1 Omo ntsimbu yahetele muyehi ya ciuano ca kulia mbolo ya kuhona cimbaluila, cije civasana nguavo Ciuano ca Paseka. 2 Kaha vakuluntu va vasasendote na valongisi va mezi a Lishiko, vatondele ngila ya vushueke ya kutsilamo Yesu muomu vakele na liova lia vantu.

3 Ambahoni Satana uakovelele muli Yundasa uje ivasana Sakaliote, umo uavaje likumi na vavali ua vandongisi. 4 Kaha Yundasa uayile na kukahande ku vakuluntu va vasasendote na vaka kuniunga Njivo ya Njambi, uavamuesela ngila yakuendela Yesu vungungu. 5 Kaha vakevo vavuahelelele cikuma, valitavasanene kumuhana vimbongo. 6 Yundasa uatavele, kaha uatondele ngila imo ya kuendelamo Yesu vungungu cakuhona vantu kuzivuka.

7 Litangua liahetele lia ciuano ca mbolo ya kuhona cimbaluila, omo vatsihile vana va vampanga vakulia ha ciuano ca Paseka. 8 Yesu uatumine Petulu na Yiuano nguendi "Yemuye muka vuahesele vualumo kutukalila ciuano ca Paseka."

9 Kaha vamuihuile nguavo, "Kuli kuje utonda linga tuka civuaheleseko?"

10 Yesu uavakumbuluile nguendi, "Omo mukakovela mu nganda, muka uana muntu nambata njava ya kutekuila mema. Mukaveni noho akaheta mu njivo ije yakakovela. 11 Handekeni kuli vavenia njivo ngueni, ‘Mulongisi natutumu kukuihula nguendi, ulikuli mulili uje yange na vandongisi vange utukalila ciuano ca Paseka?’ 12 Kaha akamimuesa mulili uakama helu lia njivo, vanauvuahesa vualumo, kuje kukeko mukavuahesela."

13 Kaha vayile vauanene viuma vioshe ngue muavalekelele Yesu, vavuahesele viakulia via ciuano ca Paseka.

14 Omo ntsimbu yahetele Yesu uatumamene ku mesa hamo na tunganda vendi. 15 Uahandekele kuli vakevo nguendi, "Njatondele cikuma kulia eci ciuano ca Paseka hamo neni ntsimbu kanda njiyande, 16 muomu njimileka nguange, kuhuma lelo kunjikacili naua kuvanga noho calishulisisa muacili mu Vumuene vua Njambi."

17 Ambahoni Yesu uanonele nganja ya viniu, kaha uatsantselele kuli Njambi, nakuhandeka kuli vandongisi vendi nguendi, "Ambateni nganja eyi mulishumuine hakati keni. 18 Njimileka nguange, kuhuma lelo kunjikanu naua neni viniu kuvanga noho Vumuene vua Njambi vuneja."

19 Uambatele naua mbolo uatsantselele kuli Njambi, kaha uaipazuile uava haneneyo nguendi, "Eyi inapu muvila uange uvanahana hali yeni. Lingeni lingeni eci mukunjivuluka." 20 Mu cifua cimo vene omo vamanusuile kulia ca cinguezi, uambatele nganja uahandekele nguendi, "Eyi nganja inapu litavasano lialiha lia Njambi livanakutu na maninga ange aje ahitilile hali yeni.

21 "Vuno honi taleni! Ou anjenda vungungu ali hamo nange kuno ku mesa! 22 Muna Muntu akatsa ngue muje muatondelelemo Njambi, vuno honi tuyando tuendi uje akamuenda vungungu!" 23 Kaha vandongisi vendi vaputukile kulihozola hakati kavo nguavo, iya honi akalinga cuma eci.

24 Kaha kuaputukile vimpata hakati ka vandongisi nguavo, iya umo hakati kavo napu uakama cikuma. 25 Yesu uandekele kuli vakevo nguendi, "Vimiene va vaje keti Vayunda vali na nzili ha vantu vavo. Kaha vaje vaka kuyula vavatumbula vakuasi va vantu." 26 Vuno honi eyi keti ikeyo ngila hakati keni, vuno honi uoshe uje uakama hakati keni napande kupua uamundende, kaha ntuama yeni napande kupua ngue ngamba. 27 Iya uakama cikuma? Nkuma uje natumama alia, indi uje muka kupanga viakulia? Nkuma keti uje natumama alia ku mesa ndi? Vuno honi yange njili hakati keni ngue uje muka kupanga.

28 Yeni munakala nange mu tuyando tuange tuoshe. 29 Ngue muje muananjihana Tate nzili ya kuyula, neni naua njikamihana nzili yakuyula, 30 linga neni mukalie na kunua ku mesa yange mu Vumuene vuange, kaha mukatumama ha matanda nakuyula miyati likumi na ivali ya Isaleli.

31 Simoni, Simoni! Ivuilila, Satana atonda kumuhangununa muva voshe, ngue muje muvakahangununa tiliku ku mujungu. 32 Vuno honi yange njakulombelela linga lutsilielo luove keti luhue. Kaha omo ukatenguluka na kuhiluka kuli yange, unapande kukolesa vamuanoko.

33 Vuno honi Petulu uamukumbuluile nguendi, "Muene, njalivuahesela laja kuya nove mu kamenga na kukatsa nove!"

34 Yesu uamukumbuluile nguendi, "Muavusunga Petulu njikuleka nguange," "Vutsiki vuno vene ntsimbu kanda ndemba atambeke, ukanjiviana lutatu."

35 Yesu uehuile vandongisi vendi nguendi, "Muje njamitumine cakuhona cikuama, cola cipue vinkaku nkuma muahonoueleko cuma cimo ndi?"

Kaha vamukumbuluile nguavo, "Houe!"

36 Yesu uahandekele kuli vakevo nguendi, "Vuno honi ntsimbu ino, ou ali na cikuama cipue cola napande kuambata, kaha uoshe nahonoua mukuale napande kulandesa kazaku kendi alande mukuale. 37 Muomu vanacisoneka nguavo, ‘Vamutandelele kumo na vaka kushaula Lishiko.’ Kaha njimileka nguange eci cinapande kulishulisisa hali yange. Eyo vioshe vije vivanasoneka hali yange vili nakulishulisisa."

38 Vandongisi vahandekele nguavo, "Muene tala! Kuli mikuale ivali eyi!"

Kaha uavakumbuluile nguendi, "Mukemo vene!"

39 Yesu uahumine mu nganda, kaha uayile ku munkinda ua Oliveta ngue muje muakele nakulingilamo. Kaha vandongisi vendi vamukavele. 40 Omo uahetele kuje uavalekele nguendi, "Lombeleni linga keti mukovele muvieseko."

41 Kaha uahumine kavundende kuli vakevo kaha uatsikamene nakulombela nguendi, 42 "Tate nga utonda uhumisa eyi nganja ya tuyando kuli yange. Keti ngue ku cizango cange, vuno honi cizango cove cilingiue. 43 Kangelo uahumine muilu uasholokele kuli ikeye na kumusimpisa. 44 Muomu ya tuyando tuakama ualombelele cikuma, kaha ntuima yendi yapuile ngue mambase a maninga anduekela ha mavu."

45 Kaha omo uakatukile kuhuma mu kulombela, uayile kuli vandongisi vendi uavauanene vanakosa tulo, muomu vazeyele na vusiua. 46 Kaha uahandekele kuli vakevo nguendi, "Vikahoni muakosela? Hindukeni mulombele, linga keti mukovela muvieseko."

47 Tele Yesu uakele nakuhandeka navo, hajevene civunga ca vantu cahetele. Yundasa Sakaliote uje uava likumi na vavali uavatuamenene. Kaha uashuenene kuli Yesu na kumuntsemba. 48 Vuno honi Yesu uahandekele kuli ikeye nguendi, "Yundasa nkuma yove uenda Muna Muntu vungungu na kumutsemba ndi?"

49 Kaha omo vandongisi vaje vakele hamo na Yesu vamuene vije vialingiuile vahandekele nguavo, "Muene tulikuasese mikuale ndi?" 50 Kaha umo ua vandongisi va Yesu uavatuile lituitui lia cilio lia ngamba ua kasasendote uakama.

51 Vuno honi Yesu uamu vianesele nguendi, "Ecela." Kaha uakuatele lituitui lia uje yala nakulihiluisilako naua.

52 Ambahoni Yesu uahandekele kuli vaje vakuluntu va vasasendote na kuli vamo vakuluntu va vaka kuniunga njivo ya Njambi na ku vakuluntu vaje vezile na kumukuata nguendi, "Nkuma muneja na mikuale na vimbueti ngue njimuizi ndi? 53 Njinakele neni mu njivo ya Njambi ha matangua oshe vikahoni kumua njikuatelele. Vuno honi eyi ikeyo ntsimbu yeni, omo nzili ya milima ili nakuyula."

54 Vakuatele Yesu kaha vamutualele ku njivo ya Kasasendote uakama, kaha Petulu uamukavele munima uakele halahako. 55 Vamo vavuekele tuhia mukati ka cipango vatumamene nakuota, kaha Petulu uatumamene navo. 56 Omo ngamba umo uampuevo uamuene Petulu natumama kuje ku tuhia, uamutalele ntooma, kaha uahandekele nguendi, "Yala ou naua uakele hamo na Yesu."

57 Vuno honi Petulu uavianene nguendi, "Yove mpuevo yange kunjimuzivuka!"

58 Kaha omo kuahitile ka ntsimbu kakandende, yala ueka naua uamuene Petulu, kaha uahandekele nguendi, "Nove naua u umo uavo" Vuno honi Petulu uamukumbuluile nguendi, "Ove yala houe, keti yange!"

59 Omo kuahitile ka ntsimbu lika, kaha yala mukuavo naua uahandekele nanzili nguendi, "Ou yala cilivene uakele hamo na Yesu, nendi naua Kangalileya!"

60 Vuno honi Petulu uamukumbuluile nguendi, "Ove yala yange kunjizivuka evi ulinakuhandeka!"

Vuno honi hajevene tele acili nakuhandeka, ndemba uatambekele. 61 Kaha Muene uatengulukile uatalele kuli Petulu, kaha Petulu uavulukile vije via mulekele Muene nguendi, "Ntsimbu kanda ndemba atambeke vutsiki vuno vene ukanjiviana lutatu" 62 Kaha Petulu uatuhukile hambanza na kulila cikuma.

63 Vamala vaje vaniungile Yesu vamushendumuine na kumupupa. 64 Vamukutile tanga ha mesho, kaha vahandekele kuli ikeye nguavo, "Handeka vunanguizi! Iya na kupupu?" 65 Vahandekele viuma viavingi via kumushaula.

66 Omo kuacele vakuluntu voshe va vantu valiuanene hamolika. Vakuluntu va vasasendote, na valongisi va mezi a Lishiko voshe kuvakele, kaha vanehele Yesu ku mpunga yavo. 67 Kaha vamuihuile nguavo, "Tuleke, yove Kilistu ndi?"

Kaha Yesu uavakumbuluile nguendi, "Cipue nga njimileka nguange yange, kumukanjitsiliela." 68 Kaha naua nga njimihula cihula, kumukasa kunjitava. 69 Vuno honi hume lelo Muna Muntu akatumama ku livoko lia cilio lia Njambi muka nzili yoshe.

70 Kaha voshe vamuihuile nguavo, "Nkuma yove u Muna Njambi ndi?"

Ikeye uavakumbuluile nguendi, "Mukemo vene, mu munahandeka."

71 Kaha vahandekele nguavo, "Vikahoni tutondela naua vukaleho vueka? Yetu vavenia tualivuila laja muanacihandeka."