1 Hanima yevi Muene uahanguile vandongisi veka makumi atanu na avali na vavali. Kaha uavatumine kulutue luendi vavali na vavali vaye mu vinganda namu vihela kuje vavenia uatondele kuya. 2 Tele kanda vaye uahandekele kuli vakevo nguendi, "Kuteja kuakama, vuno honi vaka kuteja vavandende. Lombeni kuli Muene ua kuteja atume vaka kuteja mu lihia liendi. 3 Yamuyeni! Kaha teleni njimituma kupua ngue vampanga mukati ka tungunga. 4 Keti muambate vikuama cipue cola cipue vinkaku, kaha keti mumeneke muntu uoshe mu ngila. 5 Ntsimbu yoshe nga mukovela mu njivo, cakulivanga handekeni ngueni, ‘Ciyulo cikale mu njivo ino.’ 6 Nga muli muntu ua ciyulo mu njivo ije, ciyulo ceni cikakala hali vakevo, nga keti ngoco kaha cikamihilukila. 7 Tumameni mu njivo ije, nueni na kulia vioshe vamihana, muomu muka kupanga napande kutambula fueto yendi. Keti muendangane ku njivo na njivo. 8 Nga mukovela mu nganda na vantu vamo vamitambula, lieni vivana mivuahesela. 9 Kanguiseni vaka kuvavala valimo, kaha handekeni kuli vakevo ngueni, ‘Vumuene vua Njambi vuneja muyehi neni.’ 10 Vuno honi nga mukovela mu nganda muje ku vamitambula, kaha yeni mu vingila muhandeke ngueni, 11 ‘Cipue likungu lia mu nganda yeni lije lili ku mikono yetu tulitotomona linga limiluise. Vuno honi zivukeni eci ngeci, Vumuene vua Njambi vuneja muyehi neni.’ 12 Njimileka, ha litangua lia Kusompa Njambi akamuesa cikeketima ku vantu vamu Sondoma kupulakana vantu vamu nganda ije!

13 "Tuyando kuli yeni vaka Kolazini! Tuyando kuli yeni naua vaka Mbetesainda! Nga evi vikomoueso vivalingile mu vinganda vieni, ngue vavipangele mu vinganda via vaje keti Vayunda va mu Tile na Sindone, vantu ava ngue vatengulukile laja ha kuzala vinjeke naku likuita muto. 14 Ha litangua lia Kusompa Njambi akamuesa cikeketima ku vantu vamu Tile na Sindone kupulakana yeni. 15 Vuno honi yeni vantu vamu Kapenauma, nkuma mutonda vaka mijundule kuheta na muilu ndi? Houe, vaka mineha ha mavu nakuya mu Ngehena!"

16 Yesu uahandekele kuli vandongisi vendi nguendi, "Ou evuilila yeni novuilila yange, kaha nauje aviana yeni naviana yange naua, kaha nou aviana yange naviana naua nauje uanjitumine."

17 Vaje makumi atanu na avali na vavali vahilukile nakuvuahelela cakama, kaha vahandekele nguavo, "Muene mu lizina liove na mahamba a tuvuililile omo tuakele naku uahumisa!"

18 Kaha Yesu uahandekele kuli vakevo nguendi, "Eyo! Njamuene Satana aua muilu ngue muhiato. 19 Taleni, njamihana nzili yakama ya kuliata manoka na manieue, na kuhiana nzili yoshe ya citozi, kaha na cimo cahi cika mivetuesa. 20 Cipue ngocovene, keti muvuahelele hali eci lika, ngueni na mahamba amivuililile, vuno honi vuaheleleni cikuma ngueni mazina eni vana asoneka muilu."

21 Ha ntsimbu ijevene Yesu ua vuahelelele mu Cimbembesi Uakulela kaha uahandekele nguendi, "Njikutsantsela Tate, Muene ua melu na mavu, muomu unashueka viuma evi ku vaka mana na vaka kuzangama kaha uavisholola ku vanike vavandende, cili Tate, muomu omu mukemo mu uatondele linga cika lingiue.

22 "Tate nanjihana viuma vioshe. Naumo uahi azivuka Muana kuvanga Ishe cipue naumo uahi azivuka Ishe kuvanga Muana. Nakuli vaje Muana akatondo linga avashololueye."

23 Ambahoni uatengulukilile kuli vandongisi vendi na kuhandeka kuli vakevo muvushueke nguendi, "Akukuisula aje mesho amona vije vimu mona yeni! 24 Njimileka nguange vavengi tunanguizi na vamiene vatondele kumona vimumona yeni, vuno honi kuva vimuene, naua vatondele kuvua vimuli na kuvua yeni, vuno honi kuva viuvuile."

25 Hajevene mulongisi ua mashiko uemanene mukueseka Yesu nguendi, "Mulongisi," "Nkuma njinapande kulinga vika ngeci njikakale na muono uayaye?"

26 Yesu uamuhuile nguendi, "Nkuma vika vanasoneka mu Lishiko lia Mosesa? Nkuma vika ukatandamo?"

27 Kaha uamukumbuluile nguendi, "Zanga Muene Njambi yove na mutima uove uoshe, na muono uove uoshe, na nzili yove yoshe, na visinganieka viove vioshe, kaha zanga mukueni ngue muje ualizanga yove vavenia."

28 Kaha Yesu uahandekele kuli ikeye nguendi, "Uahandeka muacili, linga eci, kaha ukakala muono uayaye."

29 Vuno honi uje mulongisi uatondele kulisambuesa ikeye vavenia, uehuile Yesu nguendi, "Mukuetu ikeye iya?"

30 Yesu uamukumbuluile mu cisimo nguendi, "Litangua limo kuakele yala umo uahumine ku Yelusalema nakuya ku Yeliko, kaha ualiuanene na vezi. Vamushuluile vuzalo vuendi, na kumuveta na kuteua, na kumuseza na lezumuka. 31 Kaha capuile ngeci, kasasendote uayile mu ngila ijevene, kaha omo ua mumuene ou yala, uamuongolokele kumukulo. 32 Na Kalevi naua omo uahetele ku cihela cije ua mumuene nendi naua kaha uamuongolokele. 33 Vuno honi Kasamaliya umo uakele nakuhita mu ngila ijevene, omo uahetele ku cihela cije kuakosele uje yala, omo ua mumuene ua muvuilile ngozi. 34 Uashuenene kuyehi nendi nakumuhaka mazi na viniu ha vimbandu viendi kaha uamuzengeleho vintanga, ambahoni uamuhakele ha cimulu cendi na kumutuala ku njivo ya vangenzi, naku kamuniungilako. 35 Kaha liamukuavo uambatele vimbongo via muuaya uaya vivali nakuhana muka kuniunga njivo ya vangenzi, kaha uahandekele kuli ikeye nguendi, ‘Umuniunge muacili,’ kaha omo njikahiluka nja kukufueta vioshe vije viulinalikuasesa."

36 Hanima yevi Yesu uehuile uje mulongisi ua mezi a mashiko a Mosesa nguendi, "Muviyongola viove nkuma iya hakati ka vantu ava vatatu uje ualingile ngue mundambo ua uje yala, ivaluisile vezi?"

37 Kaha uahandekele nguendi, "Uje uamumuesele ngozi."

Kaha hanima yevi Yesu uahandekele kuli ikeye nguendi, "Eyo, ya ukalinge ngoco."

38 Omo Yesu na vandongisi vendi vayile mu ngila, vahetele hembo haje hakele mpuevo ua lizina lia Mata ikeye uamutambuile mu njivo yendi. 39 Uakele na munaina Maliya, uje uatumamene ku viliato via Muene na kuvuilila ku vilongesa viendi. 40 Vuno honi Mata uangienguele muomu uakele na vipangi viavingi, kaha uezile kuli Yesu na kumuhula nguendi, "Muene, ku umono munanana na njecelela vipangi vioshe likaliange ndi? Muleke anjikuaseko."

41 Vuno honi Muene uamukumbuluile nguendi, "Mata, Mata, yove ualijujukila na kuniengua muomu ya vipangi viavingi. 42 Vuno honi kuli cuma cimo citondeka. Maliya na hangula cuma cacili, cije ku vaka cihumisa kuli ikeye."