1 Ha matangua aje, omo civunga cakama naua cakungulukile, kaha vahonouele viakulia, Yesu uasanene vandongisi vendi, kaha uahandekele kuli vakevo nguendi, 2 "Njivua ngozi ha civunga eci, muomu vanakala nange honi matangua atatu kuakuhona kulia, 3 kaha nga njivaleka nguange vaye na njala ku membo avo, vasa kulezumukila mu ngila muomu vamo vanahumu kulahako."

4 Kaha vandongisi vendi vamukumbuluile nguavo, "Iya asa kulisa vantu ava na mbolo muno mu mpambo?"

5 Yesu uahandekele kuli vakevo nguendi, "Muli na vimbolo vingahi?" Vahandekele nguavo,

"Vitanu na vivali."

6 Kaha uashikile civunga linga vatumame ha mavu, kaha uambatele vimbolo vitanu na vivali kaha uatsantselele na kuvipazula, kaha uahanene vandongisi vendi linga vahane vaje vantu, kaha vahanene ku civunga. 7 Vakele na vantsi vavandende, kaha hanima ya kuvakuisula uashikile naua linga avahanevo.

8 Kaha valile nakukuta, kaha vakunguluile vije vimbazuvuila vivasezeleho viapuile mitonga itanu na ivali yakushula. 9 Vantu voshe vapuile ngue makulukazi auana. 10 Kaha uavalekele linga vaye, kaha hajevene Yesu uakovelele mu vuato na vandongisi vendi vayile ku nganda ya Ndalamanuta.

11 Vafaliseho vezile kuli Yesu nakuputuka kulinga nendi vimpata, vatondele linga avalingile cimueso cakuhuma muilu, ngeci vamueseke. 12 Yesu ualisisumuine mu Cimbembesi cendi nakuhandeka nguendi, "Nkuma vika vantu va cikota cino vatondela cimueso? Muavusunga njihandeka kuli yeni nguange, na cimo cahi cimueso cikalingiua ku cikota cino."

13 Kaha uavasezele, uakovelele mu vuato nakuya musinia lia cisali.

14 Honi vandongisi vasuvile kuambata vimbolo, kaha vakele lika na mbolo imo mu vuato. 15 Yesu uavananguile nguendi, "Liniungeni nakuzangama ku cimbaluila ca Vafaliseho na cimbaluila ca Helonde."

16 Vandongisi vakele nakuhandeka kuli umo na mukuavo nguavo, "Kutuesi na mbolo."

17 Omo Yesu uacizivukile, uahandekele kuli vakevo nguendi, "Nkuma vika muhandekela ngueni kumuesi na mbolo? Ku muazivukile cipue kuvuisisa ndi? Nkuma vati mitima yeni inakolo? 18 Muli na mesho vuno honi nkuma kumumono, muli na matuitui nkuma kumuvu ndi? Nkuma naua kumuvuluka ndi? 19 Omo njapazuile vimbolo vitanu kuhana vantu makulukazi atanu, muakunguluile mitonga ya vimbazuvuila ya kushula ingahi?"

Vakumbuluile nguavo "Likumi na ivali."

20 "Kaha naua omo njapazuile vimbolo vitanu na vivali kuhana vantu vakupua makulukazi auana, muakunguluile mitonga ya vimbazuvuila ya kushula ingahi?" Kaha vamukumbuluile nguavo, "Itanu na ivali."

21 Kaha Yesu uahandekele kuli vakevo nguendi, "Nkuma naku ntsimbu ino hanga ku muvuisisa ndi?"

22 Yesu na vandongisi vendi vayile ku Mbetesainda. Kaha vantu vamo vanehele muntu umo kuli ikeye uje uapuile kapuputua, valambelelele Yesu linga amukuate. 23 Yesu uakuatele uje yala ua kapuputua ku livoko, kaha ua muhumisile hembo, omo uamujekuilile malenzi ha mesho endi, uamusalekele mavoko endi kaha uamuhuile nguendi, "Ulinakumonako cimo ndi?"

24 Uje yala uatalele kuilu nakuhandeka nguendi, "Njimona vantu, vuno honi valinakumoneka ngue miti ili na kuenda."

25 Yesu naua uamusalekele mavoko endi ha mesho endi, kaha uamutalele ntooma ambahoni uakangukile, kaha uamuene vioshe muacili. 26 Yesu uamulekele ngeci aye kuimbo liavo, uamulekele nguendi, "Keti ukovele cipue muimbo."

27 Yesu uatualeleho kuya na vandongisi vendi ku membo a Sesaliya Filipu, kaha omo vayile mu ngila Yesu uehuile vandongisi vendi nguendi, "Vantu vahandeka nguavo Yange iya?"

28 Kaha vamulekele nguavo, "Vamo vahandeka nguavo yove Yiuano Muka kumbuitika, vamo naua nguavo yove Eliya, vamo nguavo yove umo ua vaje tunanguizi."

29 Kaha uavehuile nguendi, "Vuno honi yeni munjisana ngueni yange iya?" Petulu uamukumbuluile nguendi, "Yove Kilistu."

30 Kaha uavashikile nguendi keti valekeko cipue muntu umo hali ikeye.

31 Ambahoni Yesu uaputukile ku valongesa nguendi Muna Muntu napande kuyanda mu viuma viavingi, nakumuviana ku vakuluntu na kuli vasasendote vakama na kuli valongisi va mashiko, na kumutsiha kaha hanima ya matangua atatu akasanguka naua. 32 Uavalumbunuinine eci muacili kuli vakevo. Kaha Petulu uamutualele kuali kaliavo nakuputuka kumutenukila. 33 Vuno honi omo uatengulukile nakumona vandongisi vendi, uatenukilile Petulu nakuhandeka nguendi, "Huma kuli yange Satana! Muomu kuuesi kumutambela ua Njambi, vuno honi uli kumutambela ua vantu."

34 Ambahoni Yesu uasanene civunga ca vantu hamo na vandongisi vendi linga veje kuli ikeye, kaha uahandekele kuli vakevo nguendi, "Nga kuli uoshe atonda kunjikava, napande kuliviana ikeye vavenia kaha ambate cilindakano cendi na kunjikava. 35 Muomu uoshe uje ayoyesa muono uendi akauzimbalesa, kaha uoshe azimbalesa muono uendi muomu yange na Muzimbu Uacili aka uyoyesa. 36 Nkuma cikuasa vika kuli muntu kuli kunguluila cifuti coshe na kuzimbalesa muono uendi? 37 Nkuma cuma cika muntu asa kuhingisa mu muono uendi? 38 Muomu uoshe uje anjivuila shuamua, na mezi ange mu cikota cino ca vupangala na vupi, na Muna Muntu naua akamuvuila shuamua, omo akeja mu vumpau vua Ishe na tungelo va kulela."