1 Yesu uaputukile kuhandeka kuli vakevo mu visimo nguendi, "Yala uakunine lihia lia viniu, kaha uazinguluisileko cipatanga, kaha uahindile cina ca kukamuinamo viniu, naua uatungile kaposhi, nakusezela vaka kupanga, kaha uayile ku cifuti ceka. 2 Omo ntsimbu yakuteja yahetele, uatumine ngamba kuli vaka kupanga, linga vambateko vumo vushuka mu lihia lia viniu. 3 Kaha vamukuatele na kumupupa, nakumusheka mavoko voko. 4 Kaha naua uatumine mukuavo ngamba, kaha vamuvulumuine ku mutue, nakumulinga muashuamua. 5 Uatumine mukuavo, na ikeye vamutsihile, kaha navakuavo veka naua vavalingile muje vene, vamo vavapupangele vamo vava tsihile. 6 Kaha kuasalele umo, muana ua yala yazangele, ha mamanusuilo uamutumine munendi kuli vakevo, nakuhandeka nguendi, ‘Vakasingimika munange.’ 7 Vuno honi vaje vaka kupanga vahandekele kuli umo na mukuavo nguavo, ‘Ou ikeye muna vavenia lihia, ijeni, tumutsihe, kaha vufuko vupua vuetu.’ 8 Vamukuatele nakumutsiha, nakumumbila musinia lia lihia lia viniu."

9 Ambahoni Yesu uavehuile nguendi, "Vika honi, viakalinga uje vavenia lihia lia viniu?" Kaha vamukumbuluile nguavo, "Akeja nakutsiha vaka kupanga, nakuhana lihia lia viniu ku vantu veka. 10 Nkuma kumuatandele evi visoneka ndi?

‘Livue lije vaka kutunga vavianene

likelio linapu cisimi ca mumbango,

11 eci cikeco calingile Muene,

kaha cinapu cakukomokesa kuli yetu!’"

12 Kaha vesekele linga vamukute, vuno honi vateuele civunga ca vantu, muomu vasinganiekele nguavo nahandeka cisimo eci kuluisa vakevo, kaha vamusezele nakuya.

13 Vafaliseho vamo na vamo vaka mpunga ya Helonde vavatumine ngeci vaye nakukuata Yesu kuya kuvihandeka viendi. 14 Kaha vezile nakuhandeka kuli ikeye nguavo, "Mulongisi, tuazivuka nguetu uapua ua vusunga, kaha ku uekuteua muntu uoshe muomu ku uekutala muntu muafuilamo, vuno honi ukalongesa muavusunga ngila ya Njambi. Nkuma capandemo kufueta lisimu kuli Sezale, indi houe?"

15 Tuvafuete indi keti tuvafuete? Vuno honi Yesu hazivuka civembulu cavo, uahandekele kuli vakevo nguendi, "Nkuma vika munjesekela? Njineheleni mbongo ya muuaya uaya, njiyitale."

16 Vanehele ije mbongo ya muuaya uaya. Kaha uahandekele kuli vakevo nguendi, "Nkuma cihanga na lizina lieya evi viliho?"

Vahandekele kuli ikeye nguavo, "Via Sezale."

17 Kaha Yesu uahandekele kuli vakevo nguendi, "Haneni Sezale vije viakundama kuli Sezale, na kuli Njambi vije viakundama kuli Njambi."

Kaha voshe vakomokele hali ikeye.

18 Vasanduki vezile kuli ikeye, vaje vakahandeka nguavo kukuesi kusanguka ku vatsi, kaha vamuihuile cihula nguavo, 19 "Mulongisi, Mosesa uatusonekelele nguendi, ‘Nga muanaye atsa kaha naseze mpuevo, vuno honi kasezele muana, uje yala napande kuambata uje mpuevo, linga asemeneko vana vaje vanapandele kusemenako ikeye.’ 20 Mulizimo liavo vapuile vatanu na vavali, uakulivanga uambatele mpuevo, kaha omo uatsile kasemeneneko muana, 21 Kaha ua mucivali uamuambatele, kaha nendi naua uatsile, kasemeneneko muana, na ua mucitatu na ikeye naua cifua cimo, 22 kaha voshe kuvasemeneneko vana. Kumamanusuilo uje mpuevo uatsile. 23 Nkuma hakusanguka uje mpuevo a kapua ueya? Muomu voshe vaje vatanu na vavali uapuile mpueyavo."

24 Yesu uahandekele kuli vakevo nguendi, "Nkuma ku muazivukile ngueni muapihisa, muomu kumuzivuka visoneka cipue nzili ya Njambi? 25 Muomu omo vakahinduka ku vatsi, kuvakambata cipue kushomboka, vuno honi vakapua ngue tungelo va muilu. 26 Honi ha kusanguka kuvatsi, nkuma kumuatandele mu livulu lia Mosesa, hali lije liputa, muje Njambi uahandekele kuli ikeye nguendi, ‘Yange Njambi ua Avilahama, na Njambi ua Isake, na Njambi ua Yakomba?’ 27 Keti Njambi uavakakutsa, vuno honi Njambi ua vakakuyoya, yove unapihisa."

28 Umo ua valongisi va mashiko uezile kaha ua vovuile valinga vimpata kuli umo na mukuavo, kaha hakumona ngeci Yesu uavakumbuluile muacili, vamuihuile nguavo, "Nkuma lishiko muka liakama cikuma ku mashiko oshe?"

29 Yesu uavakumbuluile nguendi, "Liakama cikuma linapu eli, ‘Ivuilila, Yove Isaleli! Muene Njambi yetu, uapua Muene umo, 30 kaha mukazanga Muene Njambi yeni na mitima yeni yoshe, na miono yeni uoshe, na mana eni oshe, na nzili yeni yoshe.’ 31 Lishiko lia mu civali linapu eli, ‘Zanga mukueni ngue muje mu ualizanga yove vavenia.’ Kukuesi naua lishiko liakama cikuma lipulakana aua."

32 Mulongisi ua mashiko uehuile Yesu nguendi, "Uahandeka vusunga Mulongisi, muavusunga vene, uapua umo lika, kaha kukuesi ueka Njambi kuvanga ikeye lika, 33 Munapande ku muzanga na mutima ueni uoshe, nakuvuisisa coshe, na nzili yoshe, nakuzanga mukueni ngue muje mu ualizanga yove vavenia, eci capulakana milambu yoshe ya kutsimika na vinkombelo."

34 Omo Yesu uamuene nguendi nakumbulula na mana, uahandekele kuli ikeye nguendi, "Kuuesi kulahako na Vumuene vua Njambi."

Kuhuma haje naumo uahi naua uamuhuile vihula vieka.

35 Omo Yesu uakele nakulongesa mu njivo ya Njambi, uahandekele nguendi, "Cijavati honi linga vaka kulongesa mashiko vahandeke nguavo Kilistu muna Ndaviti? 36 Ndaviti vavenia, vamuvuavesele na Cimbembesi Uakulela kaha uahandekele nguendi,

"‘Muene uahandekele kuli Muene yange nguendi,

tumama ku livoko liange lia cilio,

kuvanga noho njikahaka vitozi vove ku viliato viove.’

37 Ndaviti vavenia amusana nguendi ‘Muene,’ nkuma cipua vati honi linga apue munendi?"

Civunga ca vantu covuililile kuli ikeye nakuvuahelela. 38 Omo Yesu uakele nakulongesa uahandekele nguendi, "Zangameni kuli valongisi va mashiko, vaje vakayi nakuenda mu tuzaku tualaha linga vavasingimike ku vihela via kulandesela, 39 na vituamo viacili via mu vinjivo via malombelo na vihela via kasingimiko via ku viuano, 40 vaje vaka pihisa vinjivo via vantuluue mukulimuesa ha kulombela malombelo alaha. Vakatambula kashitiko kakapi cikuma."

41 Yesu uatumamene kuyehi na kuje kuvakalambuila milambu, kaha uakele nakutalelela vantu omo vakele na kuhaka vimbongo mu cikuama ca njivo ya Njambi. Vavengi vaka kufuka vakele nakulambuila vimbongo viavingi. 42 Vuno honi ntuluue uakuhutua uezile, kaha ualambuile tuuaya uaya tuvali tua vunengu tuatundende. 43 Yesu uasanene vandongisi vendi linga veje kuli ikeye, kaha uahandekele kuli vakevo nguendi, "Cilivene njimileka nguange, ou ntuluue uacihutu nalambula viavingi kupulakana voshe vaje vanalambula mu cikuama. 44 Muomu voshe vanalambuila kusetekesa na vufuko vuavo vuavuingi, vuno honi ikeye nalambuila kuya mukuhutua cendi kaha naua nalambuila vioshe vimbongo viakele navio, viaku muyoyesa mu vuyoye vuendi."