1 Yesu naua uakovelele mu njivo ya malombelo, muje muakele uje yala uakusekua livoko. 2 Kaha vamo va Vafaliseho vaje vatondele kuhana Yesu mulonga nankuma vamutalelele, linga vamone indi amukanguisa ha litangua lia Sapalalo. 3 Kaha uahandekele kuli uje yala uakusekua livoko nguendi, "Ija kuno." 4 Kaha uahandekele kuli vakevo nguendi, "Kuya ku lishiko lia Sapalalo, nkuma cinapu cacili kulinga muacili indi kuvulumuna, kuovola muono indi kutsiha?"

Vuno honi vaholokele kuluu. 5 Uavatalele oku tele naniengua, nakulivua vusiua ha kukolesa mitima yavo, kaha uahandekele kuli uje yala uakusekua livoko nguendi, "Olola livoko liove." Ualioluele, kaha livoko liendi liakangukile. 6 Vafaliseho vatuhukilemo, kaha hajevene vali uanene hamo na mpunga ya Helonde linga vauane ngila ya kutsihilamo Yesu.

7 Yesu na vandongisi vendi vahumine ku cisali, kaha civunga cakama caku Ngalileya neci ca ku Yundeya camukavele, 8 naku Yelusalema naku Indumeya vamo musinia ya Yundau, vamo vahumine ku Tile na Sindone, civunga cakama omo covuile vije vialingile vezile kuli ikeye. 9 Kaha Yesu ualekele vandongisi vendi linga vamuvuahesele vuato muomu ya civunga kuteua vamutseka, 10 muomu ya kukanguisa vavengi, ngeci navaje voshe vakele na mishongo vamusindikile linga vamukuate. 11 Kaha hoshe haje omo vaje vakele na vimbembesi via vipi vamumuene, vauililile ha mavu ku mesho endi nakutambeka nguavo, "Yove Muna Njambi." 12 Kaha uavashikile cikuma ngeci keti vamutsimanese.

13 Kaha Yesu uayile helu lia munkinda, uasanene vaje vatondele, kaha vezile kuli ikeye. 14 Uahanguile likumi na vavali linga vakale nendi, ngeci avatume kuya nakuambulula, 15 na kukala na nzili yakama yakuhumisa mahamba. 16 Ava vakevo likumi na vavali vaje vahanguile, Simoni uje ya lukile Petulu, 17 Yakomba muna Zembendeo, na Yiuano munaina ya Yakomba, vaje valukile Mboanengesi, nkumbu yalio ngualio, "Vana va cililimo." 18 Anduleo, na Filipu, na Mbatolomeo, na Mateu, na Tomasi, na Yakomba muna Alufeya, na Tandeo, na Simoni uaku Kanana, 19 na Yundasa Sakaliote, uje uendele Yesu vungungu.

20 Yesu na vandongisi vendi vakovelele mu njivo, kaha civunga caliuanene hamo naua, ngeci ikeye na vandongisi vendi vahonouele kulia. 21 Kaha omo ntanga yendi yovuile ha cuma eci, vayile naku muhumisako muomu vantu vakele nakuhandeka nguavo, "Nazaluka."

22 Kaha valongisi va lishiko vaje vasikumukile kuhuma ku Yelusalema vahandekele nguavo, "Vali nakumupangesa kuli Mbelezembulu, muene ua mahamba ikeye namuhana nzili yakuhumisa mahamba."

23 Kaha Yesu uavasanene linga veje kuli ikeye, kaha uahandekele kuli vakevo mu visimo nguendi, "Nkuma vati Satana asa kuhumisa Satana? 24 Nga vumuene vulipanga hakati kavuo vavenia, kaha vumuene vuje kuvukemana. 25 Nga njivo ilipanga hakati ikeyo vavenia, ije njivo kuikemana. 26 Kaha nga Satana aliluisa ikeye vavenia kaha nalipanga, kasa kuimana, vuno honi alinakuya ku mamanusuilo.

27 "Naumo uahi akovela mu njivo ya yala ua nzili nakupukula vitenga viendi, cakulivanga kuvanga akute uje yala ua nzili, ambahoni apukule njivo yendi.

28 "Cilivene, njihandeka kuli yeni nguange, vupi vuoshe vua vantu vakavukonekela, nakushaula kuje kuvakahandeka, 29 vuno honi uoshe uje ashaula Cimbembesi Uakulela ku vakamukonekela, muomu nalingi vupi vuayaye," 30 muomu vahandekele nguavo, "Alina na Cimbembesi cacipi."

31 Ambahoni vaina na vamunaina ya Yesu vezile nakuimana hambanza nakumutumina muntu linga amusane. 32 Kaha civunga cije camuzengelekele tele vatumama, vahandekele kuli ikeye nguavo, "Vanoko na vamuanoko vali hambanza, mu kukutonda."

33 Kaha Yesu uavakumbuluile nguendi, "Veya vanana na vamunanana?" 34 Kaha omo uatalele vaje vamuzengelekele, uahandekele nguendi, "Ava vakevo vanana na vamunanana! 35 Uoshe uje alinga cizango ca Njambi, ikeye munanana ua yala, nou uampuevo, na vanana."