"

26 Yesu uamuhuile nguendi, "Nkuma vika vanasoneka mu Lishiko lia Mosesa? Nkuma vika ukatandamo?"

27 Kaha uamukumbuluile nguendi, "Zanga Muene Njambi yove na mutima uove uoshe, na muono uove uoshe, na nzili yove yoshe, na visinganieka viove vioshe, kaha zanga mukueni ngue muje ualizanga yove vavenia."

28 Kaha Yesu uahandekele kuli ikeye nguendi, "Uahandeka muacili, linga eci, kaha ukakala muono uayaye."

29 Vuno honi uje mulongisi uatondele kulisambuesa ikeye vavenia, uehuile Yesu nguendi, "Mukuetu ikeye iya?"

30 Yesu uamukumbuluile mu cisimo nguendi, "Litangua limo kuakele yala umo uahumine ku Yelusalema nakuya ku Yeliko, kaha ualiuanene na vezi. Vamushuluile vuzalo vuendi, na kumuveta na kuteua, na kumuseza na lezumuka. 31 Kaha capuile ngeci, kasasendote uayile mu ngila ijevene, kaha omo ua mumuene ou yala, uamuongolokele kumukulo. 32 Na Kalevi naua omo uahetele ku cihela cije ua mumuene nendi naua kaha uamuongolokele. 33 Vuno honi Kasamaliya umo uakele nakuhita mu ngila ijevene, omo uahetele ku cihela cije kuakosele uje yala, omo ua mumuene ua muvuilile ngozi. 34 Uashuenene kuyehi nendi nakumuhaka mazi na viniu ha vimbandu viendi kaha uamuzengeleho vintanga, ambahoni uamuhakele ha cimulu cendi na kumutuala ku njivo ya vangenzi, naku kamuniungilako. 35 Kaha liamukuavo uambatele vimbongo via muuaya uaya vivali nakuhana muka kuniunga njivo ya vangenzi, kaha uahandekele kuli ikeye nguendi, ‘Umuniunge muacili,’ kaha omo njikahiluka nja kukufueta vioshe vije viulinalikuasesa."

36 Hanima yevi Yesu uehuile uje mulongisi ua mezi a mashiko a Mosesa nguendi, "Muviyongola viove nkuma iya hakati ka vantu ava vatatu uje ualingile ngue mundambo ua uje yala, ivaluisile vezi?"

37 Kaha uahandekele nguendi, "Uje uamumuesele ngozi."

Kaha hanima yevi Yesu uahandekele kuli ikeye nguendi, "Eyo, ya ukalinge ngoco."

4 "Nkuma iya hali yeni nga ali na vampanga cihita kaha azimbalesaho umo, nkuma kaseze vaje makumi atanu na auana na vatanu na vauana (99) mu musenge na kuya nakutonda uje nazimbala kuvanga noho na muuana ndi? 5 Kaha nga omo namuuana, avuahelela na kumuhaka ha vitsili viendi, 6 kaha omo aya kuimbo, akasana vavusamba vendi nava vaje valihata navo kaha akahandeka nguendi, ‘Vuaheleleni hamo nange muomu njinauana mpanga uange uje uazimbalele.’ 7 Njimileka nguange, mucifua cimo vene kukapua kuvuahelela kuakama muilu hali muka vupi umo nga natenguluka kupulakana vaje makumi atanu na auana na vatanu na vauana vantu vaje kuvatondo kutenguluka."

11 Yesu uatualeleleho kuhandeka nguendi, "Kuakele yala uakele na vana va vamala vavali, 12 ua muanike uahandekele kuli ishe nguendi, ‘Tate, njihaneko mutambela ua vufuko vuange,’ kaha ishavo uavapangelele vufuko vuendi hakati kavo vavali. 13 Kukuahitile ntsimbu ya laha kuhuma haje, ua muanike uambatele vioshe uakele navio na kuya ku cifuti cakulahako na kupihisa viuma viendi vioshe kusenga. 14 Muamanusuile kupihisa viuma viendi vioshe, kaha kuakele njala yakama mu cifuti coshe, kaha uaputukile kutsa njala na vuhutu. 15 Kaha uayile na kutonda vipangi kuli muntu umo uamu cifuti cije kaha ua mutualele ku lihia nakulisa vangulu. 16 Uatondele kulia vije vakele na kulia vangulu, vuno honi naumo uahi uamuhaneneko cimo ca kulia. 17 Omo mana ahilukile muli ikeye, uahandekele kuli ikeye vavenia nguendi, ‘Vaka kupanga va vatate vali na viakulia viavingi, yange kuno njili nakutsa njala! 18 Njikuta vungenzi njihiluke kuli tate kaha njikahandeka kuli ikeye nguange, "Tate, njapihisila Njambi nove, 19 kunjapandele naua kunjisana munove, njipuise umo ua vaka kupanga vove."’ 20 Kaha uakatukile nakuya kuli ishe.

"Omo uakele nakuendela halahako, ishe uamumuene kaha ua muvuililile cikeketima kaha ishe uamushatukilile, uamuvumbatelele na kumutsemba. 21 Muana uahandekele kuli ikeye nguendi, ‘Tate njapihisila Njambi nove. Kunjapandele naua kunjisana munove.’ 22 Vuno honi ishe uahandekele kuli vangamba vendi nguendi, ‘Zambuleni! Neheni cikovelo cacili mu muzike nakumuzika kanzeya ku munie uendi na vinkaku ku viliato viendi. 23 Neheni muna ngombe uakuhindala mu mutsihe, kaha tulieni na kuvuahelela, 24 muomu munange ou uatsile vuno honi ayoya naua, uazimbalele vuno honi tuna muuana.’ Kaha vaputukile kulia na kuvuahelela.

25 "Ha ntsimbu ijevene, muana ua mukuluntu uakele mu lihia. Omo uezile kuyehi na njivo, uovuile vaje vakele nakuimba na kukina. 26 Kaha uasanene umo ua vangamba na kumuhula nguendi, ‘Vika vili nakulingiua.’ 27 Uamukumbuluile nguendi, ‘Munanoko ikeye neja kaha isho natsihi muna ngombe uakuhindala muomu nahiluka oku alimuacili.’ 28 Muana ua mukuluntu uanienguele na kuviana kukovela mu njivo. Kaha ishe uatuhukile na kumulambelela linga akovele mu njivo. 29 Vuno honi uakumbuluile ishe nguendi, ‘Tala! Ha miaka yoshe njinakupangela ngue ndungo kaha kunjashauile mashiko ove. Vuno honi ku uanjihaneko cipue muna mpembe linga njivuahelele na vavusamba vange. 30 Vuno honi omo ou munove nahiluka, uje na pihisa vufuko vuove na vukoyi kaha neja kuimbo, kaha una mutsihila muna ngombe uakuhindala!’ 31 Ishe uahandekele kuli ikeye nguendi, ‘Munange, ntsimbu yoshe unakele nange, kaha vioshe njilinavio vinapu viove. 32 Vuno honi tuapande kuvuahelela na kujolela, muomu shongoyove ou uatsile kaha ayoya naua, uazimbalele vuno honi vanamuuana.’"

45 "Naua Vumuene vua muilu vunapu ngue muntu uje muka kulandesa uje atonda vusanga vuaseho, 46 uje omo auana vusanga vumo vua seho yakama, kaha aya nakukalandesa vioshe vije alinavio kaha akavulanda.

9 Yesu uatele cisimo eci naua ku vantu vaje vaka kutsiliela vusunga vuavo vavenia nakushaula vakuavo. 10 Uahandekele nguendi, "Vamala vavali vayile ku njivo ya Njambi nakulombela, umo uapuile Kafaliseo, mukuavo uapuile muka kutambula lisimu. 11 Kaha Kafaliseo uemanene na kulomba nguendi, ‘Njikutsantsela Njambi, yange kunjafuile ngue vakuetu vantsintsa, vaka kuhona vusunga, vaka vupangala. Yange kunjafuile ngue uje muka kutambula lisimu nemana kuje. 12 Njikaliumina kulia ha matangua avali musondo, njikahana cimo kulikumi ca vioshe vinjikauana.’ 13 Vuno honi uje muka kutambula lisimu uemanene ku lahako, kaha kasele cipue kutala kuilu, vuno honi ualipupile ha ntulo na kuhandeka nguendi, ‘Njambi, njivuile ngozi yange muka vupi.’ 14 Njimileka," nguange, "uje muka kutambula lisimu uayile kuimbo liendi mu vusunga kupulakana uje Kafaliseo, voshe vaje valijundula vakevo vavenia vaka vakehesa, vuno honi voshe vaje valikehesa vakevo vavenia vaka vajundula."

14 "Kaha naua Yesu uavalekele nguendi, Vumuene vua muilu vukafua ngue yala omo aya mu vungenzi kaha asana vangamba vendi, nakuvasezela vupite vuendi. 15 Kuli umo uahanene makulukazi atanu a vimbazuvuila via ngolinde, kuli mukuavo makulukazi avali a vimbazuvuila via ngolinde, kuli mukuavo likulukazi limo lia vimbazuvuila via ngolinde, kuya kuvipangi viavo kaha uayile. 16 Kaha uje uatambuile makulukazi atanu a vimbazuvuila via ngolinde uayile hajevene uakavilanduluile, kaha uakapangeleleho naua makulukazi atanu a vimbazuvuila via ngolinde. 17 Kaha naua na uje mukuavo uatambuile makulukazi avali a vimbazuvuila via ngolinde, uapangeleleho naua makulukazi avali a vimbazuvuila via ngolinde. 18 Vuno honi uje ngamba uatambuile likulukazi limo lia vimbazuvuila via ngolinde, uayile nakukahinda cina nakushitikamo vimbongo via muene uendi."

19 "Omo kuahitile matangua amengi muene ua vaje vangamba uehilukile kaha uatandele navo vije vimbazuvuila via ngolinde. 20 Kaha uje uatambuile makulukazi atanu a vimbazuvuila via ngolinde uezile, kaha uaneheleleho naua makulukazi atanu a vimbazuvuila via ngolinde, nakuhandeka nguendi, ‘Muene uanjihanene makulukazi atanu a vimbazuvuila via ngolinde, kaha naua njapangelaho makulukazi atanu a vimbazuvuila via ngolinde eka naua.’ 21 "Muene uendi uahandekele kuli ikeye nguendi, ‘Ualingi muacili, ngamba uacili uakulongua! Unapu uakulonua ha viuma via vindende, njikakupuisa mukuluntu ua viuma viavingi. Kovela mukuvuahelele ca muene uove!’" 22 "Kaha na uje uatambuile makulukazi avali a vimbazuvuila via ngolinde uezile kuli ikeye nguendi, ‘Muene uanjihanene makulukazi avali a vimbazuvuila via ngolinde, hano njapangelaho makulukazi avali a vimbazuvuila via ngolinde eka naua.’" 23 "Muene uendi uahandekele kuli ikeye nguendi, ‘Ualingi muacili, ngamba uacili uakunkokama! Unapu uakunkokama ha viuma via vindende, njikakupuisa mukuluntu uaviuma viavingi. Kovela mukuvuahelele ca muene uove.’" 24 "Kaha na uje uatambuile likulukazi limo lia ngolinde uezile, uahandekele kuli muene uendi nguendi, ‘Muene njikuzivuka nguange uapua u muntu uamukalu cikuma, ukateje vije ku uakuvile, kaha ukakungulula vije ku uashanduile, 25 kaha njevuile liova, kaha njaile nakushitika ngolinde yove mu livu. Viuma viove evi.’" 26 Vuno honi muene uendi uamukumbuluile nguendi, "Yove ngamba uamupi ua cilenda! Uazivukile nguove yange njikateje kuje kunjakuvile, kaha njikakungulula vije kunjashanduile? 27 Ambahoni ngue uasinganiekele kutulikisa vimbongo viange kuli vakakutulika vimbongo, kaha nga hakuija cange ngue njatambuile vije viapuile viange na kakondueso kayo. 28 ‘Mutambuleni vimbongo vije vili kuli ikeye, kaha vihaneni kuli uje ali na makulukazi avimbongo likumi. 29 Muomu uje alinavio vakamuvuezelelako, kaha akakala na viavingi, vuno honi uje kesi navio, cipue vene vije via vindende vialinavio vakamuniekavio. 30 Nakushekela ngamba uje kesi nacimo hambaza ya milima, kuje vantu vakalila na kulishumanga ku mazo’

19 "Kuakele yala umo uakufuka uje uakele nakuzala vuzalo vua vunengu vuandando yakutula, uakele na ciuano ca kulia cakama ha tangua na tangua. 20 Kuakele yala ua cihutu lizina liendi Lazalu uje ivakele nakuneha ku cikolo ca muka kufuka, uje uakele na vimbandu muvila uoshe, 21 uakele nakuvandamena kulia vije viakele na kuua ku mesa ya uje yala uakufuka, na tutali vakele nakuija na kuliasa ha vimbandu viendi. 22 Uje yala ua cihutu uatsile kaha tungelo vamuambatele kukakala na Avilahama. Kaha na uje yala uakufuka na ikeye naua uatsile kaha vamutsindile, 23 uakele mu ngehena na kuyanda. Uanduile mesho endi kaha uamuene Avilahama kulahako ali na Lazalu ku mukulo uendi. 24 Kaha uasanene nguendi, ‘Tate Avilahama, njivuileko cikeketima tuma Lazalu ambuitike munie uendi mu mema linga anjitontuese ha ndaka yange, muomu njili na kuvua kuvavala muno mu tuhia.’ 25 Vuno honi Avilahama uamukumbuluile nguendi, ‘Munange, vuluka ha ntsimbu yove ije uakele nakuyoya uakele nakutambula viuma viove viacili, na Lazalu ikeye uakele nakutambula via vipi, vuno honi ali nakuyoya muacili yove uli nakuvua kuvavala. 26 Kaha naua mukati kove netu hali cina cakama, ngeci uoshe atonda kujavuka kuhuma kuli yetu kuija oko keti ase, kaha naumo uahi asa kujavuka kuhuma oko kuija kuno kutuli.’ 27 Kaha yala ua kufuka uahandekele nguendi, ‘Honi, tate, njikulomba tuma Lazalu ku njivo ya tate, 28 muomu njili na vamunanana vatanu. Ecela Lazalu aye nakuvanangula linga keti vakeje naua kuno ku cihela ca tuyando.’ 29 Avilahama uakumbuluile nguendi, ‘Vali na visoneka via Mosesa na tunanguizi, vanapande kuvovuilila.’ 30 Uje yala ua kufuka uahandekele nguendi, ‘Houe tate Avilahama, vuno honi nga umo akasanguka kuvatsi aya kuli vakevo kaha vakatenguluka.’ 31 Avilahama uamukumbuluile nguendi, ‘Nga kuvevuilila ku visoneka via Mosesa na tunanguizi, kaha cipue vene muntu uakuhuma ku vatsi ku vakamutava.’"

24 Kaha Yesu uavatelele cisimo cikuavo naua nguendi, "Vumuene vua muilu tuasa kuvusetekesa ngue yala uje uakuvile mbuto yacili mu lihia liendi, 25 vuno honi tele vantu vanakosa, citozi cendi uezile nakukuva shaku muje mu lihia lia tiliku, kaha uayile. 26 Omo ije tiliku yakolele nakuhaka vinona ambahoni naikeyo ije shaku yasholokele. 27 Kaha vaje vangamba vendi vezile kuli ikeye nakumuleka nguavo, ‘Muene nkuma ku uakunine lika mbuto yacili mu lihia liove ndi? Kaha cineja vati honi linga mukale naua na shaku?’ 28 Kaha uahandekele kuli vakevo nguendi, ‘Kuli citozi uje nalingi eci.’ Kaha vaje vangamba vendi vahandekele kuli ikeye nguavo, ‘Nkuma utonda linga tuye tukaitukulemo ndi?’ 29 Vuno honi uavakumbuluile nguendi, ‘Houe!’ Muomu muje mu mukaitukulamo ije shaku hamo mukatukuila kumo na tiliku. 30 Vieceleni vioshe linga vikole kuvanga noho ha ntsimbu yakuteja, kaha ha ntsimbu yakuteja njikaleka vaka kuteja nguange, ‘Tukulenimo tahi shaku muikute mikuta, kaha itsimikeni, vuno honi kungululeni tiliku nakuihaka mu cishete cange.’"

1 "Ha ntsimbu ije Vumuene vua muilu vaka vusetekesa ngue vambanda likumi vaje vambatele vindeya viavo nakuya linga vakaliuane na liavenia vulo. 2 Vuno honi ava vatanu vapuile vilema, kaha vatanu vapuile vamana. 3 Omo vaje vambanda va vilema vambatele vindeya viavo, kuvambatele na mazi eka naua, 4 vuno honi vaje va mana vambatele mazi mu vintsazi na mu vindeya viavo. 5 Kaha omo uje liavenia vulo uakotokelele kuija, kaha voshe vaje vambanda vanengukile na kuya mutulo."

6 "Vuno honi mukati ka vutsiki vevuile mutambi nguavo, ‘Taleni liavenia vulo uje ali nakuija! Tuhukeni linga muliuane nendi.’ 7 Ambahoni voshe vaje vambanda vahindukile nakushukumisa vindeya viavo. 8 Kaha vaje va vilema vahandekele kuli vaje va mana nguavo, ‘Tuhaneniko amo mazi eni, muomu vindeya vietu vitonda kuzima.’ 9 Vuno honi vaje vambanda vamana vakumbuluile nguavo, ‘Kutupuisamo kulipangelauo yetu neni, yemuye kuli vakakulandesa linga mukalilandele yeni vavenia.’ 10 Kaha tele vanayi mukulanda, liavenia vulo uezile, kaha vaje valivuaheselele vayile nendi ku ciuano ca vulo, kaha vashokele ku cikolo."

11 "Hanima honi vaje vambanda va vilema vezile vahandekele nguavo, ‘Muene, muene, tushokolueleko.’ 12 Vuno honi uavakumbuluile nguendi, ‘Muavusunga njihandeka kuli yeni nguange, kunjimizivuka.’"

13 Nankuma zangameni, muomu kumuzivuka litangua cipue ntsimbu.