1 Ha litangua limo lia Sapalalo Yesu na vandongisi vendi vakele nakuhita mu mehia a tiliku. Vandongisi vendi vaputukile kutomona mitue ya tiliku, vaitsenene mu mavoko avo, kaha valile vinona. 2 Kaha Vafaliseho vamo vaje vakele kuje vavehuile nguavo, "Nkuma vika mulina kulingila evi kuvekulinga ha litangua lia Sapalalo?"

3 Yesu uavakumbuluile nguendi, "Nkuma kanda mutande vije vialingile Ndaviti na vaje vakele hamo nendi omo vazivile njala ndi? 4 Uakovelele mu njivo ya Njambi, uanonene ije mbolo ivakombelele kuli Njambi, ualile, na kuhanako naua vantu vendi. Mbolo ije kuya ku lishiko lietu kuvapandele kuyilia ku muntu uoshe kuvanga lika vasasendote."

5 Kaha Yesu uamanusuile kuhandeka nguendi, "Muna Muntu ikeye Muene ua Litangua lia Sapalalo."

6 Ha litangua lia Sapalalo likuavo Yesu uakovelele mu njivo ya malombelo, kaha ualongesele. Muakele yala umo uakusekua livoko lia cilio. 7 Kaha valongisi va mezi a Lishiko lia Mosesa na Vafaliseho vamo vatondele kashuilo hali Yesu linga vamu uaneneho mulonga, nankuma vamutalele ntooma muyehi linga vamone nga ikeye akanguisa uje muntu ha litangua lia Sapalalo. 8 Vuno honi Yesu uazivukile viyongola viavo, kaha uahandekele kuli uje yala uakusekua livoko nguendi, "Katuka uije kuno kulutue." Kaha uje yala uakatukile nakuya kuje. 9 Ambahoni, Yesu uahandekele kuli vakevo nguendi, "Njimihula nguange, cuma muka vanatutavesa ha lishiko lietu kucilinga ha litangua lia Sapalalo? Kupanga viacili indi kupanga viavipi? Kuovola muono ua muntu indi ku unongesa?" 10 Uatalele kuli vakevo voshe noku noku, kaha uahandekele kuli uje yala nguendi, "Olola livoko liove." Uoluele livoko liendi, kaha liakangukile.

11 Ha cuma eci valongisi va mezi a Lishiko lia Mosesa na Vafaliseho vakele na matoto, kaha valihandekesele hakati kavo vivapande kulinga kuli Yesu.

12 Ha ntsimbu ije Yesu ualondele ku munkinda na kulombela, kaha uakele nakulombela vutsiki vuoshe kuli Njambi. 13 Omo litangua liatuhukile, kaha uasanene vandongisi vendi linga veje kuli ikeye, kaha uahanguileho likumi na vavali hakati kavo, vaje vatumbuile tunganda. 14 Aua akeuo mazina avo: Simoni uje yalukile Petulu na munaina Anduleo, Yakomba na Yiuano, Filipu na Mbatolomeo, 15 Mateu na Tomasi, Yakomba muna Alufeya, na Simoni (uje ivatumbuile "Zelote.") 16 Yundasa muna Yakomba, na Yundasa Sakaliote uje uamuendele vungungu.

17 Omo Yesu na tunganda vendi vahumine ku munkinda kaha vemanene ku mutambela uaku jalamanena. Na civunga ceka cakama ca vandongisi vendi vakele kuje nakumuvandamena. Naua civunga cakama ca vantu cahumine ku Yundeya kuoshe na ku Yelusalema, naku vinganda via ku cikuma ca Tile na ku Sindone na vakevo vakele kuje. 18 Vezile nakumuvuilila na kuvakanguisa ku mishongo yavo. Voshe vaje vakele nakuyanda na vimbembesi via vipi vezile, kaha uavakanguisile. 19 Kaha civunga coshe ca vantu vesekele kumukuata, muomu nzili yahumine kuli ikeye na kuvakanguisa voshe.

20 Yesu uatalele vandongisi vendi, kaha uahandekele nguendi,

"Vakukuisula yeni vaka kuhutua,

muomu Vumuene vua Njambi vunapu vueni!"

21 "Vakukuisula yeni muli na njala hano,

muomu mukakuta!"

"Vakukuisula yeni mulinakulila hano,

muomu mukajolelela!"

22 "Muvakukuisula omo vantu vamizinda na kumiviana na kumishaula na kumitumbula nguavo muva vapi, muomu ya kukava Muna Muntu!" 23 Joleleni omo eci cilingiua, kineni na kujolela, muomu Njambi namivuahesela cikandelela ceni cakama muilu. Muomu vakukuluila vavo valingile ngacije kuli tunanguizi.

24 "Vuno honi tuyando kuli yeni munafuku laja,

muomu muatambula laja kuyoya cacili!"

25 "Tuyando tueni yeni munakuta hano,

muomu mukevua njala!"

"Tuyando tueni yeni muli nakujolela hano,

muomu muka pihilila na kulila!

26 "Tuyando tueni omo vantu voshe vali nakumishangazala, muomu vakukuluila vavo valingile muje vene ku tunanguizi va makuli.

27 "Vuno honi njimileka yeni vaka kunjivuilila nguange, zangeni vitozi veni, lingeni muacili kuli vaje vamizinda, 28 kuisuleni vaje vamisinga, kaha lombeleleni vaje vali nakumiyandesa. 29 Nga muntu akupupa ku litama limo, kaha mutenguluile akupupe ku litama likuavo naua, nga muntu akunieka kazaku kove, muhane naua na cikovelo cove. 30 Muntu uje amilomba muhaneni cuma cije canamilombo, omo muntu ambata cuma cove, kaha keti ucihule naua. 31 Lingileni ku vakueni vije vimutonda linga vamilingilevio.

32 "Nga muzanga lika vaje vamizanga, vikahoni mutambuila vishangala? Cipue vaka vipi vakazanga vaje vaka kuvazanga! 33 Nga mulinga lika muacili kuli vaje vaka kumilinga muacili, nkuma vikahoni mukatambuila vuana? Muomu cipue vene vaka vupi mukemo muvakalingi! 34 Nga mukumuisa lika vaje muavandamena ngueni vakamihiluisila, nkuma vikahoni mukatambuila vuana? Muomu cipue vene vaka vupi naua vakalikumuisa, linga vatambule ngue muje muvanahanena. 35 Vuno honi zangeni vitozi veni, kaha lingeni muacili kuli vakevo, vakumuiseni vuno honi keti muvandamene ngueni mukavitambula naua. Kaha vuana vueni vukapua vuakama, mukapua vana va Njambi ua Helu lia Melu. Muomu ikeye akevuila ngozi vaje kuve kumutsantsela na vaje vaka vipi. 36 Pueni vaka cikeketima ngue Ishueni uapua muka cikeketima.

37 "Keti musompe, kuteua neni vakamisompa, keti muhise, kuteua neni vakamihisa, konekeleni vakueni, kaha neni vakamikonekela. 38 Haneni, kaha neni vakamihana. Cikapua ngue muka kulandesa uje akuhana seteko ya vinona, aka izindangeya nakui niekumuna kaha akashulisisaho cikuma noho ishulisa mu vimbango via cisetekelo na kumuanianga kaha honi akakuhanavio vioshe. Seteko ije museteka nayo vakueni, ikeyo naua vakamiseteka nayo."

39 Yesu uavatelele cisimo eci nguendi, "Kapuputua kasa kutuamenena kapuputua mukuavo, nga alingamo voshe vavali vakauila mucina. 40 Kukuesi ndongisi apulakana mulongisi uendi vuno honi ndongisi uoshe, omo namanesa kulilongesa cendi, na ikeye naua akapua hamo na mulongisi uendi.

41 "Vikahoni umona kacishoni kali ha lisho lia mukueni, vuno honi ku uyongola mukambo uli mulisho liove? 42 Vatihoni uhandeka na mukueni nguove, ‘Mukuetu, teua njikuhumise kacishoni kali ha lisho liove,’ omo yove uli na mukambo mu lisho liove? Yove muka civembulu! Ha kulivanga humisa mukambo uli mu lisho liove, linga umone muacili hakuhumisa kacishoni kali ha lisho lia mukueni.

43 "Muti uacili ku uasa kuima vushuka vuavupi, cipue muti ua upi kuuasa kuima vushuka vuacili. 44 Muti uoshe vauzivukila ku vushuka vuauo, muomu kuuasa kuhela vushuka vua mukuyu ku muti ua mingonga cipue vushuka vua viniu ku muti ua mingonga naua. 45 Muntu uacili ikeye muka kusholola viuma via viacili via ku mutima uendi, muntu ua mupi akasholola viuma viavipi via ku mutima uendi muomu kanua kakahandeka vije viashula mu mutima.

46 "Nkuma vika munjitumbuila ngueni, ‘Muene, Muene’, vuno honi kumuekulinga vije vinjikamileke? 47 Njimileka cifua cendi uoshe uje eja kuli yange nakuvuilila mezi ange na ku uononoka. 48 Napu ngue yala uje atunga njivo yendi, uahindile nakulovesa luvula ha mavu a mavue. Livazi liezile liapupile kuje ku njivo, vuno honi kuyaningangele, muomu luvula luaije njivo luakele ha mavu a mavue. 49 Vuno honi uoshe uje evua mezi ange kuakuhona ku uononoka napu ngue yala uje uatungile njivo yendi kuakuhona kuhinda luvula. Omo livazi liapupile kuje ku njivo, kaha yasiukile hajevene, kuua kuayo kuapuile kuakupi cikuma!"