1 Ambahoni mpunga yoshe yakatukile na kutuala Yesu kuli Pilato. 2 Kaha vaputukile kumuvangeya nguavo, "Tuauana ou yala alina kutanganesa vantu vetu mukuvaleka linga keti vafuete lisimu kuli Sezale, kaha alinakuhandeka naua nguendi ikeye Kilistu Muene."

3 Nankuma Pilato uamuhuile nguendi, "Nkuma yove Muene ua Vayunda ndi?"

Yesu uamukumbuluile nguendi, "Mukemo vene munahandeka."

4 Ambahoni Pilato uahandekele ku vasasendote vakama na civunga nguendi, "Yange kunjauanene mulonga kuli ou muntu."

5 Vuno honi vakevo vahandekele na nzili nguavo, "Ikeye alinakulinga mpindakano ku vantu na vilongesa viendi linga valuise Yundeya yoshe. Uaputukilile mu Ngalileya, kaha hano honi nejakuno."

6 Omo Pilato uevuile eci, kaha uehuile nguendi, "Nkuma ou yala Kangalileya ndi?" 7 Omo Pilato uazivukile ngeci Yesu uahumine ku nganda ije yakele nakuyula Helonde, kaha uamutumine kuli muene Helonde, uje naikeye uakele mu Yelusalema ha ntsimbu ije. 8 Helonde uavuahelele cikuma omo uamuene Yesu, muomu uovuile viendi kaha na laja uakele nakutonda cikuma kumumona. Uakele nalishungu lia kumona Yesu alinga vikomoueso. 9 Nankuma Helonde uehuile Yesu vihula viavingi, vuno honi Yesu katavele cipue lizi limo. 10 Kaha vakuluntu va vasasendote na valongisi va mezi a Lishiko vayile kulutue nakuvangeya Yesu muakama. 11 Kaha Helonde na masualale vendi vamushendumuine naku mulinga mua mupi, ambahoni vamuzikile kazaku kandando yakama, kaha vamuhiluisile kuli Pilato. 12 Kaha ha litangua lije vene Helonde na Pilato valikuatele vusamba, vuno honi tele kanda evi vapuile muntu na citozi cendi.

13 Pilato uasanene hamo vakuluntu va vasasendote na vantuama na vantu, 14 kaha uahandekele kuli vakevo nguendi, "Muanehe ou yala kuli yange na kuhandeka ngueni alina kutanganesa vantu. Ivuilileni, yange njamuihuile ku mesho eni, kaha kunjauanene mulonga ua cuma cimo cacipi cimunamuvangeya. 15 Cipue Helonde kauanene mulonga muli ikeye mukemo namuhiluisa kuli yetu. Ou yala kukuesi cuma canalingi linga va mutsihe. 16 Njikamupupa lika kaha njikamuecela linga aye." 17 Kuakele cilika cavo cije Pilato uatondele kuhumisila vantu cinzinda umo mu kamenga uje ivatondele ha ntsimbu ya Ciuano ca Paseka.

18 Kaha civunga coshe ca vantu ca tambakanene nguavo, "Mutsihe!" Tuhumisele Mbalambasa. 19 (Mbalambasa vamuhakele mu kamenga muomu uakele nakuneha mpindangano mu nganda na kuntsiha vantu)

20 Vuno honi Pilato uatondele kuecela Yesu, kaha uahandekele naua ku civunga. 21 Vuno honi voshe vatambekele cikuma nguavo, "Mushukike! Mushukike!"

22 Kaha Pilato uahandekele naua lua mucitatu nguendi, "Vupi muka vuanalingi? Yange kunjauanene cuma cimo ca kumutsihila! Njimupupa lika na kumuecela aye."

23 Vuno honi vantu vatualeleleho kutambeka nguavo Yesu vamushukike, kaha ha kutambeka cavo uavahaneneye. 24 Nankuma, Pilato uatetele cije cimpande, ngue muvalombele vakevo. 25 Kaha Pilato uecelele Mbalambasa muntu ivatondele, uje uakele mu kamenga ha mulonga uakuneha mpindangano na kutsiha vantu. Kaha uavahanene Yesu linga vamulinge muje muvatondelele vavenia.

26 Kaha masualale vatualele Yesu mukumushukika, tele vali nakuya valiuanene na yala umo ua lizina lia Simoni uaku Silene, uje uezile mu nganda. Kaha vamukuatele nakumutuika cilindakano ca Yesu kaha vamulekele linga akave Yesu munima.

27 Civunga cakama ca vantu ca mukavele, hakati kavo hakele vampuevo vaje vakele nakulilila cikuma muomu ya ikeye. 28 Yesu uatengulukile kuli vakevo nakuhandeka nguendi, "Yeni vampuevo vamu Yelusalema! Keti mulile yange vuno honi lilileni yeni vavenia na vana veni. 29 Muomu matangua alina kuija omo vantu vakahandeka nguavo, ‘Vakukuisula vantsimpi, vaje kuvasemene tukeke na vaje ku vajamuesele.’ 30 Ikapua ntsimbu ije vantu vakahandeka ku minkinda nguavo, ‘Tuuileni! Naku minkinda yaindende nguavo, tufuikeni!’ 31 Muomu nga valinga viuma evi ku muti uakutontola, kaha honi cikafua vati ku muti uakuma?"

32 Kaha naua kuakele mihuza vavali va vamala vavatualele hamo na Yesu na kuvashukika. 33 Omo vahetele kucihela cije vatumbuile nguavo, "Cikola," kaha vashukikile Yesu ha cilindakano na vaje mihuza vavali umo ku livoko liendi lia cilio mukuavo ku livoko lia cimoshue. 34 Yesu uahandekele nguendi, "Tate vakonekele! Muomu kuvazivuka cije civalinakulinga."

Kaha masualale valipangezelele vuzalo vuendi na kuta nkela. 35 Vantu vemanene kuje nakutalela tele vantuama va Vayunda vamushendumuna nguavo, "Uovuele vakuavo, nendi aliovole ikeye vavenia nga ikeye Kilistu uje yanahangula Njambi!"

36 Kaha masualale vamushendumuine naua vezile hayehi kuli ikeye vamuhanene viniu via kushasha. 37 Vahandekele kuli ikeye nguavo, "Liovole yove vavenia nga u Muene ua Vayunda!"

38 Helu lia cilindakano cendi hakele mezi aua nguavo, "Ou ikeye Muene ua Vayunda."

39 Kaha muhuza umo ivamushukikile hamo nendi uahandekele lizi lia kumushaula nguendi, "Nkuma keti yove Kilistu ndi? Liovole yove vavenia netu naua utuovole!"

40 Kaha uje mukuavo muhuza uamutenukilile nguendi, "Nkuma yove kuvuila Njambi liova ndi? Indi muomu unatambula cihiso cimo nendi. 41 Cihiso cetu cinatupande, muomu tunambata fueto ya vilinga vietu, vuno honi yala ou kesi na vupi." 42 Kaha uahandekele kuli Yesu nguendi, "Yesu njivuluke omo ukeja mu vumuene vuove."

43 Yesu uamukumbuluile nguendi, "Muavusunga njikuleka nguange lelo vene ukakala hamo nange mu Palandaisi."

44 Omo tele litangua lili hakati ka mutue, kaha litangua liazivalele kuakekele milima ha mavu oshe kutuala noho ha ntsimbu ya mucitatu ya mutania ua cinguezi. 45 Kaha ntanga ije yakele mu njivo ya Njambi yatavukile hakati kuhuma kuilu na ha mavu. 46 Kaha Yesu uatambekele na lizi liakama nguendi, "Tate! Njihaka cimbembesi cange mu mavoko ove." Hanima yakuhandeka mezi aua uatsile.

47 Omo mukuluntu ua masualale uamuene vije vialingiuile, uashangazalele Njambi nakuhandeka nguendi, "Muavusunga yala ou uapuile muka vusunga."

48 Omo vantu vaje vakungulukile ku cihela cije vamuene viuma vije valingiuile, kaha vahilukile ku vinjivo viavo oku valipupanga ha vintulo viavo mu vusiua. 49 Kaha voshe vaje vazivukile Yesu ha mutuntu uendi hamo na vampuevo vaje vamukavele kuhuma ku Ngalileya vemanene kulahako nakutala viuma evi.

50 Kuakele yala umo lizina liendi Yosefa uaku Alamatiya mu nganda ya Yundeya. Uapuile yala uacili ua kasingimiko, 51 uje uakele nakuvandamena kuija ca Vumuene vua Njambi. Cipue vene uapuile umo uamu mpunga, katavele ku vutumbe na vilinga viavo via kuluisa Yesu. 52 Uayile kuli Pilato nakulomba muvila ua Yesu. 53 Ambahoni uahumisile muvila ua Yesu ha cilindakano, kaha ua uzengelele ha ntanga ya liniu, kaha ua ulangekele mu cihilo cije civa cokuele mu livue cije kanda vantsindemo muntu. 54 Liapuile litangua lia mucitanu cinguezi omo litangua lia Sapalalo kanda lihete.

55 Vampuevo vaje vakavele Yesu kuhuma ku Ngalileya vayile hamo na Yosefa, vakamuene cihilo cije nakumona muje muvalangekelelemo muvila ua Yesu. 56 Ambahoni vayile ku vinjivo viavo nakukavuahesa mazi aluengo luakunika muacili linga vakavuavese muvila ua Yesu.

Kaha ha litangua lia Sapalalo vahuimine kuya ku Lishiko lia Mosesa.