1 Hanima yevi, Yesu uakele nakuendangana mu vinganda na mu membo, nakuambulula Muzimbu Uacili ua Vumuene vua Njambi. Kaha uayile hamo na vandongisi vendi likumi na vavali, 2 na vampuevo vaje vahumisile vimbembesi via vipi na kuvakanguisa ku mishongo yavo. Umo uavo uapuile Maliya mangandalena uje muli ikeye uahumisile mahamba atanu na avali. 3 Mukuavo uapuile Njuana mpuevo ya Kuza, mukuluntu uakulama vitenga via mu njivo ya Helonde, Mukuavo uapuile Suzana na vakuavo vavengi, vampuevo ava vakevo vaje vakele nakukuasa Yesu na vandongisi vendi vukuasi vua vimbongo.

4 Omo civunga cakama calikunguluile hamo, na vantu vavengi vahumine ku vinganda via kuliseza seza vezile kuli ikeye, kaha uaputukile kuhandeka navo muvisimo nguendi,

5 "Muka kuva uayile na kukuva vimbuto viendi. Omo uakele nakukuva vimbuto viendi, imo yauililile ku mukulo ua ngila kaha vantu valiatangeleleho na tuzila vailile. 6 Imo yauililile ha mavu a mavue kaha omo yasokele, yomine muomu kuyakele na mema. 7 Imo ya vimbuto yauililile ha mingonga, kaha omo yakolele vaituvile ku mingonga. 8 Vikuavo vimbuto via uililile ha mavu a cili, mbuto imo lika ya tuhuile cihita cavimbuto."

Kaha Yesu uamanusuile kuhandeka nguendi, "Uje uoshe ali na matuitui, ovue!"

9 Omo vandongisi vendi vamuihuile nguavo, eci cisimo cilumbununa vika. 10 Yesu uavakumbuluile nguendi, "Kuli yeni vanamihana kuzivuka vushueke vua Vumuene vua Njambi, vuno honi kuli vamo njihandeka mu visimo linga, ‘Cipue vamona, vuno honi kuvamonesesa, kaha naua cipue vovua vuno honi kuvovuisisa.’"

11 "Eci cikeco vicilumbununa eci cisimo: mbuto ikeyo lizi lia Njambi. 12 Vimbuto vije via uililile ku mukulo ua ngila vinapu ngue vantu vaje vevua lizi lia Njambi. Kaha satana eja na kuambata lizi mu mitima yavo, linga keti vatsiliele nakuvovola. 13 Vimbuto viauililile ha mavu a mavue vinapu ngue vantu vaje vatambula lizi nakuvuahelelela omo valivua, vuno honi kuvesi na mizi, vakatsiliela lika mukantsimbu kakandende kaha omo vieseko vivauana vahilukila munima. 14 Vimbuto vije viauililile ha mingonga vinapu ngue vantu vaje vevua lizi lia Njambi, vuno honi kulinienga, na vufuko na senga via vuyoye via vatuvile. Kaha kuviakolele na kuima vushuka. 15 Vuno honi vimbuto vije via uililile ha mavu acili vinapu ngue vantu vacili vaje vali na mitima yacili, vovua lizi lia Njambi na kuliniunga na kukolesa ngoo noho vema vushuka.

16 "Naumo uahi a shuameka ndeya na kuishueka muintsi lia liendeko cipue kuyihaka muntsa muhela. Vuno honi vaihaka helu lia citumbiko linga uoshe akovela amone ceke.

17 "Vioshe vije vanashueke hano vikajomboloka na vioshe vije via kushueka hano vakavizivuka, na kuvineha ha ceke.

18 "Mukemo munapande kuivuilila muacili kuvilongesa viange. Vaje vali navimo vakatambula viavingi vuno honi voshe kuvesi nacimo vakavanieka cipue vije viavindende vivasinganieka nguavo valinavio."

19 Kaha vaina ya Yesu na vamunaina vezile kuli ikeye na kumumona, vuno honi vahonouele kushuena kuli ikeye muomu ya civunga ca vantu. 20 Umo ua vantu vaje vakele kuje uamulekele nguendi, "Vanoko na vamunanoko vanemana hambanza, vatonda ku kumona."

21 Yesu uamukumbuluile nguendi, "Vanana na vamunana vanapu vaje vovua mezi a Njambi na ku akavangeya."

22 Ha litangua limo Yesu uakovelele mu vuato na vandongisi vendi kaha uahandekele kuli vakevo nguendi, "Tuyeni musinia lia cisali." Kaha vaputukile kuya. 23 Omo vakele nakujavuka Yesu uayile mutulo. mankimba a mpunzi yakama akatukile mu cisali, ngeci na vuato vuaputukile kushula na mema, kaha vakele mu vukalu. 24 Vandongisi vayile nakumuhindula, nguavo, "Muene, Muene, tuli nakunonga!"

Kaha Yesu uahindukile uatenukilile ije mpunzi na mankimba, kaha vioshe vialikelele na kuholoka. 25 Yesu uavehuile nguendi, "Nkuma lutsilielo lueni luli kuli?"

Mu liova na mukukomoka valihuezele umo na mukuavo nguavo, "Iya ou? Ashika mpunzi na mema, kaha vimuononoka."

26 Yesu na vandongisi vendi vajavukile kuya ku cihela ca Ngelasa, cije cakele musinia lia cisali ca Ngalileya. 27 Omo Yesu uahetele ha ntunda, uali uanene na yala ua muje mu nganda uje uakele na mahamba. Ntsimbu yalaha ou yala kakele nakuzala vuzalo cipue kukala hembo, vuno honi uakele nakukala lika ku vihilo. 28 Omo uamuene Yesu ualilile cikuma na kuuila ku viliato viendi, kaha uatambakanene nguendi, "Utonda kulinga vika kuli yange, Yesu Muna Njambi Uakuhiana? Njikulomba keti unjiyandese!" 29 Uje yala uahandekele evi muomu Yesu uashikile cije cimbembesi cacipi linga cimuhume. Muomu ha vintsimbu viavingi cakele nakumuyandesa. Vantu vakele na kumukuta na malienge ku mavoko na ku mikono naku muniunga, vuno honi uakele nakuvatula kaha lihamba liakele nakumutuala mu mpambo.

30 Yesu uamuhuile nguendi, "Lizina liove yove iya?"

Kaha uamukumbuluile nguendi, "Tuvavengi," muomu mahamba vavengi vakovelele muli ikeye. 31 Kaha mahamba vamulombele nguavo keti avatuale mu cina ca kuhona masima.

32 Kuakele vangulu vavengi vakele na kulia ku mukulo ua munkinda. Kaha mahamba alombele Yesu ngeci akovele muli vaje vangulu, kaha ua atavesele. 33 Ambahoni aje mahamba ahumine muli uje yala, aile muli vaje vangulu, kaha vaje vangulu vahumine ha munkinda vashatukilile mu cisali nakunonga.

34 Omo vaje vaka kuniunga vangulu vamuene vije vialingiuile, vashatukile naku kambulula mu nganda na mu membo akulihata. 35 Kaha vantu vayile nakumona vije vialingiuile. Omo vahetele kuli Yesu, vamuene uje yala yahumisile mahamba natumama ku viliato via Yesu, nazala na visinganieka viendi viakele muacili, kaha vovuile liova. 36 Vaje vavimuene valekele vantu vati muje uje yala uakele na mahamba muva mukanguisile. 37 Ambahoni vantu voshe vamu nganda ya Ngelasa naku vihela viakulihata valombele Yesu nguavo, ahume kuli vakevo muomu vateuele cikuma. Kaha Yesu uakovelele mu vuato na kulivuahesela linga aye. 38 Uje yala ya humisile mahamba ualombele Yesu nguendi, "Njikukave!"

Vuno honi Yesu uavianene uahandekele nguendi, 39 "Hiluka kuimbo ukavaleke viakama viana kulingila Njambi."

Kaha uje yala uayile na kuleka vantu mu nganda vije Yesu namulingila.

40 Omo Yesu uahilukile ku Ngalileya, civunga ca vantu camutambuile, muomu voshe vakele naku muvandamena. 41 Kaha yala umo uezile kuli Yesu. Lizina liendi Njailosi mukuluntu ua njivo ya malombelo. Uauile ku viliato via Yesu na kumulomba nguendi, aye ku njivo yendi, 42 muomu munendi umo lika ua miaka likumi na ivali, uatondele kutsa.

Yesu uayile hamo nendi. Omo vakele nakuya civunga ca vantu vakele nakusindika Yesu. 43 Mu civunga cije vene muakele mpuevo uakele na mushongo uakuhita maninga ha miaka likumi na ivali vuno honi naumo uahi uamukanguisile. 44 Uezile munima ya Yesu kaha uakuatele ku mukunduilo ua kazaku kendi, kaha hajevene kuhita maninga cemanene. 45 Yesu uehuile nguendi, "Iya nanjikuata?"

Omo voshe vavianene Petulu uahandekele nguendi, "Muene vantu vakuzengeleka kaha naua vakusindika."

46 Vuno honi Yesu uahandekele nguendi, "Kuli umo nanjikuata, muomu njazivuka nguange nzili yahumu muli Yange." 47 Kaha uje mpuevo ha kumona ngeci vanamuzivuka, uezile kuli Yesu na liova oku alinakujaja na kuuila ku viliato viendi. Kaha ku mesho a civunga ca vantu uahandekele vika vije uakuatelele Yesu na muje muana kangukila mu vuasi. 48 Kaha Yesu uahandekele kuli ikeye nguendi, "Munange, lutsilielo luove lua Kukuangisa. Ya mu ciyulo."

49 Omo tele Yesu acili nakuhandeka, kuezile yala umo kuhuma ku njivo ya Njailosi, kaha uahandekele nguendi, "Munove ua mpuevo natsi keti uyandese mulongisi naua."

50 Vuno honi Yesu hakuvua eci uahandekele kuli Njailosi nguendi, "keti uvue liova, tsiliela lika, kaha akayoya naua."

51 Omo Yesu uahetele ku njivo ya Njailosi, katavesele muntu kukovela nendi kuvanga lika Petulu, na Yiuano, na Yakomba, na vaishe na vaina vauje mumbanda. 52 Ha ntsimbu ije, vantu voshe vakele nakusikoka na kulila. Kaha Yesu uahandekele nguendi, "Eceleni kulila, katsile vuno honi nakosa tulo."

53 Vamujolele, muomu vazivukile nguavo natsi. 54 Vuno honi Yesu uamukuatele ku livoko, kaha uahandekele nguendi, "Muanike, hinduka!" 55 Muono uendi uahilukile kaha ha ntsimbu ijevene uemanene. Kaha Yesu ualekele visemi vendi linga vamuhane viakulia alie. 56 Visemi vendi vali komokelele, vuno honi Yesu uavashikile linga keti valeke cipue umo vije vialingiuile.