1 Omo Yesu na vandongisi vendi vatondele kuheta kuyehi na Yelusalema, ku Mbetefanje na Mbetaniya, ku munkinda ua Oliveta, uatumine vandongisi vendi vavali, 2 kaha uahandekele kuli vakevo nguendi, "Yeni ku limbo lije lili kulutue lueni, kaha omo mu kakovelamo mukauana muna cimulu ivanakutu, uje kanda vacimulondeho laja, kaha muzituleni mumunehe kuno. 3 Nga umo ahandeka kuli yeni nguendi, ‘Nkuma vika mulingila eci?’ handekeni ngueni, ‘Muene alina kumutonda kaha tumuhiluisako naua mualolo.’"

4 Vayile, nakuuana muna cimulu vanamukutilila ku cikolo mu ngila, kaha vamuzituile. 5 Vaje vemanene kuje vahandekele kuli vakevo nguavo, "Nkuma vika mulinga kuli ou muna cimulu?"

6 Kaha vavalekele muje muavalekelele Yesu, kaha vavecelele vayile nendi. 7 Vanehele uje muna cimulu kuli Yesu, kaha vajalele vuzalo vuavo hali uje muna cimulu, kaha Yesu uatumameneho. 8 Vavengi vajalele vintanga viavo mungila, vamo vajalele maputa a mintango ije vatetele ku mehia avo. 9 Kaha vaje vakele kulutue navaje vakele nakukavangeya munima vakele nakutambeka nguavo, "Hosana! Uakukuisula uje eja mu lizina lia Muene! 10 Vuakukuisula vumuene vua tatetu Ndaviti vuje vuli nakuija! Hosana ua muilu mulahako!"

11 Yesu uakovelele mu Yelusalema, nakukakovela mu njivo ya Njambi, kaha omo uatalele talele ku vioshe, naua omo tele kuatoko laja, kaha uayile ku Mbetaniya hamo na vandongisi vendi likumi na vavali.

12 Liamukuavo, omo vahumine ku Mbetaniya, kaha Yesu uatsile njala. 13 Kaha uamuene muti ua mukuyu uje uakele kulahako uje uakele na maputa, kaha uayileko nguendi hamo akauanako vushuka. Omo uahetele kuli ukeuo, kauaneneko vushuka vuno honi maputa lika, muomu kuyapuile ntsimbu ya vushuka. 14 Kaha uahandekele kuli ukeuo nguendi, "Naumo uahi muntu akalia vushuka kuhuma kuli yove naua." Kaha vandongisi vendi vovuileko.

15 Omo Yesu na vandongisi vendi vahetele ku Yelusalema nakukovela mu mbalanda ya Njivo ya Njambi, kaha uaputukile kusheka vaje vakele na kulandesa na kulandulula mu mbalanda ya Njivo ya Njambi, kaha uafulumikile vimesa via vaje vakele na kulandulula vimbongo na vituamo via vaje vakele na kulandesa mavembe. 16 Yesu katavesele naumo uahi kuambata cuma mu Njivo ya Njambi. 17 Kaha uavalongesele, nakuhandeka kuli vakevo nguendi, "Nkuma ku vacisonekele nguavo, ‘Njivo yange ikapua Njivo ya malombelo ya vaka mafuti oshe ndi?’ Vuno honi muaipuisa cihela ca vezi."

18 Vakuluntu va vasasendote na valongisi va mezi a mashiko vacuvuile kaha vatondele ngila ya kumutsihilamo, vamuteuele, muomu civunga coshe cakomokele ha vilongesa viendi.

19 Omo cinguezi cahetele, Yesu na vandongisi vendi vahumine mu nganda.

20 Liamukuavo cimene omo Yesu na vandongisi vendi vahitile, vamuene uje muti ua mukuyu unomu naku mizi. 21 Petulu uavulukile kaha uahandekele kuli Yesu nguendi, "Muene, tala! Uje muti ua mukuyu u uasingile unomu."

22 Yesu uavakumbuluile nguendi, "Kaleni na lutsilielo muli Njambi. 23 Cilivene njimileka nguange, uoshe ahandeka kuli ou munkinda nguendi, ‘Katuka uliumbile mu cisali,’ kaha nga kalikanouela mu mutima uendi, vuno honi atsiliela nguendi vioshe ahandeka vikalingiua, kaha vaka mu lingilavio. 24 Nankuma njimileka nguange, vioshe mulomba mu lilombelo, tsilieleni ngueni muavitambula laja, kaha vikapua vieni. 25 Ntsimbu yoshe uimana nakulombela, konekela mukueni nga uli nacimo nendi, linga ishueni ali muilu akamikonekele ku milonga yeni. 26 Vuno honi nga kumukonekela, kaha na ishueni ua muilu kakamikonekela ku milonga yeni."

27 Yesu na vandongisi vendi vezile naua ku Yelusalema. Kaha omo uakele nakuenda mu mbalanda ya njivo ya Njambi, vasasendote vakama, navalongisi va mezi a mashiko, na vakuluntu vezile kuli ikeye, 28 kaha vahandekele kuli ikeye nguavo, "Nzili yakama muka uli na kulikuasesa hakulinga viuma evi, cipue iya uakuhanene nzili yakama linga ulinge evi?"

29 Yesu uahandekele kuli vakevo nguendi, "Njimihula cihula, kaha munjikumbulule, kaha njimileka ha nzili yakama njili nakulikuasesa hakulinga evi viuma. 30 Cimbuitiko ca Yiuano cahumine muilu indi ku vantu? Njikumbululeni."

31 Kaha valingile vimpata umo na mukuavo nguavo, "Nga tuhandeka nguetu, ‘Cakuhuminine muilu,’ kaha akahandeka nguendi, ‘Vika honi muateuele ku mutsiliela?’ 32 Vuno honi nga tuhandeka nguetu, ‘Cahuminine ku vantu?’" Vateuele vantu, muomu voshe vazivukile nguavo Yiuano uapuile kananguizi ua vusunga. 33 Kaha vakumbuluile Yesu nguavo, "Kutuzivuka."

Kaha Yesu uavakumbuluile nguendi, "Cipue yange vene kunjimileke nzili yakama njilinakulinga nayo viuma evi."