1 Yesu na vandongisi vendi vayile musinia lia cisali, ku cifuti ca Ngelasa. 2 Kaha omo uahumine mu vuato, ualiuanene na yala ha vihilo uje uakele na cimbembesi cacipi, 3 uakele nakukala ha vihilo, kaha naumo muntu uahi uasele kumukuta, cipue na malienge, 4 muomu lualuingi vakele nakumukuta na tukunju na malienge, vuno honi uakele nakuvatuzola malienge na kupokozola tukunju mu vimbazuvuila, kaha naumo uahi uakele na nzili ya ku muononuesa. 5 Vutsiki na mutania uakele ha vihilo na ha minkinda oku alila, nakulivetuesa ikeye vavenia na mavue.

6 Kaha omo uamuene Yesu kulahako, uashatukilile kuli ikeye na kumulemesa, 7 kaha ualilile na lizi liakutambeka nguendi, "Nkuma vika utonda kuli yange, Yesu, Muna Njambi ua Helu lia Vioshe? Njilomba mu lizina lia Njambi, keti unjiyandese." 8 Muomu uahandekele kuli ikeye nguendi, "Huma muli ou yala, yove cimbembesi cacipi!"

9 Ambahoni Yesu ua muhuile nguendi, "Yove iya?"

Kaha uamukumbuluile nguendi, "Yange civunga, muomu tuvavengi." 10 Kaha uamulambelele cikuma ngeci keti amusheke mu cifuti cije.

11 Nankuma kuakele vutanga vua vangulu vaje vakele na kulia kuje ku munkinda, 12 kaha vije vimbembesi viavipi via mulombele nguavio, "Tushekele kuje ku vutanga vua vangulu, linga tukakovele muli vakevo." 13 Kaha uavatavesele. Kaha vije vimbembesi viavipi viamuhumine, kaha viakovelele mu vutanga vua vangulu, nankuma vangulu voshe vapuile makulukazi avali, kaha vashatukile nakukakovela mu cisali muje muvakanongelelele.

14 Vaje tuniungi vateuele, kaha vakalekele vije vivamuene mu nganda na mu cifuti. Kaha vantu vezile nakumona vije vialingiuile. 15 Omo vezile kuli Yesu, vamuene uje yala uakele na vimbembesi viavipi natumama kuje, nazala muacili na mana acili anahiluka muli ikeye, yala uje uakele na vimbembesi viavingi viavipi, kaha vateuele. 16 Vaje vacimuene vakahandekele vije vialingiuile kuli uje yala uakele na vimbembesi viavipi naku vutanga vua vangulu.

17 Ambahoni vaputukile kulambelela Yesu linga ahume mu cihela cavo.

18 Omo uatondele ku kovela mu vuato, uje yala uakele na mahamba uamulambelele linga akale nendi.

19 Vuno honi Yesu ua vianene, kaha uahandekele kuli ikeye nguendi, "Ya kuimbo kuli vavusamba vove, ukavalekese via nakulingila Muene, nomu muanakela na cikeketima hali yove."

20 Nankuma uje yala uayile na kuputuka kuambulula mu Ndikapolisi (kulumbununa vinganda likumi) viuma vije viamulingilile Yesu. Kaha vantu voshe valikomokelele.

21 Omo Yesu uajavukile naua mu vuato kuya musinia lia cisali, civunga cakama ca vantu cakele nendi, kaha uakele ku cikuma ca cisali. 22 Ambahoni kuezile umo mukuluntu uamu njivo ya malombelo, lizina liendi Njailosi, omo uamuene Yesu uauililile ku viliato viendi, 23 uamulambelele nguendi, "Munange ua mpuevo alinakutonda kutsa. Ija ukamusaleke mavoko ove, linga akanguke na kuyoya."

24 Nankuma Yesu uayile nendi. Civunga cakama ca mukavele oku vamusindika.

25 Kaha kuakele mpuevo uakele na kuhita maninga ha miaka likumi naivali, 26 uje uayandele cikuma ku vimbanda, uapihisile viuma vioshe viakele navio, vuno honi kakangukile, vuno mushongo uendi uatualeleho kuya kuintsi cikuma. 27 Kaha omo uovuile lutsimo lua Yesu, uamukavele munima yendi mu civunga na kumukuata ku kazaku kendi. 28 Muomu uahandekele nguendi, "Nga njikakuata cipue lika ku kazaku kendi kaha njikakanguka."

29 Kaha hajevene aje maninga emanene, kaha uovuile mu muvila uendi nguendi nakanguka ku mushongo uendi. 30 Kaha Yesu uovuile nzili yahumine mu muli ikeye, kaha hajevene uatengulukilile ku civunga nakuhandeka nguendi, "Iya nakuata ku kazaku kange?"

31 Kaha vandongisi vendi vahandekele kuli ikeye nguavo, "Unamono civunga cili nakutusindika vuno honi uhandeka nguove, Iya nanjikuata ndi?"

32 Vuno honi Yesu uatalele talele linga amone uje ualingile eci. 33 Ambahoni uje mpuevo ha kuzivuka cije calingiuile kuli ikeye, uezile kuli Yesu na liova oku alina kujaja nakuuila ku viliato viendi, nakumuleka vusunga vuoshe. 34 Yesu uahandekele kuli ikeye nguendi, "Munange ua mpuevo, lutsilielo luove luakukanguisa, ya mu ciyulo kaha kanguka ku mushongo uove."

35 Omo tele Yesu acili nakuhandeka kaha kuezile vantu vaje vahumine ku njivo ya Njailosi uje uapuile ntuama ua njivo ya malombelo kaha vamo vahandekele nguavo, "Munove ua mpuevo natsi. Nkuma vika uyandesela Mulongisi naua?"

36 Vuno honi Yesu kahakeleko mana kuli vije viva handekele, kaha uahandekele kuli muka kuyula ua mu njivo ya malombelo nguendi, "Keti uteue, tsiliela lika." 37 Yesu katavesele muntu uoshe kumukava kuvanga lika Petulu na Yakomba na Yiuano munaina ya Yakomba. 38 Omo Yesu uahetele ku njivo ya muka kuyula ua njivo ya malombelo, uamuene vitanga, na vantu valila nakukangoka cikuma. 39 Kaha omo uakovelele, uahandekele kuli vakevo nguendi, "Nkuma vika mukangoka na kulila? Muanike katsile vuno honi nakosa tulo."

40 Kaha vamujolele. Vuno honi voshe uavatuhuisile hambanza, kaha uambatele vaishe na vaina ya muana na vandongisi vaje vakele navo, kaha vayile muje muakele uje kanike. 41 Yesu uakuatele uje muanike ua mpuevo ku livoko nakuhandeka kuli ikeye nguendi, "Talita kumi." Kulumbununa, "Muanike ua mpuevo, njihandeka kuli yove nguange hinduka."

42 Hajevene uje muanike ua mpuevo uahindukile na kuenda (uakele na miaka likumi na ivali), kaha voshe valikomokelele. 43 Kaha uavashikile cikuma nguendi, keti kukale cipue umo napande kuzivuka eci, kaha uavalekele vamuhane viakulia ngeci alie.