1 Ambahoni Yesu uahumine kuje nakuya kucihela ca ku Yundeya na kutuvakana Yundau, kaha vivunga via vantu viakungulukile kuli ikeye naua, kaha naua, kuya ku kapandi kendi, uavalongesele.

2 Vafaliseho vezile nakumueseka kaha vamuihuile nguavo, "Nkuma capua lishiko yala kukondola mpueyendi ndi?"

3 Yesu uavakumbuluile nguendi, "Nkuma Mosesa ua mishikile vika?"

4 Vahandekele nguavo, "Mosesa uatavesele yala kusoneka mukanda uakukondola, na kumulekesa linga aye kuimbo liavo."

5 Vuno honi Yesu uahandekele kuli vakevo nguendi, "Hakukola ca mitima yeni mukemo uamisonekelele eli lishiko. 6 Vuno honi hume hakuputuka ca kutanga, ‘Njambi uavatangele yala na mpuevo.’ 7 Muomu ya cuma eci yala akaseza vaishe na vaina naku kalipandakana na mpueyendi, 8 kaha vaje vavali vakapua muvila umo. Nankuma kuvakapu vavali vuno honi muvila umo. 9 Cije Njambi napandakana hamo naumo muntu uahi napande kucihangununa."

10 Omo vakele mu njivo, vandongisi va Yesu vamuihuile naua ha cimpande eci. 11 Yesu uahandekele nguendi, "Uoshe akondola mpueyendi nakuambata ueka, alinga vupangala. 12 Mucifua cimo vene nga mpuevo akondola yaliendi nakukashomboka kueka, kaha nalingi vupangala."

13 Vantu vakele nakuneha vanike kuli Yesu, linga a vakuate kaha vandongisi vendi vavatenukilile. 14 Vuno honi omo Yesu uacimuene uanienguele, kaha uahandekele kuli vakevo nguendi, "Eceleni vanike vavandende veje kuli yange, keti muvavindike, muomu Vumuene vua Njambi vunapu vuavo. 15 Cilivene njihandeka kuli yeni, uoshe uje katambula Vumuene vua Njambi ngue muanike uamundende ka kavukovela." 16 Kaha uavambatele mu mavoko endi na kuvakuisula nakuvasaleka mavoko endi.

17 Omo Yesu uakele nakuya mu vungenzi vuendi, yala uashatukile na kuija na kutsikama ha mavuli kuli ikeye, na kumuihula nguendi, "Mulongisi uacili, nkuma njilinge vati linga njikasuane muono uayaye?" 18 Yesu uahandekele kuli ikeye nguendi, "Vika unjitumbuila nguove njiuacili? Naumo uahi muntu uacili kuvanga Njambi lika. 19 Uazivuka mashiko aje ahandeka nguauo, ‘Keti utsihe, keti ulinge vupangala, keti uive, keti uhane vukaleho vua makuli, keti ukuise, singimika vaisho na vanoko.’"

20 Kaha uahandekele kuli ikeye nguendi, "Mulongisi, vioshe evi njaviniungu hume ku vuanike vuange."

21 Yesu omo uamutalele kaha uamuzangele, kaha uahandekele kuli ikeye nguendi, "Uahonoua cuma cimo, ya, ukalandese viuli navio vioshe, ngeci ukavihane ku vihutu, kaha ukakala na vufuko muilu, kaha ija, linga unjikave." 22 Omo uevuile evi uakotamesele cihanga cendi, kaha uayile na vusiua, muomu uakele na vufuko vuavuingi.

23 Yesu uatalele talele, kaha uahandekele kuli vandongisi vendi nguendi, "Capua cacikalu kuli vaje vaka kufuka kukovela mu Vumuene vua Njambi!"

24 Kaha vandongisi vendi vakomokele ha mezi endi. Vuno honi Yesu uahandekele kuli vakevo naua nguendi, "Vana vange, cacikalu vati kukovela mu Vumuene vua Njambi! 25 Cacasi kamelu kukovela mu lisho lia nguya kupulakana muka kufuka kukovela mu Vumuene vua Njambi."

26 Kaha valikomokele cikuma, vahandekele kuli ikeye nguavo, "Nkuma iya honi akovoka?"

27 Yesu uavatalele kaha uahandekele kuli vakevo nguendi, "Ku vantu cacikalu, vuno honi keti kuli Njambi, muomu viuma vioshe viaviasi kuli Njambi."

28 Petulu uaputukile kuhandeka kuli ikeye nguendi, "Tala, tuaseze viuma vioshe nakukukava."

29 Yesu uahandekele nguendi, "Cilivene," njimileka nguange, "naumo uahi naseze njivo cipue vamunaina va vamala cipue vamunaina va vampuevo cipue vaina cipue vaishe cipue vanike cipue mehia muomu yange na Muzimbu Uacili, 30 iya kakatambula cihita mu ntsimbu ino, na vinjivo, na vamunaina va vamala, na vamunaina va vampuevo, na visemi va vampuevo, na vanike, na mehia, na mapakeso, na mu miaka ije ikeja ya muono uayaye. 31 Vuno honi vavengi vaje vakulivanga vakapua vakukotokela, kaha vakukotokela vakapua vakulivanga."

32 Yesu na vandongisi vendi vakele mu vungenzi vuakuya ku Yelusalema, kaha Yesu uakele na kuvatuamenena kulutue, vandongisi vendi valikomokelele navaje vamukavele vovuile liova. Vambatele naua vaje likumi na vavali, uaputukile kuvaleka vije vikalingiua kuli ikeye. 33 Uahandekele nguendi, "Taleni, tulina kukanduka ku Yelusalema, kaha Muna Muntu vakamuhana ku vakuluntu va tutasesondote na valongisi va mashiko kaha vaka muhisa na kumutuala kukutsa, na kumuhana kuli vaje keti Vayunda, 34 kaha vaka mushendumuna, na kumujekuila, na kumupupa, na kumutsiha kaha hanima ya matangua atatu vaka musangula."

35 Kaha Yakomba na Yiuano, vana va Zembendeo, vezile kuli ikeye, kaha vahandekele kuli ikeye nguavo, "Mulongisi, tutonda utulingile vioshe vije tulomba kuli yove."

36 Kaha uahandekele kuli vakevo nguendi, "Nkuma vika vimutonda kuli yange kumilingila?" 37 Vahandekele kuli ikeye nguavo, "Tutavese linga tutumame umo ku livoko liove liacilio mukuavo kulia cimoshue mu vumpau vuove."

38 Vuno honi Yesu uahandekele kuli vakevo nguendi, "Kumuazivukile vika vije vimuli nakulomba. Nkuma muasa kunua nganja ije njinua, cipue kumimbuitika mu cimbuitikilo civanjimbuitikile naco ndi?"

39 Kaha vahandekele kuli ikeye nguavo, "Tuasa." Yesu uahandekele kuli vakevo nguendi, "Nganja ije njinua, neni mukainuina, kaha na cimbuitikilo cije vanjimbuitikile naco, cikeco neni vakamimbuitika naco, 40 vuno honi kutumama ku livoko liange lia cilio cipue lia cimuoshe keti yange kutava, vuno honi viavaje vavanavuahesela."

41 Kaha omo vaje vandongisi likumi vevuile eci, vanienguelele Yakomba na Yiuano. 42 Yesu ua vasanene veje kuli ikeye kaha uahandekele kuli vakevo nguendi, "Muazivuka ngueni vaje vanapandele kuyula vaje keti Vayunda valiyongola nguavo vali na nzili hali vantu vavo, kaha naua vantuama vavo vali na nzili yakama hali vakevo. 43 Vuno honi ku cikafu ngoco hakati keni, vuno uoshe uje atonda kupua uakama hakati keni napande kupua ngamba yeni voshe. 44 Kaha naua uoshe atonda kupua ua kulivanga hakati keni napande kupua ndungo ua voshe. 45 Muomu Muna Muntu kezile mukumupangela vuno honi mukupanga, nakuhana muono uendi linga apatule vantu vavengi."

46 Yesu na vandongisi vendi vahetele ku Yeliko, kaha omo uakele nakuhumamo na vandongisi vendi na civunga cakama ca vantu, Mbatimeo, uje kapuputua mukakulomba, muna Timeo uatumamene kumukulo ua ngila. 47 Omo uovuile nguavo Yesu uaku Nazaleta, kaha uaputukile kutambeka nguendi, "Yesu Muna Ndaviti, njivuileko cikeketima!"

48 Kaha vantu vavengi vamuvindikile, vamulekele nguavo aholoke, vuno honi uatambekele cikuma nguendi, "Muna Ndaviti, njivuileko cikeketima!"

49 Yesu uemanene kaha uahandekele nguendi, "Musaneni."

Kaha vamusanene uje kapuputua, vahandekele kuli ikeye nguavo, "Simpa, katuka, alinakukusana."

50 Mbatimeo uombilile vuzalo vuendi kaha uemanene nakuya kuli Yesu.

51 Yesu uahandekele kuli ikeye nguendi, "Vika utonda linga njikulingile?"

Uje yala uakapuputua uahandekele kuli ikeye nguendi, "Muene, njitonda njimone."

52 Yesu uahandekele kuli ikeye nguendi, "Ya, lutsilielo luove lua kukanguisa."

Kaha hajevene uatonene kaha uaputukile na kumukava.