1 Ha ntsimbu ije vene vivunga via makulukazi a vantu viakungulukile hamo, vapuile vavengi mukemuo vakele na kuliliatangela umo na mukuavo, Yesu uaputukile kuhandeka kuli vandongisi vendi nguendi, "Liniungeni ku cimbaluila ca Vafaliseho, cije cikeco civembulu cavo. 2 Keti mupue ngue vakevo muomu nacimo cahi cakufuika cije kuvakakufula, cipue cakushueka cije kuvaka jombolola. 3 Viunahandeka mu milima vaka vivua mu mutania, nevi uayevetela ku muhela vaka vihandeka hambanza."

4 "Njimileka vavusamba keti muteue uje atsiha muvila kaha kuhumaho kasa naua kulinga cuma cimo. 5 Vuno honi njimileka uje imunapande kuteua. Muteue uje nga namanesa kutsiha muvila, hanga hali na nzili yaku miumbila mu ngehena. Eyo, njimileka muteueni." 6 "Nkuma tumpiasa vatanu kuve kuvalandesa na vimbongo vivali ndi? Vuno honi naumo uahi uatuo uje ivakasuvu kuli Njambi. 7 Cipue vene vinkambu viaku mutue uove vana vitanda. Nankuma keti uteue, uli naseho yakama cikuma kupulakana tumpiasa vavengi.

8 "Njimileka nguange uoshe uje ahandeka ha civunga nguendi uakundama kuli yange, mucifua cimo vene na Muna Muntu naua aka muhandeka ku tungelo va Njambi. 9 Vuno honi uoshe uje anjiviana hakati ka civunga ca vantu, nange naua njikamuviana ku mesho a tungelo va Njambi.

10 "Uoshe uje ahandeka viavipi hali Muna Muntu vaka mukonekela, vuno honi uoshe uje ashaula Cimbembesi Uakulela ku vaka mukonekela.

11 "Omo vakamituala mu vinjivo via malombelo kuli vaka kuyula na vaka nzili yakama mukumieseka, keti mukalinienge vati muje mukaliluila yeni vavenia, kuli vije mukahandeka na muje mu mukavakumbulula, 12 muomu Cimbembesi Uakulela akamilongesa ha ntsimbu ije vimunapande kukahandeka."

13 Muntu umo uje uakele mu civunga uehuile Yesu nguendi, "Mulongisi, leka muanetu linga tulipangele vitenga vije tate uatusezelelele."

14 Vuno honi Yesu uamukumbuluile nguendi, "Kavusamba, iya nanjihangula kupua muka kuyula cipue muka kuimanena hakati keni?" 15 Kaha uahandekele kuli vakevo nguendi, "Liniungeni! Zangameni ku miyati ya lizangamena lioshe: muomu vuyoye vua muntu kuvuesi mu vufuko vuendi."

16 Kaha uavatelele cisimo eci nguendi, "Kuakele muntu umo uakufuka mu lihia liendi muakele viakuteja viavingi, 17 kaha uasinganiekele ikeye vavenia nguendi, ‘Nkuma njikalinga vati, muomu kunjesi na vishete viakama via kutulikila viakuteja viange?’ 18 Kaha uahandekele nguendi, ‘Njikalinga eci, njikasiula vishete viange na kutunga viakama, muje mukemo njikahaka vimbuto viange na viuma viange vioshe. 19 Kaha njikahandeka ku muono uange nguange, Muono, uli na viuma viavingi unalitumbikila ha miaka yaingi, huima, lia, nua na kuvuahelela.’ 20 Vuno honi Njambi uahandekele kuli ikeye nguendi, ‘Yove cilema! Vutsiki vuno vene muono uove vauambata. Kaha vije viuma viuna livuahesela vikapua vieya?’"

21 Yesu uamanusuile nguendi, "Omu mukemuo mucikafua ku muntu uje na litulikila vufuko vuavuingi ikeye vavenia, vuno honi kafukile ku mesho a Njambi."

22 Kaha Yesu uahandekele kuli vandongisi vendi nguendi, "Nankuma njimileka nguange, keti mulinienge ha vuyoye vueni vimukalia, cipue vimukazala ha mivila yeni. 23 Muomu vuyoye vunapu vuaseho kupulakana viakulia, na muvila kupulakana vuzalo. 24 Singaniekeni makololo kuve kulima cipue kuteja, kuvakele na vishete cipue muakutulikila viakulia, vuno honi Njambi alina kuvalisa. Yeni muli naseho cikuma kupulakana tuzila. 25 Iya hakati keni mu kulinienga asa kuhakelako cipue ka ntsimbu kakandende ku vuyoye vuendi? 26 Nga honi kumuasa kulinga eci cuma cacindende, kaha vika honi muliniengela ha vioshe? 27 Singaniekeni vintemo muvikakolela, kuvie kupanga cipue kulizika. Vuno honi njimileka nguange, cipue vene muene Solomoni mu vufuko vuendi vuoshe kazalele vuzalo vuacili ngue vintemo evi. 28 Nga omu mukemo Njambi muakazikilamo vishoni via mu musenge, vije vikalako lika lelo kaha imene vavintsimika mu tuhia, nkuma yeni kasa kumizika ndi? Yeni vaka lutsilielo lua lundende."

29 "Keti mutualeleleho kulinienga hali vimu kalia cipue vimu kanua. 30 Muomu vaka mavu vakevo vakatondo evi viuma vioshe. Vuno honi Ishueni ikeye azivuka nguendi muvitonda. 31 Vuno honi tondeni tahi Vumuene vuendi, kaha navioshe evi vaka mihanavio."

32 "Keti muvue liova yeni vutanga vuavundende vua vampanga, muomu Ishueni navuahelela kumihana Vumuene. 33 Landeseni vufuko vueni nakuhana vimbongo kuli vihutu. Livuaheseleni vikuama vieni vavenia vije kuvikapihia, na vufuko vua muilu vuje kuvuekuhua cipue vezi kuvasa kuvushuena na tuntembulu kuvasa kuvupihisa. 34 Muomu kuje kuli vufuko vuove, kukeko naua kukakala mutima uove."

35 "Livuaheseleleni vipangi na vindeya vieni vishuame, 36 ngue vangamba vaje vavandamena muene uavo ahuma ku cilika cavulo. Omo nga eja nakutota ku cikolo kaha hajevene vaka mushokuelela. 37 Vakukuisula vangamba vaje muene uavo akavauana okuvatona na kulivuahesela omo akeja. Muavusunga njimileka nguange, muene uavo akalizitula muiva uendi na kuvalania vatumame ku mesa na kuvahana viakulia." 38 Vakukuisula vangamba vaje nga muene uavo eja avauana vanalivuahesela laja cipue eje hakati ka vutsiki cipue kuvandemba. 39 Vuno honi uvuisiseni eci, "Nga vavenia njivo akazivuka ntsimbu muka ije muizi akeja, ngue kekuseza njivo yendi vaituve. 40 Neni naua munapande kuli vuahesela, muomu Muna Muntu akeja ha ntsimbu ije kumua livuaheselele."

41 Petulu uehuile nguendi, "Muene, nkuma uli nakutulekesa eci cisimo yetu lika indi na voshe?"

42 Kaha Muene uamukumbuluile nguendi, "Iya honi ngamba ua kulongua ua mana, uje muene uendi uamuhakele kuendesa vakuavo vangamba nakuvahana viakulia ha ntsimbu ya cili? 43 Uakukuisula uje ngamba omo muene uendi ahiluka amuuana ali laja ku vipangi. 44 Muavusunga njimileka nguange, muene uendi akamupuisa kupua mukuluntu ua vufuko vuendi vuoshe. 45 Vuno honi nga uje ngamba alihandekesa ikeye vavenia nguendi, ‘Muene uange nasimbula kuhiluka,’ kaha akaputuka kupupa vangamba vakuavo, va vamala nava va vampuevo na kulia na kunua na kupenda? 46 kaha muene ua uje ngamba akahiluka ha litangua lije kamuvandamenene na ha ntsimbu ije kazivukile, kaha akamuhana kashitiko na kumuhaka hamo nava kakuhona kulongua.

47 "Nga uje ngamba azivuka vije viatonda muene uendi, vuno honi kavivuahesa cipue kalingi vije viatonda muene uendi vaka muhana kashitiko ka kumupupa cikuma. 48 Vuno honi uje kazivuka vika vije viatonda muene uendi, kaha alinga viuma vije vifuila kashitiko vaka mupupa kavundende. Kuli uoshe vanahana viavingi, viavingi naua vakatonda kuli ikeye, kuli uje vanatulikisile viavingi, viavingi cikuma vakamuihula.

49 "Njezile nakuneha tuhia ha mavu, kaha njatondo ngue tunakuata laja! 50 Njili na cimbuitiko cije cinanji vandamena, kaha njinali shoshomuena kuvanga noho kumbuitika eci cinahiti! 51 Nkuma musinganieka ngueni njinanehe ciyulo hano ha mavu? Houe njimileka, vuno honi njinaneha kulitepa. 52 Hume hano ntanga ya vantu vatanu vakalitepa, vatatu valiluisa na vavali, kaha vavali valiluisa na vatatu. 53 Vakalipanga, vaishe vakaluisa vana va vamala, na vana va vamala vakaluisa vaishavo, naua vaina vakaluisa vana vavo va vampuevo kaha na vana va vampuevo vakaluisa vainavo. Vainamueno vakaluisa vaniotomueno yavo, kaha naua vaniotomueno vakuluisa vainamueno yavo."

54 Yesu uahandekele ku civunga nguendi, "Nga mumona lishelua lihuminina mu kangombe kayambi, vuasi vuasi muhandeka ngueni, ‘Ikanoka’, kaha inoka. 55 Kaha nga muvua mpunzi ihuminina mu mbuela, muhandeka ngueni, ‘Kukayukuma’, kaha mukemo vene. 56 Yeni vaka civembulu! Muzivuka kulumbununa cifua ca mavu cipue ca melu, vuno honi nkuma vika kumuzivukila kulumbununa viuma via ntsimbu ino?

57 "Nkuma vika muhonoua kuli yula yeni vavenia hakulinga viuma viacili? 58 Nga uya na citozi cove kunzango, eseka cikuma kulivuasana nendi mu ngila. Nga houe akakutuala kuli muka kuyula, kaha muka kuyula akakutuala kuli mukuluntu ua kamenga kaha akakutuala mu kamenga. 59 Njimileka nguange, ku ukahumumo kuvanga noho unafuete mbongo ya mamanusuilo ku mukuli."