1 Mu muaka ua vulikumi na itanu ua kuyula ca Sezale Timbeliase kaha Pontiyu Pilato uapuile nguvulu uamu Yundeya, na Helonde uasuanene mu Ngalileya, na munaina Filipu uasuanene mu nganda ya Ituleya na nganda ya Talakoniti, na Lisaniya uasuanene mu nganda ya Ambilene, 2 na Anase na Kayafase vapuile vasasendote vakama. Ha ntsimbu ijevene Njambi uahandekele kuli Yiuano muna Zakaliya omo uakele mu mpambo. 3 Yiuano uayile ku cihela na cihela ca Ndonga ya Yundau nakuambulula nguendi, "Tengulukeni ku vipi vieni ngeci vamimbuitike, kaha Njambi akamikonekela ku vipi vieni." 4 Ngue muje muvanacisoneka mu livulu liakuzenga lia kananguizi Isaya nguavo,

"lizi lia umo atambeka mu mpambo nguendi,

‘Vuaheseni tapalo ya Muene,

sungameseni ngila yendi linga akuhitilemo!

5 Vimbongo vioshe vanapande ku viofuela,

na minkinda yoshe yaindende neyi yakama vaka viniekumuna,

na vingila via kuhenga vanapande kuviolola visungame,

na vingila viakuzika vanapande kuvilambesa.

6 Vantu voshe vakamona kuovola ca Njambi.’"

7 Kaha Yiuano ualekele vije vivunga via vantu vaje vezile kuli ikeye na kuvambuitika nguendi, "Eni manoka! Iya honi naminangula linga muteue vukalu vua Njambi vuje vuli nakuija? 8 Nga mutonda kuteua ku vukalu vua Njambi lingeni viuma vije vimuesa ngeci munatenguluka ku vipi vieni. Keti mu lihandekese mu mitima yeni ngueni ‘Tuli na tatetu Avilahama.’ Muavusunga njimileka nguange Njambi asa kutengulula mavue aua naku uapuisa vatekuluila va Avilahama! 9 Ngimbu vanaihaka laja ku mizi ya muti, muti uoshe uje kuuimi vushuka vuacili vaka uteta naku umbila mu tuhia."

10 Vantu vamuihuile nguavo, "Kaha honi tulinga vati?"

11 Uavakumbuluile nguendi, "Uje ali na vikovelo vivali ahaneko cimo uje kesi naco, kaha nou alina via kulia ahaneko vakuavo."

12 Vaka kutambula lisimu vezile linga avambuitike, kaha vamuihuile nguavo, "Mulongisi, nkuma yetu tunapande kulinga vika?"

13 Kaha uavalekele nguendi, "Keti mukatambule kupulakana muje muvia ilamo."

14 Masualale vamo naua vamuihuile nguavo, "Nkuma honi yetu tunapande kulinga vika?" Kaha uavalekele nguendi, "Keti muka pukule viuma via vakueni, cipue kuvangeya, simpeni na fueto yeni."

15 Omo vantu vakele na kuvandamena, kaha voshe vakele na kulihozola mu mutima yavo via hali Yiuano indi cilivene ikeye Kilistu. 16 Kaha Yiuano uahandekele kuli voshe nguendi, "Njimimbuitika mu mema, vuno honi ouo akeja napu uakama kupulakana yange. Ku njapandele cipue kuzitula miva ya ha vinkaku viendi. Ikeye akamimbuitika na Cimbembesi Uakulela na mu tuhia. 17 Lisehua lili mu livoko liendi, ikeye akapekula na kulelesa muacili vinona vioshe kulijunguilo liendi, kaha tiliku akaitulika mu cishete cendi, vuno honi mujungu uoshe akautsimika na tuhia tuakuhona kuzima!"

18 Mu vingila viavingi viakuliseza seza Yiuano uambuluile Muzimbu Uacili ku vantu mukuvasindiya linga vatenguluke ku vingila viavo. 19 Vuno honi Yiuano uatenukilile nguvulu Helonde, muomu uambatele Helondiya mpuevo ya munaina Filipu, kaha naua naha viuma viavingi via vipi vije viakele nakulinga. 20 Ambahoni cuma cacipi cikuma cikuavo cije ca lingile Helonde capuile ca kuhaka Yiuano mu kamenga.

21 Omo Yiuano uamanusuile kumbuitika vantu voshe, na Yesu naua vamumbuitikile. Ha ntsimbu ijevene Yesu omo uakele na kulombela, lilu liashokolokele. 22 Kaha Cimbembesi Uakulela uashulukile hali ikeye mucifua ca livembe. Kaha muilu mua humine lizi ngualio, "Yove munange injazanga, njivuahelela muomu yove."

23 Omo Yesu uaputukile kupanga vipangi viendi uakele na miaka makumi atatu. Kaha vantu vakele nakuyongola nguavo ikeye muna Yosefa. Yosefa uapuile muna Heli, 24 Heli uapuile muna Matati, Matati uapuile muna Levi, Levi uapuile muna Meleki, Meleki uapuile muna Njanayi, Njanayi uapuile muna Yosefa, 25 Yosefa uapuile muna Matiyasi, Matiyasi uapuile muna Amose, Amose uapuile muna Nahumi, Nahumi uapuile muna Eseli, Eseli uapuile muna Nangai, 26 Nangai uapuile muna Maate, Maate uapuile muna Matatiya, Matatiya uapuile muna Semehine, Semehine uapuile muna Yoseke, Yoseke uapuile muna Yonda, 27 Yonda uapuile muna Youanane, Youanane uapuile muna Lehesa, Lehesa uapuile muna Zelumbambele, Zelumbambele uapuile muna Sheyaletiyele, Sheyaletiyele uapuile muna Neli. 28 Neli uapuile muna Meleki, Meleki uapuile muna Andi, Andi uapuile muna Kosame, Kosame uapuile muna Elemandame, Elemandame uapuile muna Ele, 29 Ele uapuile muna Yoshua, Yoshua uapuile muna Ezazale, Ezazale uapuile muna Yolime, Yolime uapuile muna Matata, Matata uapuile muna Levi, 30 Levi uapuile muna Simioni, Simioni uapuile muna Yunda, Yunda uapuile muna Yosefa, Yosefa uapuile muna Njoname, Njoname uapuile muna Eliakime, 31 Eliakime uapuile muna Meleya, Meleya uapuile muna Mena, Mena uapuile muna Matata, Matata uapuile muna Natane, Natane uapuile muna Ndaviti, 32 Ndaviti uapuile muna Njesi, Njesi uapuile muna Ovende, Ovende uapuile muna Mbouasi, Mbouasi uapuile muna Salemone, Salemone uapuile muna Naheshoni, 33 Nashone uapuile muna Aminandave, Aminandave uapuile muna Andemine, Andamine uapuile muna Aleni, Aleni uapuile muna Izeloni, Izeloni uapuile muna Peleze, Peleze uapuile muna Yunda, 34 Yunda uapuile muna Yakomba, Yakomba uapuile muna Isake, Iseke uapuile muna Avilahama, Avilahama uapuile muna Tela, Tela uapuile muna Nahole, 35 Nahole uapuile muna Selunge, Selunge uapuile muna Leu, Leu uapuile muna Pelenge, Pelenge uapuile muna Hevele, Hevele uapuile muna shela, 36 Shela uapuile muna Kainane, Kainane uapuile muna Alepakeshande, Alepakeshande uapuile muna Shemi, Shemi uapuile muna Noua, Noua uapuile muna Lameki 37 Lameki uapuile muna Matusela, Matusela uapuile muna Enoke, uapuile muna Njalende, Njalende uapuile muna Maalalele, Maalalele uapuile muna Kenane 38 Kenane uapuile muna Enoshe, Enoshe uapuile muna Sete, Sete uapuile muna Andama, Andama uapuile muna Njambi.