1 Yesu naua uaputukile kulongesa ku cikuma ca cisali. Civunga ca vantu calikunguluile kuli ikeye, kaha uakovelele nakutumama mu vuato ha cisali, tele civunga coshe cakele ku cikuma ca cisali ha ntunda. 2 Yesu uavalongesele viavingi mu visimo, kaha mu vilongesa viendi uahandekele kuli vakevo nguendi,

3 "Ivuilileni! Muka kukuva uayile nakukuva vimbuto. 4 Kaha omo uakuvile, imo mbuto yauililile kumukulo ua ngila, kaha tuzila vezile naku ilia. 5 Imo mbuto yauililile ha mavue a mavue haje kuhakele livu lia lingi, kaha hajevene yasokele muomu kuhakele livu lia lingi, 6 kaha omo litangua lia tuhukile vije vimbuto via jujuamene, muomu mizi kuyakovelele cikuma mu mavu kaha yomine. 7 Ikuavo mbuto yauililile mu mingonga kaha mingonga yakolele nakuituva, kaha kuya hakele vinona. 8 Vikuavo vimbuto viauililile mu mavu acili, viasokele kaha viahakele vinona viavingi, viakolele nakulivuezelela kuima, vimo viemine makumi atatu, vikuavo viemine makumi atanu na limo, kaha vikuavo viemine cihita."

9 Yesu uahandekele kuli vakevo nguendi, "Uoshe ali na matuitui ovue."

10 Omo Yesu uakele likaliendi, kaha vaje vakele navo hamo na vandongisi vendi likumi na vavali vamuihuile via ha visimo. 11 Kaha uahandekele kuli vakevo nguendi, "Kuli yeni vanamihana vushueke vua Vumuene vua Njambi, vuno honi kuveka vioshe vili mu visimo, 12 nankuma linga,

"Vamone

vuno honi keti vamonesese,

kaha linga vovue,

vuno honi keti vovuisise.

Omo nga valingamo vakatenguluke na

kuvakonekela."

13 Kaha Yesu uahandekele kuli vakevo nguendi, "Nkuma kumuesi nakuvuisisa eci cisimo ndi? Kaha nkuma vatihoni mukevivuisisa visimo vikuavo? 14 Muka kukuva akakuvu lizi. 15 Ava vakevo vantu vanalifu ngue vimbuto vije viauililile kumukulo ua ngila, kuje lizi valiambulula, kaha omo valivua, hajevene Satana eja nakuambata lije lizi livanambulula muli vakevo. 16 Kaha vamo vantu vanapu ngue vimbuto vije vivakuvile ha livu lia mavue, omo vevua lizi, hajevene valitambula nanzolela, 17 kaha kuvesi na mizi muli vakevo, vuno honi kuvakasimbula nalio, kaha omo tuyando cipue mapakeso vikeja muomu ya lizi, hajevene vakaua. 18 Kaha vamo vanapu ngue vimbuto vije vivakuvile mu mingonga, ava vakevo vaje vevua lizi, 19 vuno honi vakevo vahakela mana via ha mavu na kuzanga vufuko, kaha nalishungu lia viuma vieka vije vikovela nakutuva lizi, kaha kulimi vushuka. 20 Vuno honi vamo vanapu ngue vimbuto vije vivakuvile ha livu liacili, ava vakevo vanapu vaje vevua lizi nakulitambula na kuima vushuka vua kupua, makumi atatu na makumi atanu na limo, na cihita."

21 Kaha Yesu uahandekele kuli vakevo nguendi, "Nkuma muntu akanehe ndeya nakuihaka muntsi lia liendeko, cipue muntsa muhela ndi? Nkuma kaihaka ha citumbiko cayo ndi? 22 Muomu nacimo cahi cuma cakushueka, cihonoua kuija hakutoka, kaha naua nacimo cahi ca vushueke civahonoua kuneha ku ceke. 23 Nga uoshe uje ali na matuitui ovue."

24 Kaha uahandekele kuli vakevo nguendi, "Niungeni vimuli na kuivua, seteko ije muhana ikeyo vakamihana neni naua, vuno honi yeni vakamivuezelelako. 25 Uoshe ali na viavingi vakamuvuezelelako, kaha uje kesi, cipue cije cali naco va kamutambulaco."

26 Kaha Yesu uahandekele nguendi, "Vumuene vua Njambi vunapu ngue muntu akuva mbuto mu mavu, 27 cipue vene akosa tulo omo ahinduka vije vimbuto visoka na kukola vutsiki na mutania, vuno honi kazivuka muvili nakukolelamo. 28 Cakulivanga mavu akahaka cishati, kaha mutue, kaha vinona ku mitue. 29 Vuno honi omo vimbuto vinahi, hajevene uavitejele na mpoko ya kutejesa muomu ntsimbu ya kuteja yahetele."

30 Kaha Yesu uahandekele nguendi, "Vumuene vua Njambi tukavusetekesa na vika, cipue cisimo muka tukalikuasesa hali vukevuo? 31 Vunapu ngue nona ya musalata, ije omo vaikuva mu mavu, kaha ikeyo yapua yaindende cikuma ku vimbuto vioshe via ha mavu. 32 Vuno honi omo vaikuva kaha ikakola na kupua yakama kupulakana viputa vioshe, kaha ikahaka mintango yakama, ngeci tuzila va muilu vapangeleho mashua mu cimbembe cayo."

33 Muomu ya visimo viavingi evi, Yesu uahandekele lizi kuli vakevo kuya nomu muvahaselele kuvivuisisa. 34 Kahandekele kuli vakevo kuakuhona cisimo, vuno honi kumukulo uakele nakulumbunuina vandongisi vendi viuma vioshe.

35 Ha litangua lije, omo capuile cinguezi, Yesu uahandekele kuli vandongisi vendi nguendi, "Tuyeni musinia lia cisali." 36 Kaha omo vasezele civunga vayile nakukovela nendi mu vuato. Kaha kuakele na mato eka kuje. 37 Kaha mankimba akama a mpunzi ezile, aputukile kukovela mu vuato, na vuato vuaputukile kushula na mema. 38 Vuno honi Yesu uakele kuntongo ya vuato uakosele tulo oku najendamena ha musato, kaha vamuhinduile nakuhandeka kuli ikeye nguavo, "Mulongisi, ku uazivukile nguove tutsa ndi?"

39 Kaha uahindukile nakutenukila mpunzi, uahandekele ku mankimba nguendi, "Ciyulo! Holoka!" Mpunzi yaholokele, kaha kuakele kuholoka cakama kuluu. 40 Ambahoni Yesu uahandekele kuli vakevo nguendi, "Vika muteua? Nkuma kumuesi na lutsilielo ndi?"

41 Kaha vakele na liova, vahandekele kuli umo na mukuavo nguavo, "Iya honi ou, cipue mpunzi na mankimba vimuvuila?"