1 Kuli mukuluntu Telefilo,

Vantu vavengi vesekele kusoneka vukaleho vua viuma vije vialishulisilile hakati ketu. 2 Vasonekele vije vatulekele kuli vaje vavimuene kumaputukilo avio na kuli vaje vahandekele muzimbu. 3 Nankuma, nange njinayongola ngeci njapande ku kusonekelavio yove mukuluntu Telefilo muomu nange njavikavele cikuma ha ntsimbu yalaha hume ha viaputukilile. 4 Njalingi evi linga uzivuke vusunga vuacili vua viuma vije vivanakulekesa.

5 Ha matangua aje omo Helonde uapuile muene ua Yundeya, kuakele kasasendote lizina liendi Zakaliya, ua kumuyati ua vasasendote va Aviya. Lizina lia mpueyendi liapuile Elizaveta, nendi naua uapuile uaku ntanga ya Alone. 6 Voshe vapuile vaka vusunga ku mesho a Njambi, vendele muacili na kuononoka Mashiko oshe a Muene. 7 Vuno honi vakevo kuvakele na muana muomu Elizaveta uapuile ntsimpi, kaha voshe vavali vapuile vakulukazi.

8 Ha litangua limo Zakaliya uakele nakupanga vipangi viendi via vusasendote mu njivo ya Njambi, muomu ntsimbu yendi yahetele ya kupanga. 9 Ngue kucilika civakavele vasasendote, Zakaliya vamuhanguile hakuta nkela linga akovele ku mutambela uakulela cikuma mu njivo ya Njambi Muene nakutsimika ngongosi ya luengo luacili ha mutula. 10 Omo ntsimbu ya Zakaliya yakutsimika ngongosi ya luengo luacili yahetele, civunga ca vantu vakakulemesa vakele hambanza na kulombela, 11 kaha kuamusholokelele kangelo ua Muene, uemanene kucilio ca mutula kuje kuvakele nakutsimikila ngongosi ya luengo luacili. 12 Omo Zakaliya uamumuene uaniangumukile, kaha uovuile liova. 13 Vuno honi Kangelo uahandekele kuli ikeye nguendi, "Keti uvue liova Zakaliya! muomu Njambi novu lilombelo liove. Kaha mpueyove Elizaveta akakusemena muana ua yala, kaha ukamuluka lizina liendi Yiuano. 14 Ukavuahelela na kujolela, kaha vavengi vakalisamba ha kusemuka cendi! 15 Muomu ou muana akapua uakama ku mesho a Muene. Kakanu viniu cipue viuma viakushasha. Akashula na Cimbembesi Uakulela cipue vene oku acili muzimo lia vaina. 16 Akahiluisila vantu vavengi Vaisaleli kuli Muene Njambi yavo. 17 Akaya kulutue lua Muene, ngue ku nzili na cifua ca vilinga via kananguizi Eliya. Akahiluisa vaishavo na vana vavo hamo lika. Akatengulula vaka kuhona kuononoka na kuvahiluisila naua ku ngila ya vaka vusunga. Akavuahesela vualumo vantu linga vavandamene Muene."

18 Zakaliya uehuile kangelo nguendi, "Njikazivuka vati muje cuma eci cikafua? Muomu yange njinakolo laja, kaha na mpuevo yange nakolo laja."

19 Kaha kangelo uamukumbuluile nguendi, "Yange Ngambiliyele njinemana ku mesho a Njambi. Nanjitumu kuhandeka nove nakukunehela Muzimbu ou uacili. 20 Tala, ukapua u kaveveve muomu kuuatsilielele mezi ange, aje akapua a vusunga omo ntsimbu yauo ikaheta. Ukaholoka kuluu noho litangua lije cikulaheso cange kuli yove cikapua ca vusunga."

21 Vantu vavandamena Zakaliya hambanza kaha valikomokelele cikuma omo uasimbuile cikuma mu Njivo ya Njambi. 22 Omo Zakaliya uatuhukilemo kasele kuhandeka kuli vakevo. Kaha hakuhona kuhandeka cipue lizi limo, uapangesele vimueso na mavoko endi, kaha vantu vakele hambanza vazivukile nguavo namono cimona mu Njivo ya Njambi.

23 Omo Zakaliya uamanusuile vipangi viendi mu Njivo ya Njambi, kaha uahilukile kuimbo liendi. 24 Munima yevi mpueyendi Elizaveta uemitile, kaha uakele mu njivo vingonde vitanu. 25 Elizaveta uahandekele nguendi, "Ha mamanusuilo Muene nanjimuesa kavumbi, nanjihumisa shuamua ku mesho a vantu."

26 Omo Elizaveta uakele na vingonde vitanu na imo via lizimo, Njambi uatumine kangelo Ngambiliyele aye ku Nazaleta mu nganda ya Ngalileya. 27 Kangelo uakele na lizi kuli muana mpuevo umo kanda alimone na yala lizina liendi Maliya. Uje uapuile uakulama kuli yala lizina liendi Yosefa, uaku ntanga ya muene Ndaviti. 28 Kaha kangelo uezile kuli Maliya uamumenekele na kuhandekele nguendi, "Muene ali nove, kaha nakukuisula cikuma!" 29 Vuno honi Maliya uakele na citanga ha lizi lije liahandekele kangelo, uasinganiekele mu mutima uendi nguendi, "Mezi aua analumbunuka vika?" 30 Kaha kangelo uahandekele kuli ikeye nguendi, "Keti uvue liova Maliya, muomu unauana kavumbi kuli Njambi. 31 Tala, ukemita, kaha ukasema muana ua yala, ukamuluka lizina liendi Yesu. 32 Ou muana akapua uakama, kaha vaka mutumbula Muna Njambi Uahelu Liavioshe. Kaha Muene Njambi akamupuisa muene, ngue muapuile kukuyendi Ndaviti. 33 Kaha akapua muene ua miyati ya Yakomba kumiaka yoshe, na vumuene vuendi kuvukahu!"

34 Kaha Maliya uahandekele kuli kangelo nguendi, "Nkuma eci cikafua vati? Muomu yange njimuana mpuevo uje kanda alimone na yala." 35 Kaha kangelo uamukumbuluile nguendi, "Cimbembesi Uakulela akeja hali yove, na nzili ya Njambi Uahelu Liavioshe ikakufuika. Nankuma, ha cuma eci uje muana Uakulela vakamutumbula Muna Njambi. 36 Tala! Munanoko Elizaveta na ikeye nemita muana ua yala muvukuluntu vuendi. Kaha ino inapu ngonde ya mucitanu na imo ya lizimo liendi cipue vene vamutumbuile nguavo ntsimpi. 37 Muomu nacimo cahi cuma cacikalu kuli Njambi." 38 Kaha Maliya uakumbuluile kangelo nguendi, "Tala, yange njapua njingamba ya Muene, cilingiue kuli yange ngue muje mu unahandeka." Kaha munima yevi kangelo uamusezele.

39 Hanima ya matangua amandende, Maliya ualivuaheselele na kuya ku nganda ya mu minkinda ya mu nganda ya Yundeya. 40 Omo uahetele kaha uakovelele mu njivo ya Zakaliya, kaha uahinduisile Elizaveta. 41 Omo Elizaveta uovuile kuhinduisa ca Maliya, kaha kakeke uaniangumukile muzimo liendi. Kaha Elizaveta uashulile na Cimbembesi Uakulela, 42 uahandekele na lizi liakama nguendi, "Yove u uakukuisula hakati ka vampuevo voshe, uakukuisula muana uje iukasema!" 43 Nkuma vikahoni cuma cakama eci cilingiua kuli yange, ngeci vaina ya Muene yange veje kuli yange? 44 Tala! Omo njovuile lizi liakuhinduisa kuove, hajevene kakeke muzimo liange uaniangumukile na nzolela. 45 Yove u uakukuisula muomu uatsiliela ngeci lizi lia Muene kuli yove likapua lia vusunga!

46 Maliya uahandekele nguendi,

"Mutima uange ushangazala vukama vua Muene,

47 Muono uange unavuahelela muomu ya Njambi Muyoyesi uange,

48 Muomu navuluka yange ngamba yendi uakulikehesa! Kuhuma hano nakuya kulutue, vikota vioshe vakanjitumbula nguavo uakukuisula,

49 Muomu Njambi muka nzili yoshe nanjilingila viakama. Lizina liendi lia kulela.

50 Ikeye akamuesa cikeketima kuli voshe vamusingimika, kuhuma ku cikota kuya naku cikota cikuavo.

51 Ikeye nolola livoko liendi lia nzili, nashandola vaka viyongola via kulihalesa.

52 Nahumisa vamiene vakama ha matanda avo, kaha najundula vaje vavandende ku vukama.

53 Nalisa vaje vali na njala na viakulia viacili, kaha vaka kufuka navasheke mavoko voko.

54 Ikeye naniungu cikulaheso cije calingile na vakukuluila vetu, kaha neja nakukuasa ngamba yendi Isaleli.

55 Navuluka kumuesa cikeketima kuli Avilahama naku vatekuluila vendi voshe ku miaka yoshe!"

56 Maliya uasikamene na Elizaveta vingonde vitatu, kaha uahilukile kuimbo liendi.

57 Ntsimbu ya Elizaveta yakusema yahetele, kaha uasemene muana ua yala. 58 Vandambo na vavushoko vendi vovuile muje Muene muanamumuesa cikeketima cakama, kaha voshe vavuahelelele hamo nendi.

59 Kaha ha litangua lia mucitanu na atatu, vezile nakulovola muana, vatondele kumuhindula ishe Zakaliya. 60 Vuno honi vaina vahandekele nguavo, "Houe! Mulukeni Yiuano."

61 Vamukumbuluile nguavo, "Kukuesi kavushoko kove ivaluka lizina eli!" 62 Ambahoni vaniatelele ishe na kulinga vizivukiso na mavoko avo mukumuihula nguavo, "Lizina muka utonda kuluka munove?"

63 Kaha Zakaliya ualombele citale ngeci asonekeho, omo vacinehele uasonekeleho nguendi, "Lizina liendi Yiuano." Kaha voshe vali komokelele cikuma! 64 Ha ntsimbu ijevene Zakaliya uasele kuhandeka naua, kaha uaputukile kushangazala Njambi. 65 Vandambo voshe vakele na liova, kaha muzimbu ua uatsimanene ku mutambela uoshe ua minkinda mu nganda ya Yundeya. 66 Voshe vaje vovuile muzimbu ou vasinganiekeleho, kaha valihozuele nguavo, "Ou muanike akafua vati?" Muomu casholokele muacili ngeci nzili ya Muene yakele hali ikeye.

67 Ishe ya Yiuano, Zakaliya, uashulile na Cimbembesi Uakulela, kaha uahandekele vunanguizi nguendi,

68 "Kushangazala cikale kuli Muene Njambi ya Isaleli!

Muomu neja nakukuasa vantu vendi na kuvapatula.

69 Natuhana Muyoyesi ua nzili,

mutekulu ua ngamba yendi Ndaviti.

70 Uakulahesele laja kuhitila muli tunanguizi vendi va kulela

71 ngeci akatuamena ku vitozi vetu,

na ku nzili ya voshe vaje vatuzinda.

72 Ualingile eci kumuesa cikeketima kuli vakukuluila vetu

na kuvuluka litavasano liendi lia kulela.

73 Eci cikeco cisingo cije calisingile na kukuluila yetu Avilahama.

74 Uakulahesele kutuohiela ku mavoko avitozi vetu,

linga tukamupangele cakuhona liova,

75 linga tupue vakulela na vusunga ku mesho endi

ku matangua oshe a kuyoya cetu.

76 "Kaha yove munange, vaka kutumbula kananguizi Uahelu Liavioshe.

Ukatuama kulutue lua Muene

mukuvuahesa ngila yendi,

77 nakuleka vantu vendi ngeci vakavovola

haku vakonekela ku vipi viavo.

78 Muomu Njambi yetu uakala na cikeketima cakama.

akatuhuisa ceke ca kuovoka linga citue hali yetu

79 nakutuila voshe vaje vakala mu milima ya cimbembe ca kutsa,

nakutuamenena mikono yetu mu ngila ya ciyulo."

80 Yiuano uakolele mu muvila na mu Cimbembesi. Uakele mu mpambo noho litangua liendi lia kulisholola ku vantu Vaisaleli liahetele.