1 Yesu uahandekele kuli vandongisi vendi nguendi, "Vieseko via vupi muavusunga vihita, vuno honi tuyando kuli uje avineha! 2 Cacili kuli ikeye nga vaka mukutilila livue liakama muntsingo na kumumbila mu cisali, linga keti akakovelese umo ua vanike vavandende mu vupi. 3 Zangameni ku vije muli nakulinga.

"Nga mukueni alinga vupi munangule, kaha nga alitavela mukonekele. 4 Kaha nga muntu umo vene akupihisila lutanu na luvali ha litangua limo, kaha eja kuli yove lutanu na luvali na kuhandeka nguendi, ‘Njatenguluka,’ kaha unapande kumukonekela."

5 Kaha tunganda vahandekele kuli Muene nguavo, "Vuezelela lutsilielo luetu!"

6 Muene uahandekele nguendi, "Nga muli na lutsilielo lualundende ngue mbuto ya musalata, ngue muasa kuhandeka ku muti ou ualaha uakama ngueni, ‘Tukuka uka shimbame ha cisali!’ Kaha ukeuo ukamiononoka.

7 "Nga ulina ngamba muka kulima cipue muka kuniunga vampanga, nkuma uasa kuhandeka kuli ikeye omo nga ahuminina ku mehia nguove, ‘Ija hano vene uakutumame na kulia ndi?’ 8 Houe! Vuno honi ukahandeka kuli ikeye nguove, ‘Vuahesa viakulia viange via cinguezi, Naua lizitikile vualumo muiva uove nakunjipangela noho njikalia na kunua, nga njamanesa ambahoni ulie na kunua!’ 9 Nkuma honi ngamba kuveku mutsantsela hakulinga vije vivamushikile kulinga ndi? Muavusunga houe! 10 Neni naua vene, omo mualingile vioshe vije vivamishikile kulinga, handekeni ngueni, ‘Tuva ngamba vangoco, tunalingi lika vipangi vietu.’"

11 Omo Yesu uakele nakuya ku Yelusalema uahitile mukati ka Samaliya na Ngalileya. 12 Kaha uakovelele muimbo muje vamala vambumba likumi vamuuanene, vemanene kulahako. 13 Vatambakanene cikuma na kuhandeka nguavo, "Yesu, Muene tuvuileko ngozi!"

14 Omo Yesu uavamuene, uahandekele kuli vakevo nguendi, "Yeni mukalimuese yeni vavenia kuli vasasendote."

Omo vakele nakuya vavalelesele. 15 Kaha umo uavo omo uamuene nguendi nakanguka, uahilukile na kushangazala Njambi na lizi liakama, 16 uauile na cihanga cendi ku viliato via Yesu na kumutsantsela. Ikeye uapuile Kasamaliya. 17 Kaha Yesu uahandekele nguendi, "Nkuma kuvapuile likumi vaje vanakanguka ndi? Nkuma honi ava vatanu na vauana vali kuli? 18 Omo vikahoni naumo uahi uavo neja nakuhana citsantsela kuli Njambi kuvanga lika ou keti Kayunda?" 19 Kaha Yesu uahandekele kuli ikeye nguendi, "Katuka uye, lutsilielo luove lua kukanguisa."

20 Yesu vamuihuile kuli Vafaliseho nguavo, "Ntsimbu muka Vumuene vua Njambi vukeja?" Kaha uavatavele nguendi, "Vumuene vua Njambi kuvukeja mu ngila ije muasa kuvumona na mesho eni. 21 Kukuesi akahandeka nguendi, ‘Tala, vuno vulihano!’ Cipue ‘Taleni, vuje vuli kuje!’ Muomu Vumuene vua Njambi muli navuo hakati keni."

22 Ambahoni Yesu uahandekele kuli vandongisi vendi nguendi, "Matangua akeja omo mukatonda kumona litangua limo lia Muna Muntu, vuno honi kumukasa kulimona. 23 Kaha kukakala vamo vakahandeka kuli yeni nguavo, ‘Taleni ali kuje!’ Cipue, ‘Taleni alihano!’ Vuno honi keti muyeko, keti mukavakavangeye. 24 Ngue muhiato mukahiatula muilu, kaha vaumona uhuma ku cihela cimo ca lilu nakuya ku cihela cikuavo ca lilu, mukemo vene naua Muna Muntu muakafua ha litangua liendi liakuhiluka. 25 Vuno honi napande kuyanda cikuma na kumuviana ku vantu va ntsimbu ino. 26 Ngue mucafuile ku matangua a Noua mukemo vene mucikafuilamo naku matangua a Muna Muntu. 27 Vantu vakele nakulia na kunua, na kuliambata na kushombuesa, noho Noua uakovelele mu vuato. Kaha livazi liezile nakuvanongesa voshe. 28 Ngue mucafuile ku matangua a Lote, vantu voshe vanuine, valile, valandesele na kulandulula, vakunine na kutunga, 29 vuno honi ha litangua lije Lote uahumine mu Sondoma, tuhia na mavue vianokele ngue mema a kuhuma muilu, kaha via vanongesele voshe. 30 Cikafua ngue mujevene ha litangua liakasholoka Muna Muntu.

31 "Ha litangua lijevene, uoshe uje yala ali helu lia njivo keti akovele mu njivo nakuambata viuma viendi, naua na uje ali mu lihia liendi keti ahiluke ku njivo yendi. 32 Vulukeni hali mpuevo ya Lote. 33 Voshe vaje vatonda kuniunga muono uavo vavenia vaka uzimbalesa, vuno honi vaje vazimbalesa muono uavo vakau uana. 34 Njimileka, ha vutsiki vuje kukakala vantu vavali ha muhela umo, umo vakamuambata ou mukuavo vakamuseza. 35 Kaha kukakala vampuevo vavali vaje vakatua hamo mucini cimo, mukuavo vaka muambata kaha mukuavo vakamuseza." 36 [Vamala vavali vakapanga mu lihia, umo vakaya nendi mukuavo vakamuseza.]

37 Kaha vandongisi vendi vamuihuile nguavo, "Kulihoni Muene, kuje kuvikalingiuila?"

Kaha Yesu uavakumbuluile nguendi, "Kuoshe kuje kuli civimbi kukeko kukali kunguluila makuvi."