1 Yesu uahumine kuje na kuya ku cifuti liendi, kaha na vandongisi vendi vamukavele. 2 Ha litangua lia Sapalalo uaputukile kulongesa mu njivo ya malombelo, kaha vavengi vaje vamuvuile valikomokelele nakuhandeka nguavo, "Nkuma ou yala kulihoni kuanauana evi vioshe? Nkuma mana muka vamuhanene ikeye? Nkuma akalingi vati evi vikomoueso viendi! 3 Nkuma ou keti ikeye muka kushonga, muna Maliya na munaina ya Yakomba na Yosefa na Yundasa na Simoni ndi? Kaha vamunaina va vampuevo kutuesi navo hano ndi?" Kaha vakevo vamuvianene.

4 Kaha Yesu uahandekele kuli vakevo nguendi, "Kananguizi kuveku musingimika mu cifuti cendi, naku vantu vendi na mu njivo yendi vavenia."

5 Kaha kalingile vikomoueso viakama kuje, kuvanga lika kusaleka mavoko endi ku vantu vavandende vaka kuvavala na kuvakanguisa. 6 Kaha Yesu ualikomokelele muomu yakuhona lutsilielo luavo.

Ambahoni Yesu uendanganene mu membo na kulongesa. 7 Kaha uasanene vaje likumi na vavali nakuvatuma linga vaye vali na vavali, nakuvahana nzili yakama yakuhumisa vimbembesi viavipi. 8 Uavashikile nguendi "Keti vambate cimo mu vungenzi vuavo kuvanga lika mbueti, kuakuhona mbolo, cipue cola, cipue vimbongo mu vimboloso viavo, 9 vuno honi vazale vinkaku keti kuzala vikovelo vivali." 10 Kaha uahandekele kuli vakevo nguendi, "Mu njivo yoshe mukovela, tumamenimo kutuala noho mukahuma mu cihela cije. 11 Kaha nga cihela coshe cije kuvamitambula na kuviana kumivuilila, omo mukahumamo, litotomoneni likungu ku viliato vieni linga vupue vukaleho vueni hali vakevo!"

12 Nankuma vayile nakuambulula nguavo vantu vapande kutenguluka. 13 Kaha vahumisile mahamba vavengi, nakuvuavesa vantu vavengi vaka kuvavala na mazi nakuvakanguisa.

14 Omo muene Helonde uevuile nguendi lizina lia Yesu liatsimanene cikuma. Kaha vamo vahandekele nguavo, "Yiuano muka kumbuitika na sanguka kuvatsi, mukemo evi vinzili vili nakupanga muli ikeye."

15 Vuno honi vamo vahandekele nguavo, "Ikeye Eliya."

Veka naua nguavo, "Ikeye kananguizi, ngue ua vamo vaje tunanguizi va laja."

16 Vuno honi omo Helonde uovuile eci uahandekele nguendi, "Yiuano uje njavatuile mutue nasanguka ku vatsi." 17 Muomu Helonde uatumine linga vakuate Yiuano, na kumukuta na kumutuala mu kamenga, ualingile eci muomu ya Helondiya, mpuevo ya munaina Filipu muomu uamuambatele. 18 Muomu Yiuano uahandekele kuli Helonde nguendi, "Keti lishiko kuambata mpuevo ya munanoko."

19 Kaha Helondiya uakele na citela nendi, kaha uatondele kumutsiha vuno honi uahonouele, 20 muomu Helonde uateuele Yiuano, muomu uazivukile nguendi uapua ua vusunga na kulela, kaha ua muniungile muacili. Omo vamuvuile, ualikomokelele mu mutima uendi, vuno honi cipue ngoco uamuvuililile.

21 Omo litangua lije liasemukile Helonde liahetele, uavuahesele viakulia via vaka kuyula na vaka kushika vaje vahumine ku Ngalileya. 22 Kaha kuezile muna Helondiya ua mpuevo na kukina, uavuahelesele Helonde na vangenzi vendi, kaha muene uahandekele kuli uje mumbanda nguendi. "Njilombe coshe cije utonda, kaha njikakuhanaco." 23 Kaha ua lisingile kuli ikeye nguendi, "Coshe ulomba kuli yange njikakuhana, cipue vene mbazuvuila ya vumuene vuange."

24 Kaha uayile hambanza, nakuihula vaina nguendi, "Vika njikalomba?"

Kaha vaina vamukumbuluile nguavo, "Lomba mutue ua Yiuano muka kumbuitika."

25 Hajevene uje mumbanda uezile kuli muene nakulomba nguendi, "Njitonda linga unjihane mutue ua Yiuano muka kumbuitika ha lilonga hano vene."

26 Kaha muene uakele na vusiua vuakama, vuno honi muomu ha kulisinga cendi na vangenzi vendi, katondele kupokola mezi endi aje ahandekele kuli ikeye. 27 Kaha hajevene muene uatumine lisualale uje muka kuniunga kaha uamushikile linga anehe mutue ua Yiuano. Kaha uayile nakumuteta mutue mu kamenga, 28 kaha vanehele mutue mu lilonga, nakuhana uje mutue kuli uje mu mbanda, kaha uje mumbanda uauhanene vaina. 29 Omo vandongisi va Yiuano vacuvuile, vezile nakuambata muvila uendi, naku utsinda mu cihilo.

30 Tunganda vahilukile kuli Yesu, na kumulekesa vioshe vije vivalingile na vije vivalongesele. 31 Ambahoni Yesu uahandekele kuli vakevo nguendi, "Tuyeni ku cihela calikalietu, tukahuimeko kavundende." Muomu vavengi vakele na kuija nakuya, kaha kuvauanene cipue ntsimbu ya kulia. 32 Kaha vakovelele mu vuato nakuya ku cihela cakulishueka kua likaliavo.

33 Nkuma vavengi vavamuene oku valinakuya, naua vavazivukile, kaha vashatukilile kuli Yesu kuhuma ku vinganda vioshe, kaha uavauanene kulutue luendi. 34 Omo Yesu uayile ha ntunda uamuene civunga cakama, kaha uavovuilile ngozi, muomu vapuile ngue vampanga vakuhona kaniungi, kaha naua uaputukile kuvalongesa viuma viavingi. 35 Omo capuile cinguezi, vandongisi vendi vezile kuli ikeye nakuhandeka nguavo, "Cino cinapu cihela ca kulishueka naua kuatoko, 36 valeke vaye na kuzenguluka mu cifuti na mu membo vazenguluke linga vakalilandele viakulia vakevo vavenia."

37 Vuno honi Yesu uavakumbuluile nguendi, "Vahaneni viakulia valie." Kaha vahandekele kuli ikeye nguavo,

"Nkuma tuye nakulanda vimbolo mu vimbongo viakupua vihita vivali via muuaya uaya ua siliva, linga tuvahane valie ndi?"

38 Kaha Yesu uahandekele kuli vakevo nguendi, "Muli na vimbolo vingahi? Yeni mukamone."

Kaha omo vandongisi vendi vayile nakumona, vahandekele nguavo, "Kuli vimbolo vitanu, na vantsi vavali."

39 Ambahoni uavashikile nguendi, vatumame ha mavu ha vishoni mu vivunga. 40 Kaha vatumamene ha mavu mu vivunga, mu vihita na mu makumi atanu. 41 Kaha Yesu uambatele vimbolo vitanu na vantsi vavali kaha uatalele muilu, nakuvikuisula, kaha uapazuile vije vimbolo, uahanene vandongisi vendi linga vahane vantu, kaha uavapangelele vaje vantsi vavali voshe. 42 Voshe valile nakukuta. 43 Vandongisi va Yesu vakunguluile vimbazuvuila via vimbolo na vantsi vije viasaleleho via kupua mitonga likumi na ivali. 44 Kaha vamala vaje valile vije vimbolo vapuile vamala makulukazi atanu.

45 Hajevene Yesu ualekele vandongisi vendi linga vakovele mu vuato vaye kulutue luendi musinia lia Mbetesainda, tele ikeye acili na kushandola civunga. 46 Kaha omo uavasezele, uayile ku munkinda na kulombela. 47 Kaha omo capuile cinguezi, vuato vuakele hakati ka cisali kaha uakele likaliendi ha ntunda.

48 Kaha uamuene vandongisi vendi vali mu vukalu vua kujavula vuato muomu mpunzi yakele na kuvaluisa. Kaha omo ntsimbu kanda kuce, uezile kuli vakevo, oku ali nakuenda ha mema. Tele uatondele kuya kuli vakevo, 49 vuno honi omo vamumuene ali na kuenda ha mema vasinganiekele nguavo ndumba ya muntu, kaha vatambekele cikuma, 50 nankuma omo vamumuene, kaha vovuile liova cikuma.

Vuno honi hajevene Yesu uahandekele kuli vakevo nguendi, "Keti muteue, yange vene." 51 Uakovelele mu vuato navo kaha na mpunzi yaholokele. Kaha valikomokelele cikuma, 52 kuvovuisisile via vije vimbolo, muomu vakolesele mitima yavo.

53 Omo Yesu na vandongisi vendi vajavukile cisali, vahetele ku Ngenesaleta, kaha vakutile vuato ku cikuma. 54 Omo vahumine mu vuato, hajevene vantu vazivukile Yesu, 55 kaha vashatukilile mu vihela vioshe viakulihatako kaha vaputukile kuneha vaka kuvavala ha vitala tala viavo nakuvatuala kuoshe kuje kuva muvuililile. 56 Kaha kuoshe kuje kuayile, ku membo, namu vinganda cipue mu cifuti, vakosesele vaka kuvavala ha vitala tala viavo kuje ku vihela viakulandesela, vamulambelelele linga vaje vaka kuvavala vamukuate ku mukunduilo ua kazaku kendi, kaha voshe vaje vakuateleko vakangukile.