1 Omo Sapalalo yahitile, Maliya Mangandalena, na Maliya vaina ya Yakomba, na Salome, kaha valandele mazi a seho a luengo luacili linga vakavuavese muvila ua Yesu. 2 Omo capuile cimene mene ca litangua liakulivanga ha calumingu vayile ku cihilo omo litangua liatuhukile. 3 Kaha vahandekele kuli umo na mukuavo nguavo, "Nkuma iya honi akasa kukatuhumisila lije livue liakulema lije lili ku cikolo ca cihilo?" 4 Vuno honi omo vatalele kulutue, vamuene lije livue liakama valihumisako. 5 Omo vakovelele mu cihilo, vamuene yala natumama ku cilio, nazala kazaku ka kutoka, kaha valikomokelele.

6 Kaha uahandekele kuli vakevo nguendi, "Keti muli komokele, mulina kutonda Yesu ua Nazaleta, uje ivashukikile. Nasanguka, uahimo mu cihela muva mutsindile. 7 Vuno honi yeni, mukaleke vandongisi vendi na Petulu ngueni alivanga kulutue lueni ku Ngalileya, kuje mu kamumona ngue muje muamilekele."

8 Kaha vahuminemo mu cihilo na liova, nakujaja nakulikomokela, kaha na cimo cahi civahandekele ku muntu uoshe, muomu vateuele.

9 Honi omo Yesu uasangukile ha litangua liakulivanga musondo, ha kulivanga ualisholuele kuli Maliya Mangandalena, uje yahumisile mahamba vatanu na vavali. 10 Kaha Maliya Mangandalena uayile nakuleka vaje vakele navo, vaje vakele na vusiua na kulila. 11 Vuno honi omo vovuile nguavo ali nakuyoya kaha namumono, kuvamutsilielele.

12 Hanima yeci Yesu ualisholuele mucifua ceka naua kuli vamo vantu vavali, vaje vakele nakuhuma mu nganda. 13 Kaha vahilukile nakuleka voshe, vuno honi kuvavatsilielele.

14 Hanima yevi Yesu ualisholuele kuli vandongisi vendi likumi na umo omo vatumanene ku mesa, kaha uavatenukilile muomu hakuhona lutsilielo na kukola ca mitima yavo, muomu kuvatsilielele vaje vamumuene tele nasanguka. 15 Uahandekele kuli vakevo nguendi, "Yeni mu cifuti coshe nakuambulula Muzimbu Uacili ku vantu voshe. 16 Uoshe uje atsiliela nakumumbuitika akovoka, vuno honi uje katsiliela vakamuhisa. 17 Kaha vimueso vikakala na vaje vakatsiliela mu lizina liange, vakahumisa mahamba kaha vakahandeka na mu vindaka vieka, 18 vakakuata manoka, kaha cipue vakanua cuma ca kutsiha ku cikavavulumuna, vakasaleka mavoko avo hali vaka kuvavala, kaha vaka kanguka."

19 Hanima yakuhandeka navo, Muene Yesu vamutualele muilu, nakutumama ku livoko lia cilio lia Njambi. 20 Vandongisi vayile nakuambulula kuoshe, kaha Muene uapangele navo nakushulisa mezi a vimueso vije vivalingile. Ameni.