1 Yesu hakushula na Cimbembesi Uakulela, uahumine ku ndonga ya Yundau, kaha Cimbembesi ua mutuamenene mu mpambo, 2 kuje Liyavolo uakamuesekele matangua makumi auana. Ha ntsimbu ije yoshe Yesu kalile nacimo cahi, omo matangua aje ahuile, kaha uovuile njala.

3 Kaha Liyavolo uahandekele kuli ikeye nguendi, "Nga u Muna Njambi shika livue eli ngeci lilihimpule mbolo."

4 Vuno honi Yesu uamukumbuluile nguendi, "Vanacisoneka mu Visoneka nguavo, ‘Muntu kasa kuyoya na mbolo lika houe.’"

5 Ambahoni Liyavolo uatualele Yesu helu lia cihela calaha, kaha uamumuesele muka ntsimbu kakandende vumuene vuoshe vua hano ha mavu. 6 Kaha Liyavolo uahandekele kuli ikeye nguendi, "Njikakuhana nzili yoshe yakama na vumpau vuavuo, muomu vananjihanavio, kaha njikavihana kuli uoshe uje injitonda. 7 Nga unjilemesa, kaha vioshe evi vikapua viove."

8 Yesu uahandekele kuli ikeye nguendi, "Vanacisoneka mu Visoneka nguavo, ‘Ukalemesa Muene Njambi yove, ikeye lika iukapangela!’"

9 Ambahoni Liyavolo uamutualele ku Yelusalema, uakamuhakele ha kashongua ka njivo ya Njambi, uahandekele kuli ikeye nguendi, "Nga u Muna Njambi, liumbile ha mavu, 10 muomu vanacisoneka mu Visoneka nguavo, ‘Njambi akashika tungelo vendi na kukuniunga.’ 11 Kaha vanacisoneka mu Visoneka naua nguavo, ‘Vakakukuata, linga viliato viove keti vikatsutsuke ku mavue.’"

12 Vuno honi Yesu uahandekele kuli ikeye nguendi, "Vanacisoneka mu Visoneka nguavo, ‘Keti ueseke Muene Njambi yove.’"

13 Omo Liyavolo uamanusuile kueseka Yesu mu vingila vioshe, kaha uamusezele noho hakauanena ntsimbu ikuavo.

14 Yesu uahilukile ku Ngalileya, na nzili ya Cimbembesi Uakulela yakele muli ikeye. Kaha muzimbu uendi uatsimanene mu nganda yoshe ya Ngalileya. 15 Yesu uavalongesele mu vinjivo viavo via malombelo, kaha voshe vamushangazalele.

16 Yesu uayile ku Nazaleta, kuje kuakolelele, kaha uakovelele mu njivo ya malombelo ha litangua lia Sapalalo ngue ku cilika cendi. Kaha uemanene na kutanda Visoneka. 17 Vamuhanene livulu liakuzenga liasonekele kananguizi Isaya. Kaha uazengunuine lije livulu liakuzenga, kaha uauanene ha mutambela uje vasoneka nguavo,

18 "Cimbembesi ua Muene ali muli yange,

muomu nanjihangula kuambulula Muzimbu Uacili ku vihutu.

Nanjitumu kuambulula ngeci vinzinda vaka vapatule,

na kuambulula linga tupuputua vakamone,

na kunjituma kupatula vaje vavali nakuyandesa,

19 nakunjituma kuambulula ngeci ntsimbu inahete

ije Muene akovola vantu vendi."

20 Yesu uazengele lije livulu, ualihanene naua kuli muka kuniunga, kaha uatumamene. Vantu voshe vakele muje mu njivo ya malombelo vamutalele ntooma, 21 kaha uahandekele kuli vakevo nguendi, "Visoneka evi lelo vinalishulisisa ku mesho eni, ngue muje munovu muvanavitanda."

22 Kaha voshe vamushangazalele, valikomokelele ku mezi endi acili aje ahandekele, vahandekele nguavo, "Nkuma ou keti ikeye uje muna Yosefa ndi?"

23 Yesu uahandekele kuli vakevo nguendi, "Muavusunga mukanjitela cisimo eci ngueni, ‘Ove cimbanda likanguise yove vavenia!’ kaha naua mukanjileka ngueni yove linga viuma vioshe muno muimbo liove, vijevene vituovuile ulinakulinga mu Kapenauma." 24 Muavusunga njimileka, naumo uahi "kananguizi ivakatava muimbo liendi. 25 Vuno honi muavusunga njimileka mu cifuti cetu ca Isaleli muakele vantuluue vavengi ha matangua a kananguizi Eliya, omo kalunga kanokele ha miaka itatu na vingonde vitanu na imo naua honi kuakele njala yakama mu cifuti coshe. 26 Eliya kuvamutumine kuli voshe, vuno honi kuli ntuluue uje keti Kayunda uje uakele mu limbo lia Zelefani kuyehi na nganda ya Sindone. 27 Kuakele vantu vavengi vakele nakuvavala mbumba mu Isaleli ha ntsimbu ya kananguizi Elisha, vuno honi naumo uahi yakanguisile kuvanga lika Namane uaku Siliya."

28 Omo vantu vaje vakele mu njivo ya malombelo vazivile evi, vanienguele. 29 Vakatukile, kaha vakokelele Yesu hambaza lia nganda, vamutualele kuntsongo ya munkinda haje ha vatungile nganda yavo. Vatondele ngeci vakamumbile mu cimbongo. 30 Kaha Yesu uahitile mukati kavo nakuya.

31 Ambahoni Yesu uayile ku Kapenauma, nganda ya mu Ngalileya, kuje uakalongesele vantu ha litangua lia Sapalalo. 32 Vantu voshe vakomokele cikuma kuambulula cendi, muomu mezi endi akele na nzili yakama. 33 Kaha mu njivo ya malombelo muakele yala umo uakele na lihamba lia lipi, liatambekele cikuma. 34 "Naniee! Yove Yesu uaku Nazaleta, nkuma utonda kulinga vika kuno netu? Nkuma uneja nakutunongesa ndi? Njakuzivuka yove uapua umo Uakulela ua Njambi!"

35 Kaha honi Yesu uashikile cimbembesi cacipi nguendi, "Holoka kuluu huma muli muntu ou!" Kaha lije lihamba lia uisilile uje yala ha mavu ha mesho avo voshe, kaha ca humine muli ikeye kuakuhona kumuvetuesa.

36 Vantu voshe valikomokelele cikuma vaputukile kulihandekesa umo na mukuavo nguavo, "Nkuma mezi muka aua? Muntu ou ali na nzili ya kushika vimbembesi via vipi kaha vihuma." 37 Vialingile Yesu vioshe va viuvuile mu mitambela yoshe yaku cihela cije.

38 Yesu uahumine mu njivo ya malombelo uayile ku njivo ya Simoni. Uauanene vainamueno ya Simoni vavavala lisika sika liakama cikuma. Kaha valombele Yesu linga avakangule. 39 Nankuma Yesu uayile kuli ikeye nakumukotamena, kaha uashikile lije lisika sika linga lihue kaha uakangukile na kuimana nakuputuka kuvapangela viakulia.

40 Hakulahuka ca litangua, voshe vaje vakele na mishongo yakuliseza seza vavanehele kuli Yesu, voshe uavasalekele mavoko endi na kuvakanguisa. 41 Kaha aje mahamba naua a huminemo mu vantu vavengi na kutambeka nguauo, "Yove u Muna Njambi!"

Vuno honi Yesu uashikile aje mahamba ngeci keti ahandeka nacimo cahi naua, muomu akeuo amuzivukile ngeci ikeye Kilistu.

42 Omo kuacele Yesu uahumine mu nganda, nakuya kuali kaliendi lika. Vantu vaputukile kumutonda, omo vamuuanene vatondele kumuvindika ngeci keti ahume kuli vakevo. 43 Vuno honi uahandekele kuli vakevo nguendi, "Njapande kuambulula Muzimbu Uacili ua Vumuene vua Njambi mu vinganda vieka naua, muomu evi vikevo via njitumine kulinga Njambi."

44 Yesu uakele na kuambulula mu vinjivo via malombelo vioshe viamu Yundeya.