1 Yesu uahandekele kuli vandongisi vendi nguendi, "Kuakele yala umo ua kufuka uje uakele na muka kutulika vufuko vuendi. Muka kufuka uje vamulekele nguavo muka kutulika vitenga viove ali nakupihisa vimbongo viove. 2 Kaha uamusanene na kuhandeka nguendi, ‘Vika evi njili nakuvua hali yove? Njihane vukaleho vua viuma vioshe muje munatulikilamo vufuko vuange, muomu ku ukapu naua muka kutulika uange.’ 3 Muka kutulika ualihandekesele ikeye vavenia nguendi, ‘Nga muene uange anjihumisa vipangi, njilinga vatihoni? Kunjesi na nzili yakulima, nganjihuma vipangi kuno, kaha naua njili na shuamua yakulomba. 4 Kaha honi njazivuka vinjikalinga omo vipangi viange vikahua, ngeci vantu vakanjitambule mu vinjivo viavo!’ 5 Kaha uasanene vantu vaje vakele na mikuli kuli muene uendi. Uehuile uakulivanga nguendi, ‘Vungahi uakonguele kuli muene uange?’ 6 Uamukumbuluile nguendi, ‘Vihita vitanu na vitatu via mingomo ya mazi a olive.’ Kaha uje muka kutulika uahandekele naua nguendi, ‘Livulu liove eli lije limuesa makongo ove, tumama ha mavu sonekamo viseteko via vihita viuana via mingomo.’ 7 Ambahoni uehuile mukuavo ua mucivali nguendi, ‘Uakonguele cingahi?’ Kaha uamukumbuluile nguendi, ‘Cihita cimolika ca vinjeke via tiliku,’ kaha uamulekele nguendi, ‘Ambata livulu liove eli sonekamo makumi atanu na atatu a vinjeke via tiliku.’ 8 Kaha uje muene uendi uashangazalele uje muka kutulika uakuhona kulongua hakukala na mana, muomu vantu va mavu ano vazivuka muakukela navakuavo kupulakana vana vamu ceke."

9 Njimileka nguange, pangeseni vufuko vua ha mavu kulinga vusamba na vihutu. Kaha omo vufuko vueni vukahua, omo mukatsa vaka mitambula mu vihela via yaye. 10 Uoshe akala na vusunga muvia vindende na mu viakama akakala na vusunga, kaha uje kakala na vusunga muvia vindende kaha kakakala na vusunga mu viakama. 11 Kaha nga ku uakele na vusunga na vufuko vua ha mavu, iya honi akutsiliela na vufuko vua vusunga? 12 Kaha nga ku uakele na vusunga ha vitenga via muntu, nkuma iya honi akakuhana vufuko vuje vuakupande?

13 "Uahi ngamba asa kupangela vimiene vavali muomu uje ngamba akazindaho umo naku zangaho mukuavo, cipue alihanako kuli umo na kushaula mukuavo. Kuuasa kupangela Njambi na vimbongo."

14 Vafaliseho vaje vapuile vaka kuzanga vimbongo, omo vovuile vioshe evi, kaha vashendumuine Yesu. 15 Vuno honi Yesu uahandekele kuli vakevo nguendi, "Yeni vaje vaka kulimuesa kupua vaka vusunga ku mesho a vantu, vuno honi Njambi azivuka mitima yeni, muomu coshe cije vashangazala hakati ka vantu, ku mesho a Njambi cinapu cangoco.

16 "Lishiko lia Mosesa na tunanguizi vatuamenene vantu noho Yiuano muka kumbuitika uezile. Hume haje na ntsimbu ino Muzimbu Uacili ua Vumuene vua Njambi valinaku uambulula. Muntu uoshe alinakueseka cikuma kukovela mu Vumuene ovu. 17 Vuno honi cacasi melu na mavu kuhita kupulakana ka toma kakande kamu mukanda ua Lishiko lia Mosesa kuhua.

18 "Uoshe akondola mpueyendi na kuambata ueka nalingi vupangala, kaha uoshe ambata mpuevo uakukondola kuli yaliendi alinga vupangala.

19 "Kuakele yala umo uakufuka uje uakele nakuzala vuzalo vua vunengu vuandando yakutula, uakele na ciuano ca kulia cakama ha tangua na tangua. 20 Kuakele yala ua cihutu lizina liendi Lazalu uje ivakele nakuneha ku cikolo ca muka kufuka, uje uakele na vimbandu muvila uoshe, 21 uakele nakuvandamena kulia vije viakele na kuua ku mesa ya uje yala uakufuka, na tutali vakele nakuija na kuliasa ha vimbandu viendi. 22 Uje yala ua cihutu uatsile kaha tungelo vamuambatele kukakala na Avilahama. Kaha na uje yala uakufuka na ikeye naua uatsile kaha vamutsindile, 23 uakele mu ngehena na kuyanda. Uanduile mesho endi kaha uamuene Avilahama kulahako ali na Lazalu ku mukulo uendi. 24 Kaha uasanene nguendi, ‘Tate Avilahama, njivuileko cikeketima tuma Lazalu ambuitike munie uendi mu mema linga anjitontuese ha ndaka yange, muomu njili na kuvua kuvavala muno mu tuhia.’ 25 Vuno honi Avilahama uamukumbuluile nguendi, ‘Munange, vuluka ha ntsimbu yove ije uakele nakuyoya uakele nakutambula viuma viove viacili, na Lazalu ikeye uakele nakutambula via vipi, vuno honi ali nakuyoya muacili yove uli nakuvua kuvavala. 26 Kaha naua mukati kove netu hali cina cakama, ngeci uoshe atonda kujavuka kuhuma kuli yetu kuija oko keti ase, kaha naumo uahi asa kujavuka kuhuma oko kuija kuno kutuli.’ 27 Kaha yala ua kufuka uahandekele nguendi, ‘Honi, tate, njikulomba tuma Lazalu ku njivo ya tate, 28 muomu njili na vamunanana vatanu. Ecela Lazalu aye nakuvanangula linga keti vakeje naua kuno ku cihela ca tuyando.’ 29 Avilahama uakumbuluile nguendi, ‘Vali na visoneka via Mosesa na tunanguizi, vanapande kuvovuilila.’ 30 Uje yala ua kufuka uahandekele nguendi, ‘Houe tate Avilahama, vuno honi nga umo akasanguka kuvatsi aya kuli vakevo kaha vakatenguluka.’ 31 Avilahama uamukumbuluile nguendi, ‘Nga kuvevuilila ku visoneka via Mosesa na tunanguizi, kaha cipue vene muntu uakuhuma ku vatsi ku vakamutava.’"