1 Honi omo Vafaliseho na vamo valongisi va mashiko vaje vahumine ku Yelusalema vakungulukile kuli Yesu, 2 vamuene nguavo vamo va vandongisi vendi vali na kulia na mavoko a kuhona kulela, aje akuhona kutana.

3 (Muomu Vafaliseho na Vayunda voshe, kuve kulia kuakuhona kutana ku mavoko, mukuniunga cisemua ca vakuluntu vavo. 4 Omo vahuma ku vihela via kulandesela, kuve kulia kuvanga valilelesa vakevo vavenia, kaha kuli visemua viavingi vikuavo vivakaniungu, ngue via kukusha vinganja na vindeho na vitenga via kupanga ha vunengu)

5 Kaha Vafaliseho na valongisi va mashiko vehuile Yesu nguavo, "Nkuma vika honi vandongisi vove kuve kuyoya kuya ku cisemua ca vakuluntu, vuno honi vakali na mavoko akuhona kulela?"

6 Kaha Yesu uahandekele kuli vakevo nguendi, "Isaya uahandekele muacili ha vunanguizi vuendi hali yeni vaka civembulu ngue muje uacisonekele nguendi,

"Vantu ava, vanjilemesa na tunua tuavo,

vuno honi mitima yavo ili kulako nange.

7 Vanjilemesa muangoco,

vilongesa viavo vinapu via vuntu!

8 "Yeni kumue kukavangeya lishiko lia Njambi, vuno honi mukatualelelaho kulinga cisemua ca vantu."

9 Kaha Yesu uahandekele kuli vakevo nguendi, "Munasembulula lishiko lia Njambi, linga muniungilemo cisemua ceni! 10 Muomu Mosesa uahandekele nguendi, ‘Singimika isho na noko’, kaha, ‘Uoshe ahandeka via vipi hali ishe cipue vaina, cilivene napande kutsa’, 11 vuno honi muhandeka ngueni, Nga muntu aleka ishe cipue vaina nguendi, ‘Viunapandele kunganiala kuli yange inapu Kombani’ (kulumbununa, vanacihana kuli Njambi), 12 Kaha ku umutavesa kulinga cuma coshe kuli ishe cipue kuli vaina, 13 eci cinapu kuteua lizi lia Njambi mu cisemua ceni cije muakuata. Kaha evi vikevio viavingi vije mukalingi."

14 Yesu naua uasanene vantu linga veje kuli ikeye, kaha uahandekele kuli vakevo nguendi, "Njivuilileni, muva voshe, nakuvuisisa. 15 Nacimo cahi cihuma hambanza lia muntu cije cikovela muli ikeye cije cihonoua kumulelesa, vuno honi viuma vije vihuma muli muntu vikevio vimupuisa linga keti apue uakulela." 16 Nga uoshe uje ali na matuitui evuilile.

17 Omo Yesu uakovelele mu njivo, nakuseza vantu, vandongisi vendi vamuihuile ha cije cisimo. 18 Kaha Yesu uahandekele kuli vakevo nguendi, "Nkuma neni naua," kumuesi nakuvuisisa ndi? Nkuma kumumono ngueni, "vioshe vije vikovela muli muntu viakuhuma hambanza kuviasa kuhona kumulelesa, 19 muomu ku cekukovela mu mutima uendi, vuno honi muzimo liendi, kaha na kupulakana." (Nankuma mucifua eci Yesu natavesa viakulia vioshe kuvilia)

20 Kaha Yesu uahandekele kuli vakevo nguendi, "Vije vikahumu muli muntu vikevio kuviekulelesa muntu. 21 Muomu mukati ka mutima ua muntu mukemo mukahumu visinganieka via vupi, na vukoyi, na kuiva, na kutsiha, 22 na vupangala, na kuliveya, nakulinga viuma vioshe via vipi, na kukuisa, na mesho mesho, na cipululu, na vungumba, na kulihalesa na vulema. 23 Viuma vioshe evi via vipi vikahuminina mukati ka mutima, kaha nakupuisa muntu kuhona kupua uakulela."

24 Yesu hakuhuma kuje uakatukile nakuya ku cihela ca Tile na ku Sindone. Kaha uakovelele mu njivo cakuhona muntu uoshe kuzivuka, vuno honi kasele kulishueka. 25 Hajevene kuakele mpuevo uje uakele na munendi ua muanike ua mpuevo uje uakele na cimbembesi cacipi, uovuile via Yesu, kaha uezile kuli ikeye nakuuila ku viliato viendi. 26 Nankuma uje mpuevo uapuile Kangelengu, uasemukilile ku Fonisiya mu Siliya. Kaha ualambelele Yesu linga ahumise lihamba muli munendi. 27 Kaha Yesu uahandekele kuli ikeye nguendi, "Eceni vanike vavandende valivange kulia, muomu keti cacili kuambata mbolo ya vanike na kuyashela tutali."

28 Vuno honi uje mpuevo uamukumbuluile nguendi, "Eyo Muene, cipue vene tutali vaje vavutama muintsi lia mesa valia visaniu vije vauisa vanike!"

29 Ambahoni Yesu uahandekele kuli ikeye nguendi, "Muomu yakuhandeka ngacije uasa kuya, lihamba linahumu muli munove."

30 Kaha uje mpuevo uahilukile kuimbo, uakauanene muanike nakosa ha muhela, na lihamba liamuhumu.

31 Ambahoni Yesu uahumine ku cihela ca Tile uahitile mu Sindone na kuya ku cisali ca Ngalileya, nakuheta mu cihela ca Ndikapolisi (kulumbununa vinganda likumi) 32 Kaha vantu vanehele yala kuli Yesu uje uapuile kasenda matuitui na kalaka, kaha valambelelele Yesu linga a musaleke mavoko endi. 33 Yesu uamuhumisile ha civunga ca vantu nakuya nendi kua likaliavo, uakovelesele minie yendi mu matuitui endi, uajekuile nakumukuata ha ndaka yendi, 34 kaha Yesu uatalele muilu, kaha uasisimukile nakuhandeka kuli ikeye nguendi, "Efefata," kulumbununa nguavo, "Shokoloka."

35 Kaha matuitui endi ashokolokele na kalaka kaje kakuatele ndaka yendi kazitukile, kaha uaputukile kuhandeka muacili. 36 Yesu uashikile vantu linga keti valekeko cimo kuli uoshe, vuno honi cipue uavashikile ngoco ambahoni vatualeleleho kuambulula. 37 Kaha vantu vakomokele cikuma nakuhandeka nguavo, "Nalingi viuma vioshe muacili, cipue tusinda matuitui vovua na tuveveve vahandeka."