1 Kaha kuasalele lika matangua avali linga Paseka na ciuano ca mbolo yakuhona cimbaluila vihete. Kaha vakuluntu va vasasendote na valongisi va mashiko vakele nakutonda ngila yavushueke ya kukuatelamo Yesu nakumutsiha. 2 Kaha vahandekele nguavo, "Kutuapandele ku cilinga ha ciuano, mpamo hamo vantu vakaneha mpindangano."

3 Tele Yesu ali ku Mbetaniya mu njivo ya Simoni uje uakele na mbumba. Tele Yesu natumama ku mesa na kulia, mpuevo uezile kuli ikeye na ntsazi yakupanga ha livue lia kutoka ya kushula na mazi andando nakunika na luengo luacili. Uapazuile ije ntsazi kaha uetilile ku mutue ua Yesu. 4 Vuno honi kuakele vamo vaje vahandekele kuli umo na mukuavo oku vananiengua nguavo, "Vika vana pihisila aua mazi? 5 Muomu mazi aua vanapandele ku alandesa ha ndando ya vihita vitatu via muuaya uaya (300) nakuvihana ku vihutu!" Kaha valiniengele cikuma hali uje mpuevo.

6 Vuno honi Yesu uahandekele kuli vakevo nguendi, "Mueceleni, vika mu mumupakesela? Nalingi cuma cacili kuli yange. 7 Muomu yeni ntsimbu yoshe muli na vihutu, kaha naua ntsimbu yoshe mutonda muasa kulinga muacili kuli vakevo, vuno honi kumukakala nange ntsimbu yoshe. 8 Nalingi muanasela, na vuavesa muvila uange mukunjivuahesela kunjitsinda. 9 Muavusnga njimileka nguange, kuoshe kuje kuvakambulula Muzimbu Uacili ha mavu hoshe, canalingi vakacihandeka mu kumuvuluka."

10 Ambahoni Yundasa Sakaliote, umo ua vaje vandongisi likumi na vavali, uayile ku vakuluntu va vasasendote linga akande Yesu vungungu. 11 Omo vovuile vije viahandekele va vuahelele, kaha vamukulahesele kumuhana vimbongo. Kaha Yundasa uaputukile kutonda ngila ya kuendelamo Yesu vungungu.

12 Ha litangua liakulivanga lia mbolo yakuhona cimbaluila, omo valingile nkombelo ya mpanga ua ha Paseka, vandongisi vendi vahandekele kuli ikeye nguavo, "Nkuma kuli utonda linga tukavuahese kuje ukalila Paseka?"

13 Kaha uatumine vandongisi vendi vavali, kaha uavalekele nguendi, "Yeni mu nganda kaha mukauana yala nambata ntsuua ya mema kaha akeja kuli yeni, kaha mukamukave, 14 kaha muje muakakovela mukahandeke kuli vavenia njivo ngueni, ‘Mulongisi nguendi, ulikuli mulili ua vangenzi, muje njinapandele kulila Paseka hamo na vandongisi vange?’ 15 Kaha akamimuesa mulili uakama uakuvuahesa vuino uli helu ya milili ikuavo, kukeko mukavuahesa."

16 Vandongisi vendi vaputukileko nakuya kuje ku nganda, kaha vakauanene ngue muje vene muava lekeselelemo, kaha vavuahesele Paseka.

17 Omo capuile cinguezi uezile na vandongisi vendi likumi na vavali. 18 Tele omo vakele ku mesa na kulia, Yesu uahandekele nguendi, "Muavusunga vene njimileka nguange, umo ueni akanjenda vungungu, umo uje alinakulia nange."

19 Vaputukile kulinienga, nakumuihula umo na mukuavo nguavo, "Yange ndi?"

20 Yesu uahandekele kuli vakevo nguendi, "Umo ua vandongisi likumi na vavali, umo uje atanta hamo nange mbolo mu lilonga. 21 Muomu Muna Muntu akaya ngue muje muvanacisoneka hali ikeye, vuno honi tuyando hali uje yala nende vungungu Muna Muntu! Ngue capuile cacili uje yala ngue kasemukile."

22 Kaha honi omo vakele nakulia, Yesu uambatele mbolo, na ku ikuisula, uaipazuile, naku ihana kuli vandongisi vendi, kaha uahandekele nguendi, "Ambateni, ou ukeuo muvila uange."

23 Ambahoni uambatele nganja naua, kaha muamanusuile kutsantsela uavahanene, kaha voshe vanuinemo. 24 Kaha uahandekele kuli vakevo nguendi, "Aua akeuo maninga ange a litavasano, aje anahitikila vavengi. 25 Muavusunga vene njimileka nguange, kunjikanuho naua neni viniu kuvanga noho ha litangua lije omo njikanua viniu via viha mu Vumuene vua Njambi."

26 Omo vamanusuile kuimba muaso, vahuminemo nakuya ku munkinda ua Oliveta.

27 Yesu uahandekele kuli vandongisi vendi nguendi, "Muva voshe mukateua, muomu vacisoneka nguavo, ‘Njikapupa kaniungi, kaha vampanga vakalishandoka.’ 28 Vuno honi hanima yakunjisangula, njikaya kulutue lueni ku Ngalileya."

29 Petulu uahandekele kuli ikeye nguendi, "Cipue voshe vakateua, vuno honi yange kunjikateue."

30 Yesu uahandekele kuli Petulu nguendi, "Muavusunga vene njikuleka nguange, vutsiki vuno vene, ntsimbu kanda ndemba atambeke luvali, ukanjiviana lutatu."

31 Vuno honi Petulu uavianene cikuma nguendi, "Nga kutsa nove kaha njikatsa, kunjikakuviana." Kaha voshe vahandekele cifua cimo.

32 Yesu na vandongisi vendi vezile ku cihela civasanene Ngetesemani, kaha Yesu uahandekele kuli vandongisi vendi nguendi, "Tumameni hano ntsimbu njilombela." 33 Ambahoni uambatele Petulu, na Yakomba, na Yiuano, kaha uaputukile kuzeya na kuvua vusiua. 34 Yesu uahandekele kuli vakevo nguendi, "Njivua vusiua vuakama mu mutima uange, cipue ku kutsa, tumameni hano mutalele."

35 Uayile halahako kavundende, kaha uatsikamene ha mavu nakulombela nguendi, nga casiua, eyi ntsimbu imutuvakane. 36 Yesu uahandekele nguendi, "Tate, Tate, viuma vioshe via viasi kuli yove, humisa eyi nganja kuli yange, vuno honi keti ngue ku cizango cange, vuno honi cizango cove cilingiue."

37 Ambahoni omo Yesu uahilukile uavauanene vakosa tulo, kaha uahandekele kuli Petulu nguendi, "Simoni, nkuma unakosa ndi? Nkuma ku uasa kutona cipue ha ntsimbu imo lika ndi? 38 Toneni na kulombela linga keti mukovele mu vieseko, cimbembesi cili vene atonda, vuno honi muvila unazeye."

39 Kaha naua uayile na kulombela, uakahandekele mezi a cifua cimo. 40 Kaha naua uahilukile ua vauanene vakosa tulo, muomu mesho avo alemene, kaha kuvazivukile mua kumukumbuluila.

41 Kaha uehilukile lua mucitatu, uahandekele kuli vakevo nguendi, "Nkuma hanga muacikosa na kuhuima ndi? Muapuisamo, ntsimbu inahete. Taleni, Muna Muntu vanamuende vungungu nakumuhana ku mavoko a vaka vipi. 42 Hindukeni, tuyeni, taleni, muka kunjenda vungungu neja."

43 Hajevene, omo tele Yesu alina kuhandeka, Yundasa uezile, uje uapuile umo ua vandongisi likumi na vavali kaha uakele na civunga ca vantu cije cambatele mikuale na vimbueti, vahumine ku vakuluntu va vasasendote na valongisi va mashiko naku vakuluntu va Vayunda. 44 Kaha honi uje muka kuenda vungungu uavahanene cimueso nguendi, "Uje umo njikatsemba ikeye yala mukakuata nakumuniunga."

45 Hajevene omo Yundasa uezile, uayile kuli ikeye kaha uahandekele nguendi, "Mulongisi!" Kaha uamutsembele. 46 Nankuma vakuatele Yesu na mavoko avo nakumukuta. 47 Vuno honi kuakele uje umo uemanene kumukulo uahumisile mukuale uendi nakuteta lituitui lia ngamba ua kasasendote uakama. 48 Kaha Yesu uahandekele kuli vakevo nguendi, "Nkuma muneja ngue muluisa muhuza, na mikuale na vimbueti mukunjikuata ndi? 49 Hatangua na tangua njinakala neni mu njivo ya Njambi nakulongesa, kaha ku muanjikuatele. Vuno honi linga visoneka vilishulisise."

50 Ambahoni vandongisi vendi voshe vamusezele, na kuteua.

51 Kaha mukuenje umo uamukavele, na cimo cahi cazalele mukati kuvanga lika cikovelo ca liniu, kaha vatondele kumukuata, 52 vuno honi uasezele ije ntanga ya liniu nakuteua kuakuhona vuzalo.

53 Vatualele Yesu kuli kasasendote uakama, kaha vakuluntu va vasasendote na vakuluntu, na valongisi va mezi a mashiko vakungulukilile hamo. 54 Petulu uamukavele halahako, ku cipango ca kasasendote uakama, kaha uatumamene na vaka kuniunga nakuota tuhia. 55 Kaha honi vakuluntu vavasasendote na mpunga yoshe vatondele vukaleho hali Yesu linga va mutsihe, vuno honi ku vavuuanene vuahi. 56 Muomu vavengi vahandekele vukaleho vua makuli hali ikeye, vuno honi vukaleho vuavo ku vualitombuele.

57 Vamo vemanene nakuhandeka vukaleho vua makuli hali ikeye, nguavo, 58 "Tuamuvuile ahandeka nguendi, ‘Njikapihisa eyi njivo ya Njambi yakutunga na mavoko, kaha mu matangua atatu nji katunga ikuavo naua, ije keti ya kutunga na mavoko.’" 59 Kaha cipue ngoco vene vukaleho vuavo kuvua litombuele.

60 Kaha uje kasesondote uakama uemanene hakati kavo, uehuile Yesu nguendi, "Nkuma kuuesi na viakuvakumbulula ndi? Nkuma cuma muka eci vantu vali nakukuvangeya hakuhana vukaleho vua makuli hali yove?"

61 Vuno honi Yesu uaholokele kuakuhona kuvakumbulula. Kaha naua kasasendote uakama uamuhuile nguendi, "Nkuma yove Kilistu, Muana ua Njambi Uakukuisula ndi?"

62 Yesu uahandekele nguendi, "Yange vene, kaha mukamona Muna Muntu natumama ku livoko liacilio lia Njambi ua Nzili Yoshe, kaha akahuminina muilu mu mashelua."

63 Kaha uje kasasendote uakama uatavuile vuzalo vuendi, uahandekele nguendi, "Nkuma vika tutondela naua vakaleho vakuavo? 64 Munevu muanashaula. Nkuma vika muyongola?" Kaha voshe valitavasanene nguavo napande kutsa. 65 Vamo vaputukile ku mujekuila, nakumukuta ha mesho, nakumupupa, nakuhandeka kuli ikeye nguavo, "Handeka vunanguizi!" Kaha vaka kuniunga vamupupile vinkome.

66 Omo Petulu tele acili mucipango umo ngamba ua mpuevo ua kasasendote uakama uezile kuyehi nendi. 67 Kaha omo uamuene Petulu ali nakuota tuhia, uamutalele ntooma, kaha uahandekele kuli ikeye nguendi, "Nove vene, uakele na Yesu uaku Nazaleta."

68 Vuno honi uavianene nguendi, "Kunjimuzivuka, kaha kunjivu vika uli nakulumbununa," kaha uatuhukile nakuya.

69 Kaha uje ngamba ua mpuevo uamumuene kaha naua ualekesele vaje vemanene nendi nguendi, "Ou yala nendi vene umo uavo!" 70 Vuno honi Petulu uavianene naua.

Ha kantsimbu kakandende lika vaje vemanene kuje vahandekele kuli Petulu naua nguavo, "Cilivene nove u umo uavo, muomu u Kangalileya."

71 Vuno honi Petulu uaputukile kuhandeka visingo hali ikeye vavenia nguendi, "Njilisinga nguange kunjimuzivuka ou yala muli nakuhandeka!"

72 Kaha hajevene ndemba uatambekele lua mu civali, kaha Petulu uavulukile vije viahandekele Yesu kuli ikeye nguendi, "Ntsimbu kanda ndemba atambeke luvali, ukanjiviana lutatu nguove ku unjizivuka." Kaha ualilile.