1 Ha ntsimbu ije kuakele vantu vamo valekele Yesu via Vangalileya vaje Pilato uatsihile, tele valinakulambula vinkombelo viavo kuli Njambi. 2 Yesu uavehuile nguendi, "Nkuma yeni muayongola ngueni vaje Vangalileya vakevo vapuile vaka vupi cikuma kupulakana Vangalileya voshe, muomu vakevo vavatsihile mu ngila eyi ndi? 3 Njimileka nguange, houe! Vuno honi nga kumutenguluka mukanonga ngue vakevo naua. 4 Singaniekeni vaje vantu likumi na vatanu na vatatu vaje vatsile omo njivo yalaha cikuma ya mu Siloame yavauililile. Nkuma musinganieka ngueni vaje vapuile vaka vupi cikuma, kupulakana voshe vaje vakele mu Yelusalema ndi? 5 Njimileka nguange, houe! Vuno honi kuvanga mutenguluke keti ngoconi mukanonga ngue vakevo naua."

6 Kaha Yesu uavatelele cisimo eci nguendi, "Kuakele yala umo uakunine muti ua mukuyu mu lihia liendi. Kaha uayile nakumonako indi unemi vushuka vuno honi kavu uaneneko. 7 Kaha uahandekele kuli ndimi yendi nguendi, ‘Tala, mu miaka itatu njinakala nakuija nakutondako vushuka oku ku muti ua mukuyu, hanga nakamo kanjinauanako kahi. Utete! Nkuma vikahoni utualelelaho kushamuisa livu eli?’ 8 Vuno honi uje ndimi uamukumbuluile nguendi, ‘Muene, acitaleleleko muaka umo naua, njikahindako kuuzengeleka nakuhakako vuilo. 9 Nga ukema vushuka mungolosika, kaha muacili, vuno honi nga kuukemi, ambahoni njikauteta.’"

10 Ha litangua limo lia Sapalalo Yesu uakele nakulongesa mu njivo ya malombelo. 11 Kaha kuakele mpuevo uje uakele na cimbembesi ca cipi cije camu vavalesele miaka likumi na itanu na itatu. Kaha ikeye uakotamene kasele kuhetuka. 12 Omo Yesu uamumuene, uamusanene nakuhandeka kuli ikeye nguendi, "Mpuevo, unakanguka ku mushongo uove." 13 Kaha Yesu uasalekele mavoko endi hali ikeye, kaha hajevene uahetukile na kuputuka kushangazala Njambi.

14 Vuno honi mukuluntu ua mu njivo ya malombelo uanienguele muomu Yesu uakanguisile muntu ha litangua lia Sapalalo, uakele na kuhandeka ku vantu nguendi, "Kuli matangua atanu na limo aje tunapande kupanga vipangi. Ijeni mu matangua aje linga vamikanguise, keti ha litangua lia Sapalalo."

15 Ambahoni Muene uamukumbuluile nguendi, "Yeni vaka civembulu! Nkuma yeni kumue kushokoluela vangombe veni cipue vimulu veni nakuvatuala ku mema ha litangua lia Sapalalo ndi? 16 Taleni ou Mpuevo! Ikeye mutekuluila ua Avilahama uje yakutile Satana ha miaka likumi na itanu na itatu. Nkuma kuvapandele kumuzitula ha litangua lia Sapalalo ndi?" 17 Omo uahandekele evi, kaha vitozi vendi voshe vovuileshuamua, kaha vantu voshe va vuahelelele ha viuma viakukomouesa viacili vije vialingile.

18 Ambahoni Yesu uavehuile nguendi, "Vumuene vua Njambi vunapu ngue vika? Nkuma njivusetekesa na vika? 19 Vunapu ngue muje, muntu anona kanona kamo kambuto ya musalata nakukakuna mu lihia liendi. Kaha kakakola kapua muti uakama, kaha tuzila veja vakutungila mashua avo ku mintango yauo."

20 Kaha naua Yesu uavehuile nguendi, "Vumuene vua Njambi njivusetekesa na vika? 21 Vunapu ngue cimbaluila cije mpuevo uanonele naku shingasana na vunga vua vuingi vua tiliku mu lilonga, noho mukasha uoshe uafutunukile."

22 Yesu uahitile mu Vinganda na mu membo, ualongesele vantu oku ali mu vungenzi vuakuya ku Yelusalema. 23 Kaha umo uamuhuile nguendi, "Muene, nkuma vavandende lika vakovoka ndi?"

Yesu uamukumbuluile nguendi, 24 "Licikinineni ngeci mukovele mu cikolo ca cindende, muavusunga muomu vavengi vakatonda ku kovelamo vuno honi kuvakasa. 25 Omo vavenia njivo akemana na kushoka lipito, kaha mukemana hambanza na kutota ha lipito ngueni, ‘Muene, tushokolueleko!’ Kaha akamikumbulula nguendi, ‘Kunjizivuka oku kumuhuma.’ 26 Ambahoni mukaputuka kuhandeka ngueni, ‘Tualile na kunua nove, kaha ualongesele mu vinganda vietu.’ 27 Vuno honi akahandeka naua nguendi, ‘Kunjizivuka oku muhuminina, humeni kuli yange, yeni voshe vaka kulinga viavipi!’ 28 Mukalila na kulishumanga ku mazo omo mukamona Avilahama, na Isake, na Yakomba, na tunanguizi voshe mu Vumuene vua Njambi, vuno honi yeni vakamiumbila hambanza. 29 Vantu vakahuma mu ngangela na mu kangombe kayambi, naku kunto na mu mbuela, vakatumama ku ciuano mu Vumuene vua Njambi. 30 Cilivene vaka kukotokela vakapua vaka kulivanga, kaha vaka kulivanga vakapua vakevo vaka kukotokela."

31 Ha ntsimbu ijevene kuezile Vafaliseho vamo kuli Yesu na ku handeka nguavo, "Unapande kuhuma kuno uye kueka, muomu Helonde atonda kukutsiha."

32 Yesu uavakumbuluile nguendi, "Yeni mukamuleke uje mbanje ngueni, ‘Njicili nakuhumisa mahamba na kukanguisa vantu kumavezi avo ku litangua lialelo na imene, kaha ha litangua lia mucitatu ambahoni njikamanesa vipangi viange.’ 33 Cipue ngocovene njinapandele kuenda lelo na imene na imenevuze, muomu keti cacili kuli kananguizi kutsila kueka vuno honi kuvanga mu Yelusalema.

34 "Yelusalema, Yelusalema, yove muka kutsiha tunanguizi nakuasha mavue vaje vava tumine kuli yove! Vintsimbu viavingi njatondele kukungulula vantu vove hamolika ngue cali muakavutikiya vana vendi mu mambava endi, vuno honi yove ku uanjitavesele! 35 Tala, njivo yove ikasala ya mupulungua. Njikuleka nguange, kuukanjimono naua kuvanga noho ntsimbu ikeja omo ukahandeka nguove, ‘Uakuvezika uje eja mu lizina lia Muene.’"