1 Omo tele cimene vakuluntu va vasasendote na vakuluntu, na valongisi va mezi a mashiko, na vaka mpunga voshe valiuanene nakukuta Yesu nakumutuala kuli Pilato. 2 Kaha Pilato uamuhuile nguendi, "Nkuma yove Muene ua Vayunda ndi?"

Kaha Yesu uamukumbuluile nguendi, "Omo vene munahandeka."

3 Kaha vakuluntu vavasasendote vamuvangeyele viuma viavingi. 4 Kaha Pilato uamuhuile naua nguendi, "Kuuesi na cikumbululo ca kuhandeka ndi? Tala viuma vi vali nakukuvangeya."

5 Vuno honi Yesu kamukumbuluile, kaha Pilato ualikomokelele.

6 Kaha ha ciuano ca Paseka, Pilato uakele nakuvahumisila umo ua vinzinda mu kamenga uje ivakele nakutonda vantu. 7 Hakati ka vinzinda vaje vakele mu kamenga, vaje vaka kutsiha vantu omo ya mpindangano, hakele yala ivatumbuile nguavo Mbalambasa. 8 Kaha civunga cezile nakuputuka kulomba Pilato linga alinge ngue muje muakalingila kuli vakevo ntsimbu yoshe. 9 Pilato uavakumbuluile nguendi, "Nkuma mutonda njimihumisile Muene ua Vayunda ndi?" 10 Muomu uazivukile nguendi capuile kutonda lika kua vakuluntu vavasasendote linga vatuale Yesu kuli ikeye.

11 Vuno honi vakuluntu vavasasendote vashongangeyele civunga linga pilato ahumise Mbalambasa. 12 Pilato uahandekele kuli vakevo naua nguendi, "Nkuma njilinge vika nou yala ou umutumbula ngueni Muene ua Vayunda?"

13 Kaha vatambekele cikuma naua nguavo, "Mushukike."

14 Pilato uahandekele kuli vakevo nguendi, "Vika, nkuma vupi muka vuanalingi?" Vuno honi vatambekele cikuma nguavo, "Mushukike." 15 Omo Pilato uatondele kuvuahelesa civunga ca vantu, uavahumisilile Mbalambasa. Kaha uapupile Yesu na kuvahanaye linga vamushukike.

16 Masualale vamutualele mu lipela (mu cipango ca Nguvulu) Kaha vasanene voshe masualale. 17 Vazikile Yesu ntanga ya vunengu, nakuzenga cilongo ca vimbimbo nakumuzika. 18 Kaha vaputukile kumumeneka nguavo, "Haaa, Muene ua Vayunda!" 19 Vamupupile ku mutue na lihongo, nakumujekuila, kaha vatsikamene nakumulemesa. 20 Hanima ya kumushendumuna, vamushuluile ije ntanga ya vunengu, nakumuzika vuzalo vuendi. Kaha vamutualele nakumushukika.

21 Kaha valiuanene na yala umo ua lizina lia Simoni uaku Silene, uje uezile mu cifuti uapuile ishe ya Elekizanda na Lufuse, kaha vamusindiyiye linga ambate cilindakano. 22 Vatualele Yesu ku cihela vatumbuile nguavo Ngolongota (kulumbununa nguavo cihela ca cikola) 23 Kaha kuje vamuhanene viniu viakushingasana na miila, vuno honi Yesu kavinuine. 24 Ambahoni vamushukikile ha cilindakano, nakulipangezela vuzalo vuendi hakati kavo, na kuta nkela linga vauane muntu na muntu ambataho cika. 25 Kaha yapuile ntsimbu ya mu citanu na viuana ku cimene, omo vamushukikile. 26 Kaha vasonekeleho canukiso ca kumuvangeya nguavo, "Muene ua Vayunda." 27 Vashukikile vezi vavali hamo na Yesu umo ku livoko lia cilio mukuavo ku livoko lia cimoshue. 28 Mu ngila eyi vene visoneka viapuilemo vije vihandeka nguavio, "Vamushukikile hamo na vaka vupi."

29 Kaha vaje vakele nakuhita vamushauile, na kuningangesa mitue yavo, na kuhandeka nguavo, "Haa! Yove uasa kupihisa njivo ya Njambi na kuitunga naua mu matangua atatu, 30 liyoyese yove vavenia, kaha shuluka ha cilindakano!"

31 Kaha naua mucifua cimovene vakuluntu va vasasendote na valongisi va mezi a mashiko vamushendumuine, na kuhandeka nguavo, "Uayoyesele vakuavo vuno honi kasa kuliyoyesa ikeye vavenia, 32 eceleni ou Kilistu, Muene ua Isaleli linga ashuluke ha cilindakano hano vene linga tumumone nakumutsiliela."

Vaje vavamushukikile hamo nendi navakevo naua vamutengulukilile nakumushaula.

33 Omo litangua liakele hakati ka mutue, kuakele milima ha mavu oshe kutuala ha ntsimbu ya mucitatu ya mutania ua cinguezi. 34 Ha ntsimbu ya mucitatu ya mutania ua cinguezi Yesu uasanene na lizi liakutambeka nguendi, "Eloi, Eloi, lama sambakatani?" Kulumbununa nguavo, "Njambi yange, Njambi yange, nkuma vika uanjisezela?"

35 Kaha vamo vaje vakele nakuhita omo vevuile eci vahandekele nguavo, "Taleni, alinakusana Eliya." 36 Kaha umo uambuitikile mupelo mu viniu, naku haka ku lihongo na kumuhana linga anue, kaha uahandekele nguendi, "Vandameneni, tumone indi Eliya eja nakumushuluisa."

37 Yesu uatambekele na lizi liakama, kaha uatsile.

38 Kaha ntanga ya mu njivo ya Njambi yatavukile hakati kuhuma kuilu nakuheta kuintsi. 39 Omo mukuluntu ua masualale uje uemanene kuje oku natala Yesu, omo uamuene ngeci natsi kaha uahandekele nguendi, "Muavusunga ou yala uapuile Muna Njambi!"

40 Kuje naua kuakele vampuevo vamo vaje vakele nakutalelela kulahako, hakati kavo hakele Maliya Mangandalena, na Maliya vaina ya Yakomba shongo ya Yosefa na Salome, 41 vaje vamo omo tele ali mu Ngalileya vamukavele nakumukuasa kaha naua na vampuevo vavengi vezile nendi ku Yelusalema.

42 Omo cinguezi cahetele, naua liapuile litangua lia kulivuahesela, litangua lije ntsimbu kanda Sapalalo ihete, 43 Yosefa uaku Alamatiya, uje uavulemu cikuma ku mpunga, kaha naua uje uavandamenene kuija ca Vumuene vua Njambi, uasimpile nakuya kuli Pilato nakulomba muvila ua Yesu. 44 Pilato ualikomokelele indi nga Yesu natsi laja, kaha uasanene mukuluntu ua masualale nakumuihula indi Yesu natsi laja. 45 Kaha omo uovuile kuli mukuluntu ua masualale nguendi natsi laja, uahanene muvila kuli Yosefa. 46 Yosefa ualandele ntanga ya liniu, nakuneha muvila ha mavu, kaha uamuzengelele muje mu ntanga ya liniu naku utsinda mu cihilo cije ca kucokola mu livue, kaha uasindumuinineko livue ku cikolo ca cihilo. 47 Maliya Mangandalena na Maliya vaina ya Yosefa vamuene kuje ku vatsindile Yesu.