1 Ha litangua limo omo Yesu uakele nakutalazeka, kaha uamuene vaka kufuka vali nakuhana milambu yavo mu njivo ya Njambi, 2 kaha naua uamuene ntuluue umo ua cihutu uje uahanene tumbongo tuvali tua muuaya uaya tua vunengu. 3 Kaha Yesu uahandekele nguendi, "Muavusunga njimileka nguange, ou ntuluue ua cihutu nalambula viavingi kupulakana voshe vaje vantu vakufuka, 4 njahandeka evi muomu veka vanalambula via kusalaho ku vufuko vuavo, vuno honi ou mpuevo nalambula vioshe vianakele navio via kulikuasa navio."

5 Vamo va vandongisi va Yesu vakele nakuhandeka ha njivo ya Njambi, ha vucili vua mavue aje vaitungisile, na vuana vuje vakele nakuhana muku ivuahesa, kaha Yesu uahandekele nguendi, 6 "Maneni njimileke ha viuma vioshe evi munamono. Ntsimbu ikaheta omo vaka humisa livue lioshe mu muhela ualio, kaha mavue oshe akasiuka."

7 Vandongisi va Yesu vamuihuile nguavo, "Mulongisi, muaka muka evi viuma vikalingiua?" Na cimueso muka tuzivuka naco nguetu ntsimbu inahete ya viuma vioshe evi vilingiue.

8 Yesu uahandekele kuli vakevo nguendi, "Zangameni keti vamikuise. Vantu vavengi vakeja mu lizina liange na kuhandeka nguavo, ‘Yange vene ikeye!’ Kaha naua nguavo, ‘Ntsimbu inahete honi!’ Vuno honi keti mukava kavangeye. 9 Omo mukevua vinzita na kulitengulukila, keti mukateue, viuma evi vinapande kulingiua tahi, vuno honi ku vilumbununa ngue kuhua ca mavu cili muyehi."

10 Ambahoni Yesu uahandekele naua nguendi, "Cifuti cikalua nzita na cifuti cikuavo, kaha vumuene vukalua na vumuene vukuavo. 11 Kukakala mandunduma, na njala yakama, na mishongo ya kulitambuisa ku vihela viakuliseza seza, kukakala viuma viakuteuesa na vimueso viaku komouesa vije vikahuminina muilu. 12 Omo ntsimbu kanda viuma evi visholoke, vakamikuata na kumiyandesa, vakamituala kuvi njivo via malombelo avo naku mihaka mu tumenga, kaha vakamituala ku vimiene naku vanguvulu mukumieseka muomu ya lizina liange. 13 Ikapua ntsimbu yacili kuli yeni ya kuambulula Muzimbu Uacili. 14 Nankuma, vihakeni mu mitima yeni keti muvisinganiekele vualumo ngueni vika tukahandeka, 15 muomu njikamihana mana akuzivuka vije vimukahandeka linga vitozi veni kuvakasa kumihisa cipue kuviana vimukahandeka. 16 Cipue visemi veni, na vamuanoko, na vavushoko veni na vavusamba veni vakamienda vungungu. Kaha vamo hakati keni vaka vatsiha. 17 Kaha voshe vakamizinda muomu ya lizina liange. 18 Vuno honi cipue cinkambu cimo caku mutue ueni ku cikazimbala. 19 Koleseni ngoo, kaha mukohiela miono yeni.

20 "Omo mukamona Yelusalema vana izengeleka ku civunga ca masualale, kaha zivukeni ngueni kunonga cayo cili muyehi. 21 Ambahoni vaje vali mu Yundeya vanapande kuteuela ku minkinda, kaha na vaje vali mu nganda vapande kuhumamo, kaha vaje vali hambanza lia nganda naku mehia vanapande keti vakovelemo mu nganda. 22 Aua akeuo matangua a kashitiko, vivahandekele mu visoneka linga vilishulisise. 23 Luvinda ku vampuevo vaje vakakala na mazimo na vampuevo vaje vaka jamuesa ha ntsimbu ije! Tuyando tuakama tukeja ha cifuti eci, na vukalu vua Njambi vukeja hali vantu ava. 24 Kaha vamo vaka vatsiha na mukuale, kaha vakuavo vakavatuala ku vunzinda ku mafuti eka, kaha vaje keti Vayunda vaka pihisa Yelusalema noho ntsimbu yavo ikaheta.

25 "Kaha viuma via kukomouesa vikalingiua ku litangua, naku ngonde naku vingongonosi. Vantu voshe vaha mavu vakevua liova lia kuohia ca cisali na kukuma ca mankimba kaha kuvakazivuka vivakalinga. 26 Vantu vaka lezimuka ku liova omo vakavandamena vije vikasholoka hano ha mavu oshe, muomu viuma vioshe via muilu vikalininganga. 27 Kaha vakamona Muna Muntu akeja mu mashuelua na nzili na vumpau vuakama. 28 Omo viuma evi vikaputuka kulingiua, kaha katukeni nanzili na kutala kuilu, muomu kuohiela ceni cili muyehi."

29 Ambahoni Yesu uavatelele cisimo eci nguendi, "Singaniekeni ha muti ua mukuyu na miti yeka yoshe. 30 Omo mumona maputa auo aputuka kuzovelela, munapande kuzivuka ngueni ntondue ili muyehi. 31 Kaha mucifua aci vene, omo mukamona viuma evi vilingiua muzivuke ngueni Vumuene vua Njambi vuli muyehi.

32 "Muavusunga njimileka, viuma vioshe evi vikalingiua oku vantu voshe va ntsimbu ino vaciyoya. 33 Melu na mavu vikahita, vuno honi mezi ange kakahiti.

34 "Zangameni! Keti mushoshomue cikuma mitima yeni ku via viuano, na viakulia, na via kunua viakupendesa na kulinienga ha viuma vije via ha mavu. Nga muvilinga litangua lije lika miniangumuna ngue mu ukapiluka muheto. 35 Litangua lije likeja ku vantu voshe vali hano ha mavu. 36 Livuaheseleni na kulombela ntsimbu yoshe linga mukakale na nzili yakuhiana vioshe vije vikalingiua nakuimana ku mesho a Muna Muntu."

37 Yesu uakale na kulongesa mu njivo ya Njambi ha matangua aje, kaha kuheta ku ntsimbu ya cinguezi, uakele nakuhumamo na kuya ku munkinda ua Oliveta kukakalako vutsiki vuoshe. 38 Ku cimene na cimene coshe vantu voshe vakele nakuya mu njivo ya Njambi na kumuvuilila.