1 Yesu uatualeleleho kuhandeka nguendi, "Cilivene, njimileka nguange, kuli vamo vanemana hano kuvakatsi kuvanga noho vanamono Vumuene vua Njambi mu vuija na nzili."

2 Hanima ya matangua atanu na limo Yesu uambatele Petulu na Yiuano na Yakomba kaha vayile ku munkinda ualaha kua likaliavo, kaha Yesu uahimpukile ha mesho avo, 3 na vuzalo vuendi vua viazimine, nakutoka cikuma, kaha naumo uahi hano ha mavu asa kukusha kutokesa eci kupulakana muje. 4 Hakati kavo kuasholokele Eliya na Mosesa, vaje vakele nakuhandeka na Yesu. 5 Ambahoni Petulu uahandekele kuli Yesu nguendi, "Muene, muacili tuli hano, tutunge vintsingi vitatu, imo yove kaha ikuavo ya Mosesa na ikuavo ya Eliya." 6 Kazivukile viakele nakuhandeka, muomu vateuele cikuma.

7 Kaha mashelua avafuikile, na lizi lia huminine mu lishelua ngualio, "Ou ikeye Munange injazanga, muvuilileni." 8 Kaha hajevene omo vatalele kuvamuene cipue umo kuvanga Yesu lika.

9 Kaha omo vakele nakusikumuka kuhuma ku munkinda, uavashikile linga keti valekeko cipue umo ha viuma vije vamuene, kuvanga noho Muna Muntu akasanguka ku vatsi.

10 Kaha valiniungilile evi vimpande vakevo vavenia, nakulihuozola nguavo, "Kusanguka ku vatsi cilumbununa vika." 11 Kaha vamuihuile nguavo, "Muomu vika valongisi va mashiko vahandeka nguavo Eliya napande kulivanga kuija?"

12 Yesu uavakumbuluile nguendi, "Eliya alivanga kuija nakuhiluisa viuma vioshe evi, nkuma vacisoneka vati hali Muna Muntu, nguavo napande kuyanda mu viuma viavingi na kumuviana ndi? 13 Vuno honi njimileka nguange Eliya neja laja, kaha vamulingile muoshe muvatondelele, ngue muje vacisonekele hali ikeye."

14 Omo vezile kuli vandongisi vakuavo, vamuene civunga cakama cavazenguluka, kaha na valongisi va lishiko vakele nakulinga vimpata navo. 15 Hajevene omo civunga coshe ca mumuene calikomokelele kaha vayile kuli ikeye nakumumeneka. 16 Kaha Yesu uavehuile nguendi, "Nkuma vika mulina kulinga navo vimpata?"

17 Umo uavaje mu civunga uamukumbuluile nguendi, "Mulongisi, njinaneha munange ua yala kuli yove, muomu ali na cimbembesi ca vuveveve, 18 kaha hoshe hacimu uanena cimbembesi cacipi, cimuuisila ha mavu, kaha a huma lifulu ku kanua na kulishumanga ku mazo kaha ominina ngoo, njalombele vandongisi vove linga vacihumise, vuno honi vacihonouele kucihumisa."

19 Ambahoni Yesu uamukumbuluile nguendi, "Haa yeni cikota cakuhona lutsilielo, njikakala neni ha ntsimbu yakupua hali? Nkuma vintsimbu vingahi honi njinapande kuyanda neni? Munehe kuli yange!" 20 Vamunehele kuli ikeye, kaha omo cimbembesi cacipi camuene Yesu, hajevene capindisile uje muanike ua yala, kaha uauililile ha mavu nakulialumuna, nakuhuma lifulu ku kanua. 21 Yesu uehuile ishe nguendi, "Ntsimbu yakupua hali uaputukile?"

"Kaha uahandekele nguendi, kuputuka ku vuanike vuendi." 22 "Lualuingi cimbembesi cacipi cikamuuisila mu tuhia na mu mema, linga cimutsihe, vuno honi lingaho cimo, tuivuileko ngozi nakutukuasa."

23 Yesu uahandekele kuli ikeye nguendi, "Nga uasa! Viuma vioshe vinapu via viasi kuli uje atsiliela."

24 Hajevene ishe ya uje muanike uatambekele na kuhandeka nguendi, "Njitsiliela, njikuase yange uakuhona lutsilielo!"

25 Omo Yesu uamuene civunga cilinakuija hamo nakushatuka, kaha uatenukilile cije cimbembesi cacipi nakuhandeka kuli cikeco nguendi, "Yove cimbembesi cavuveve navusenda matuitui, njikushika, huma muli ikeye, kaha keti ukamuhilukile naua."

26 Cije cimbembesi catambekele nakumushiniisa muakama, kaha cahumine, uje muanike ua lezumukile, kaha vavengi vasinganiekele nguavo, "Natsi." 27 Vuno honi Yesu uamukuatele ku livoko naumukatula kaha uakatukile.

28 Kaha omo uakovelele mu njivo, vandongisi vendi vamuihuile mu vushueka nguavo, "Vika honi tuahonouelele ku cihumisa?"

29 Ambahoni Yesu uahandekele kuli vakevo nguendi, "Cifua ca cimbembesi eci kucasa kuhuma lika kuvanga na lilombelo."

30 Yesu na vandongisi vendi vahumine kuje kaha vatualeleho noho vahitile mu Ngalileya. Kaha Yesu katondele muntu umo linga azivuke kuje kuvaya, 31 muomu uakele nakulongesa vandongisi vendi nguendi, "Muna Muntu vakamuhana mu mavoko a vantu, kaha vakamutsiha, nga vanamutsihi, kaha hanima ya matangua atatu a kasanguka."

32 Vuno honi kuvevuisisile vije viahandekele, kaha vateuele kumuihula.

33 Yesu na vandongisi vendi vezile ku Kapenauma. Omo vakele mu njivo, Yesu uavehuile nguendi, "Vika munakala nakulingila vimpata mu ngila?"

34 Vuno honi vaholokele, muomu mu ngila vakele nakulinga vimpata nguavo iya uakama cikuma. 35 Yesu uatumamene nakusana vaje likumi na vavali, uahandekele kuli vakevo nguendi, "Nga uoshe atonda kupua uakulivanga, apue uakumanusuilila ku voshe na kupua ngamba ua voshe." 36 Kaha uambatele muanike, nakumuhaka mukati kavo, kaha uamuambatele mu mavoko endi, uahandekele kuli vakevo nguendi,

37 "Uoshe uje atambula muanike uamundende mu lizina liange natambula yange, kaha uoshe uje atambula yange, katambuile yange vuno honi uje uanjitumine."

38 Yiuano uahandekele kuli Yesu nguendi, "Mulongisi, tuamuene yala ahumisa mahamba mu lizina liove, kaha tuamuvindikile, muomu keti umo uetu."

39 Vuno honi Yesu uahandekele kuli ikeye nguendi, "Keti mumuvindike," muomu naumo uahi alinga vipangi viakukomouesa mu lizina liange uje muka ntsimbu naua ase kuhandeka via vipi hali yange. 40 Muomu uoshe uje katuluisa napu uetu. 41 Cilivene njimileka nguange, uoshe uje amihana nganja ya mema akunua mu lizina liange, muomu muapandama kuli Kilistu, kakahonoua kuuana vuana vuendi.

42 "Nga uoshe alingisa vanike vavandende vaje vanatsiliela muli yange kulinga vupi, cacili ngue muntu uangacije vamukutile livue liakama liakulolela vunga mu ntsingo yendi nakumumbila mu cisali. 43 Nga livoko liove likulingisa linga ulinge vupi, litete, cacili kuli yove kukovela mu muono na livoko limo kupulakana kukovela na mavoko avali aje akutuala ku ngehena, ku tuhia tuakuhona kuhua. 44 Muje mavuno amuo ke kutsa, na tuhia tuamuo kutue kuzima. 45 Nga mukono uove ukulingisa linga ulinge vupi uteteko, cacili kuli yove kukovela mu muono na vusualonda kupulakana kukovela na mikono ivali nakukumbila mu ngehena. 46 Muje mavuno amuo ke kutsa, na tuhia tuamuo kutue kuzima. 47 Nga lisho liove likulingisa linga ulinge vupi, licokovolemo, cacili kuli yove kukovela mu Vumuene vua Njambi na lisho limo kupulakana na mesho avali nakukumbila mu ngehena, 48 muje mavuno vamuo kuve kutsa, na tuhia tuamuo kutue kuzima.

49 "Muntu uoshe vakamulelesa na muongua mu tuhia.

50 "Muongua uacili, vuno honi nga muongua uashamuka, ukapua vati naua muongua?

"Pueni muongua yeni vavenia, kaha kaleni na ciyulo kuli umo na mukuavo."