1 Kuputuka kua Muzimbu Uacili ua Yesu Kilistu, Muna Njambi.

2 Ngue mu muje vacisoneka kuli kananguizi Isaya nguavo,

"Taleni, ‘Njikatuma kanganda kange kulutue luove,

uje akavuahesa ngila yove.’

3 ‘Lizi liaumo ali nakutambeka mu mpambo,

vuaheseni ngila ya Muene,

sungameseni ngila yendi!’"

4 Kaha Yiuano muka kumbuitika uasholokele mu mpambo, uambuluile kumbuitika ca kutenguluka ca kukonekela ku vupi. 5 Kaha vantu voshe vayile kuli ikeye, vaje vahumine mu cifuti ca Yundeya, na vantu voshe va mu Yelusalema, valitavelele vipi viavo kaha vavambuitikile kuli ikeye mu Ndonga ya Yundau.

6 Kaha Yiuano uazalele vuzalo vua kupanga ha maka a kamelu, na muiva ua cilambu mu mbunda yendi, naua uakele nakulia vambimba na vuci. 7 Kaha uambuluile nguendi, "Munima yange muli nakuija uje ali na nzili kupulakana yange, cipue miva ya vinkaku viendi kunjasa kukotama na kuizitula. 8 Njamimbuitika na mema, vuno honi ikeye akamimbuitika na Cimbembesi Cakulela."

9 Ha matangua aje, Yesu uahumine ku Nazaleta cifuti camu Ngalileya, kaha vamumbuitikile kuli Yiuano mu ndonga ya Yundau. 10 Kaha omo Yesu uahumine mu mema, hajevene uamuene melu ashokoloka, kaha Cimbembesi uashulukilile hali ikeye mucifua ca livembe. 11 Kaha lizi liahumine muilu ngualio, "U Munange injazanga, muli yove njivuahelela."

12 Hajevene Cimbembesi ua mutualele mu mpambo. 13 Kaha uakele mu mpambo matangua makumi auana, mukumueseka kuli Satana. Uakele nakuyoya na vikashama kaha tungelo vamusimpisile.

14 Hanima yakukuta Yiuano, Yesu uayile ku Ngalileya, mukuambulula Muzimbu Uacili ua Njambi, 15 kaha uahandekele nguendi, "Ntsimbu inalishulisisa, Vumuene vua Njambi vuli muyehi, tengulukeni, kaha tsilieleni mu Muzimbu Uacili."

16 Kaha omo uakele nakuhita kumukulo ua cisali ca Ngalileya, uamuene Simoni na munaina Anduleo valinakuta manda avo mu cisali, muomu vapuile vakakuta vantsi. 17 Omo Yesu uahandekele kuli vakevo nguendi, "Njikaveni njimipuise vakakuta vantu." 18 Hajevene vasezele manda avo kaha vamukavele.

19 Kaha omo uatualeleleho kuenda, uamuene Yakomba muna Zembendeo na Yiuano munaina, vaje vakele mu vuato vuavo nakutungulula manda avo. 20 Hajevene uavasanene kaha vasezele ishavo Zembendeo mu vuato hamo na vangamba vaje va vakumuine, kaha vamukavele.

21 Yesu na vandongisi vauana vayile ku Kapenauma, kaha omo liapuile lia Sapalalo uakovelele mu njivo ya malombelo na kulongesa. 22 Kaha vakomokele hakulongesa cendi, muomu uavalongesele ngue uje ali na nzili yakama, keti ngue muvakalongesela valongisi va mashiko.

23 Hajevene mu njivo ya malombelo muakele yala uje uakele na cimbembesi cacipi, 24 kaha uatambekele nguendi, "Utonda vika kuli yetu, Yesu ua ku Nazaleta? Uneja nakutunongesa ndi? Njakuzivuka yove uje Umo Uakulela ua Njambi." 25 Kaha Yesu uamutenukilile nguendi, "Holoka kuluu, huma muli ikeye!" 26 Kaha cimbembesi cacipi ca mupindisile, nakulila na lizi liakutambeka, kaha cahumine muli ikeye. 27 Kaha vantu voshe valikomokelele, nakulihozola umo na mukuavo nguavo, "Nkuma cika eci? Cilongesa caciha! Na nzili yakama asa kushika cipue cimbembesi cacipi, kaha cimuononoka."

28 Kaha hajevene lutsimo luendi lua tsimanene ku mitambela yoshe ya kuzenguluka Ngalileya.

29 Hajevene Yesu uahumine mu njivo ya malombelo, kaha uakakovelele mu njivo ya Simoni na Anduleo, hamo na Yakomba na Yiuano. 30 Honi vainamueno ya Simoni vakosele muomu vakele nakuvavala lisika sika, kaha hajevene valekesele Yesu kuvavala cendi. 31 Kaha uezile nakumukuata ku livoko, uamuhinduile, kaha masika sika amuecelele, uaputukile kuvapangela.

32 Kaha ku cinguezi, omo litangua lia lahukile Yesu vamunehelele voshe vaka kuvavala na vaje vakele na mahamba. 33 Kaha vantu voshe va mu nganda valikunguluile hamo ku cikolo. 34 Yesu uakanguisile vavengi vaka kuvavala mishongo yakuliseza seza, nakuhumisa mahamba amengi, kaha katavesele mahamba kuhandeka, muomu amuzivukile.

35 Kaha ku cimene mene Yesu uahindukile, nakuya ku cihela calikaliendi lika nakulombela. 36 Kaha Simoni na vaje vakele nendi, vamukavele nakumutonda, 37 Vamu uanene kaha vahandekele kuli ikeye nguavo, "Muntu uoshe alinakukutonda." 38 Kaha Yesu uahandekele kuli vakevo nguendi, "Tuyeni ku vinganda via kulihata, linga naua njikambulule Muzimbu nakuje, muomu eci cikeco cinjezilile."

39 Kaha uayile muoshe mu Ngalileya, nakuambulula Muzimbu Uacili mu vinjivo via malombelo avo nakuhumisa mahamba.

40 Kaha uje yala uakele na mbumba uezile kuli Yesu nakumulambelela, uatsikamene nakuhandeka kuli ikeye nguendi, "Nga utonda, njipuise uakulela."

41 Yesu hakuvua ngozi, uoluele livoko liendi na kumukuata, nakuhandeka kuli ikeye nguendi, "Njitonda, lela." 42 Hajevene mbumba ya holele, kaha uapuile uakulela. 43 Uamunanguile cikuma, nakumuleka linga aye vuasi vuasi, 44 nakumuleka nguendi, "Keti uhandeke cuma cimo kuli uoshe, vuno honi ya, linga ukalimuese yove vavenia kuli kasasendote, kaha ukahane nkombelo ije Mosesa uashikile ha kulela cove linga ipue vukaleho ku vantu."

45 Vuno honi uayile nakuhandeka oku nazituka, kaha Muzimbu uashanduokelele kuoshe, linga Yesu keti akovela mu nganda citona muelu, vuno honi uayile ku mitambela yeka ya cifuti, kaha vantu vakele nakuija kuli ikeye mu vintsimbu.