1 Hanima ya matangua amandende, Yesu uahilukile naua mu Kapenauma, kaha vantu vovuile nguavo Yesu nahiluka kuimbo. 2 Vantu vakungulukile muvuingi, kaha kukuakele cipue mulili umo uasaleleko uahi, cipue hambanza ya cikolo, kaha uambuluile lizi kuli vakevo. 3 Vamo vamala vauana vambatele yala ua kalepa kaha vamunehele kuli Yesu. 4 Kaha omo vahonouele kushuena kuli Yesu muomu ya civunga, vatuvile mbengua ha ciluli mukemo vasoselele cije citala tala cije uje yala uakalepa ha kosele na kucineha ha mavu. 5 Kaha omo Yesu uamuene lutsilielo luavo, uahandekele kuli uje muka kalepa nguendi, "Munange vipi viove vana vikonekela."

6 Nankuma vamo valongisi va lishiko vaje vatumamene kuje, vakele na kulihuozola mu mitima yavo nguavo, 7 "Vika ou yala ahandekela ngacije? Alinakushaula! Iya asa kukonekela vipi, vuno honi kuvanga lika Njambi?"

8 Hajevene Yesu mu cimbembesi uazivukile vivakele na kusinganieka mu mitima yavo, kaha uavehuile nguendi "Vikahoni muli na kulihozola mu mitima yeni? 9 Cili cinapu cacasi, kuhandeka kuli muka kalepa nguove, ‘Vipi viove vana vikonekela,’ indi kuhandeka nguove ‘Katuka, ambata citala tala cove uye?’ 10 Vuno honi njitonda nguange muzivuke ngueni Muna Muntu ali na nzili yakama ya kukonekela vipi hano ha mavu." Uahandekele kuli uje yala ua kalepa nguendi, 11 "Njikuleka nguange, katuka, ambata citala tala cove uye kuimbo."

12 Kaha uakatukile, hajevene uambatele citala tala cendi nakuya oku vantu voshe vamumono, kaha vakomokele nakulemesa Njambi nguavo, "Kanda tumoneho cuma cakufua ngacije!"

13 Yesu uayile naua ku cikuma ca cisali, kaha civunga cakama cakungulukile kuli ikeye, kaha uaputukile kuvalongesa. 14 Kaha omo uahitile, uamuene Levi muna Alufeya, natumama ku njivo yakutambuila lisimu, kaha Yesu uahandekele kuli ikeye nguendi, "Njikave." Kaha Levi uakatukile nakumukava.

15 Kaha omo uatumamene ku mesa mu njivo yendi, vuingi vua vakakutambula lisimu na vaka vipi vatumamene na Yesu na vandongisi vendi, muomu vavengi vamukavele. 16 Kaha valongisi va lishiko vaje vapuile Vafaliseho omo vamuene Yesu ali nakulia na vaka vipi na vakakutambula lisimu, vehuile vandongisi vendi nguavo, "Nkuma vika vialila na vakakutambula lisimu na vaka vipi?"

17 Kaha omo Yesu vovuile eci, uahandekele kuli vakevo nguendi, "Vaje kuvavavala kuvasa kutonda cimbanda, vuno honi kuvanga lika vaje vavavala, kunjezile nakusana vaje vaka vusunga, vuno honi vaka vipi."

18 Omo vandongisi va Yiuano na Vafaliseho valiuminine kulia, kaha vantu vamo vezile kuli Yesu nakumuihula nguavo, "Nkuma vatihoni vandongisi va Yiuano na vandongisi va Vafaliseho vakaluimina kulia, vuno honi vandongisi vove kuvekuliumina kulia?"

19 Kaha Yesu uahandekele kuli vakevo nguendi, "Nkuma nga mungenzi neja ku ciuano ca vulo asa kuliumina kulia oku vavenia vulo ali navo ndi? Houe kuvasa kuliumina kulia nga vali na vavenia vulo. 20 Vuno honi matangua akeja, omo vavenia vulo vakamuhumisa kuli vakevo, ambahoni vakaluimina kulia.

21 "Naumo uahi asa kutongela citopeko ca ntanga yaiha ha kazaku kalaja, nga alinga ngoco, kaha citopeko cikatavula kazaku kalaja nakuseza mbengua. 22 Kaha naumo uahi ahaka viniu via viha mu vinjeke via vilambu via laja, nga alinga ngoco, kaha viniu vitavula vilambu, kaha na viniu vikahita, na vilambu naua navikevio vikapihia, vuno honi viniu viaviha viapande kukala mu vilambu viaviha."

23 Ha litangua limo lia Sapalalo Yesu uahitile mu mehia a tiliku, kaha omo vakele nakuhita vandongisi vendi vaputukile kutomona mitue ya vinona. 24 Kaha Vafaliseho vahandekele kuli ikeye nguavo, "Tala, nkuma vika valingila evi vivanavindika mu lishiko ha litangua lia Sapalalo?"

25 Kaha uahandekele kuli vakevo nguendi, "Kanda mutandeho vije vialingile Ndaviti, omo uatsile njala kaha uatondele kulia, ikeye navaje vakele navo, 26 uakovelele mu njivo ya Nambi, omo Aviyatale uapuile kasasendote uakama ha ntsimbu ije, kaha ualile mbolo ya nkombelo ya Njambi ije kuyapuile lishiko kuli muntu uoshe kuvanga lika kuli vasasendote ku ilia, kaha naua uahaneneko nakuli vaje vakele navo."

27 Kaha Yesu uahandekele kuli vakevo nguendi, "Sapalalo vaipangelele muomu ya muntu, kaha keti muntu muomu ya Sapalalo, 28 kaha Muna Muntu ikeye vene Muene cipue ha litangua lia Sapalalo."