1 Omo Yesu uahumine mu njivo ya Njambi, kaha umo ua vandongisi vendi uahandekele kuli ikeye nguendi, "Tala, Mulongisi, kuvuaha ca mavue aua na kuvuaha ca vinjivo evi!" 2 Yesu uahandekele kuli ikeye nguendi, "Nkuma uli nakumona evi vinjivo viakama ndi? Na limo liahi livue likasalaho helu lia likuavo, oshe vaka ombila kuti."

3 Omo Yesu uatumamene ha munkinda ua Oliveta musinia lia njivo ya Njambi, Petulu na Yakomba na Yiuano na Anduleo vamuihuile kualikaliavo nguavo, 4 "Tuleke eci cikalingiua ntsimbu muka, nkuma cimueso muka cikalingiua omo vioshe evi vikalingiua?"

5 Yesu uaputukile kuhandeka kuli vakevo nguendi, "Zangameni linga keti umo akamikuise. 6 Vantu vavengi vakeja mu lizina liange nakuhandeka nguavo, ‘Yange vene Kilistu!’ Kaha vakakuisa vantu vavengi. 7 Omo mukevua vinzita na muzimbu ua vinzita, keti mukakomoke, evi vinapande kusholoka, vuno honi keti kukotoka ca mavu. 8 Muomu cifuti cikatengulukila cifuti cikuavo, vumuene vukatengulukila vumuene vukuavo, kukakala mandunduma ku mitambela yakuliseza seza, ku kakala njala yakama. Evi vinapu ngue kuputuka ca mushongo uakusema.

9 "Vuno honi liniungeni yeni vavenia, muomu vakamituala ku vaka mpunga na kumisompa, kaha vakamipupa mu vinjivo via malombelo, kaha mukemana ha mesho a vanguvulu na vimiene muomu yange, ngeci muhane vukaleho ku mesho avo. 10 Vuno honi Muzimbu Uacili munapande ku uambulula tahi ku mafuti oshe. 11 Omo vakamineha ku kumisompa, na kumikuata keti mukateue vimukahandeka. Vuno honi mukahandeke vije vioshe vije vakamihana ha ntsimbu ijevene, muomu keti yeni muka vihandeka, vuno honi Cimbembesi Uakulela. 12 Muntu akenda munaina vungungu naku mutuala kukutsa, kaha ishe akalinga ngoco na munendi, kaha vana vakatengulukila visemi viavo naku vatsihisa, 13 voshe vakamizinda muomu yange. Vuno honi uoshe akatualelaho na kumamanusuilo akovoka.

14 "Vuno honi nga mukamona cimueso ca shuamua ca kukomouesa cije cikaneha kunonga cinemana kuje kucapandele kuimana." (Muka kutanda ovuisise), kaha vaje vali mu Yundeya vateuele ku minkinda, 15 uoshe uje ali helu lia njivo keti ashuluke ha mavu, cipue kukovela mu njivo yendi, linga ambate cuma, 16 uoshe uje ali mu lihia keti ahiluke kunima nakuambata cikovelo cendi. 17 Caluvinda kuli vaje vakemita na kuli vaje vakajamuesa mu matangua aje! 18 Lombeleni linga keti cikalingiue mu cisika. 19 Muomu ha matangua aje kukakala tuyando tuje kutuakeleko hume ha kutanga ca mavu aje Njambi uatangele kuheta na ntsimbu ino, kaha kutukakalako naua. 20 Nga Muene kakehesele matangua, nga na muntu uahi akovoka, vuno honi muomu ya vantu vendi vaje vahanguile, uakehesele ku matangua.

21 "Ambahoni ntsimbu ije nga kukakala umo akamileka nguendi, ‘Taleni, Kilistu uno!’ cipue nguavo, ‘Taleni, uje ali kuje!’ Keti mutsiliele. 22 Muomu kukasholoka Vakilistu va makuli na tunanguizi va makuli nakulinga vimueso na vikomoueso linga vamizimbalese, nga casiua vazimbalese navaje vanahangula. 23 Vuno honi zangameni njamileke viuma vioshe ntsimbu kanda ihete.

24 "Vuno honi ha matangua aje hanima ya tuyando, litangua likazivala, kaha ngonde kuikatu ceke, 25 na vintanga ntanga vikaua kuhuma muilu, na lilu likaninganga. 26 Kaha vakamona Muna Muntu eja mu mashelua, na nzili yakama na vumpau. 27 Ambahoni akatuma tungelo vendi nakukungulula vantu vendi vaje vahanguile mu vimbango viuana, kuhuma ku mamanusuilo a mavu nakumamanusuilo a melu.

28 "Lilongeseni cilongesa ca muti ua mukuyu, omo mintango ituikilila na kuhaka maputa, kaha muazivuka ngueni ntondue ili muyehi. 29 Mucifua cimovene omo mumona viuma evi vilingiua, kaha muzivuke ngueni Muna Muntu ali muyehi, ku cikolo. 30 Muavusunga njimileka nguange, vantu ava vali nakuyoya ntsimbu ino kuvakatsi kuvanga viuma vioshe evi vinalingiua. 31 Melu na mavu vioshe vikahua, vuno honi mezi ange ku akahu.

32 "Vuno honi naumo uahi azivuka litangua cipue ntsimbu, cipue vene tungelo va muilu, cipue Muana, vuno honi Tate lika. 33 Nangukeni, taleleleni, muomu ku muzivuka ntsimbu muka akeja. 34 Cinapu ngue yala uje nayi mu vungenzi, kaha omo ahuma hembo aseza vangamba vendi linga vaniunge, umo na umo na vipangi viendi, nakushika muka kuniunga ku cikolo linga atalelele. 35 Nankuma taleleleni, muomu kumuziva ntsimbu muka ije vavenia njivo akeja, indi ku cinguezi, cipue mukati ka vutsiki, cipue ha vandemba cipue ku cimene. 36 Nga eja vuasi keti akumiuane muakosa tulo. 37 Kaha evi vinjimileka vikevio vinjileka naku voshe nguange, taleleleni!"