1 Omo Yesu uasanene vandongisi likumi na vavali veje kuli ikeye, kaha uavahanene nzili yakama cikuma ya kuhumisa mahamba voshe na kukanguisa mishongo. 2 Kaha uavatumine kuya na kuambulula Vumuene vua Njambi nakukanguisa vaka kuvavala. 3 Uavalekele nguendi, "Keti muambate cuma cimo ha vungenzi vueni, cipue mbueti, cipue cola, cipue viakulia, cipue vimbongo, cipue vikovelo vivali. 4 Kuoshe kuje kuvaka mitambula muacili, tumameni ku njivo ijevene noho mukahuma mu nganda ije. 5 Kuoshe kuje vaka viana kumitambula, kaha omo muhuma mu nganda muje totomoneni likungu ku viliato vieni linga cipue vukaleho hali vakevo."

6 Kaha vandongisi vayile, vaihitanganene mu membo oshe na kuambulula Muzimbu Uacili na kukanguisa vantu kuoshe.

7 Omo Helonde, muka kusuana mu Ngalileya, uovuile viuma vioshe vialingiuile, kaha uakele na citanga, muomu vantu vamo vakele nakuhandeka nguavo, "Yiuano muka kumbuitika nasanguka ku vatsi." 8 Kaha vamo nguavo Eliya nasholoka, vamo nguavo, "Umo ua tunanguizi vakulaja nasanguka." 9 Kaha Helonde uahandekele nguendi, "Yiuano njamutetele mutue, vuno iya honi ou yala injili nakuvua viendi?" Kaha uatondele cikuma kumumona.

10 Omo tunganda va Yesu vahilukile vamulekele vioshe vije vivalingile. Kaha uayile hamo navo uavatualele kualikaliavo lika ku nganda ivatumbuile Mbetesainda. 11 Omo civunga ca vantu vovuile evi, kaha vamukavele. Uavatambuile na kuvalongesa via Vumuene vua Njambi nakukanguisa vaje vakele nakuvavala.

12 Omo capuile cinguezi, vandongisi vaje likumi na vavali vezile kuli ikeye nakuhandeka nguavo, "Shandola vivunga evi linga vaye ku membo na ku mehia aje ali muyehi vaka liuaneneko viakulia vakevo vavenia noku kuakukosa, muomu muno munapu mu musenge uangoco."

13 Vuno honi Yesu uahandekele kuli vakevo nguendi, "Yeni vene vahaneni viakulia linga valie."

Kaha vamukumbuluile nguavo, "Kutuesi na viakulia vieka kuvanga vimbolo vitanu na vantsi vavali. Nkuma yove utonda tuye na kulanda viakulia via civunga coshe eci ndi?" 14 Kuakele vamala vakupua makulukazi atanu kuje.

Yesu uahandekele kuli vandongisi vendi nguendi, "Lekeni vantu vatumame ha mavu mu vivunga, ha civunga na ha civunga hakale vantu makumi atanu."

15 Vandongisi valingile ngacije, kaha na vantu voshe vatumamene ha mavu. 16 Kaha Yesu uatambuile vije vimbolo vitanu na vantsi vavali, uatalele muilu, uatsantselele kuli Njambi, kaha uavipazuile, uavihanene kuli vandongisi vendi linga vavipangezele vivunga via vantu. 17 Voshe valile vakutile, kaha vandongisi vakunguluile vimbazuvuila vije viasaleleho, vashulisile mitonga likumi na ivali.

18 Litangua limo omo Yesu uakele nakulombela kualikaliendi, vandongisi vendi vakele kuyehi nendi. Kaha uavehuile nguendi, "Vantu vali nakunjitumbula nguavo yange iya?"

19 Vamukumbuluile nguavo, "Vamo vali nakuhandeka nguavo yove Yiuano Muka kumbuitika, veka naua nguavo yove Eliya, vakuavo naua nguavo yove umo ua tunanguizi va laja uje nasanguka."

20 Kaha Yesu uavehuile nguendi, "Nkuma yeni honi munjitumbula ngueni yange iya?"

Petulu uamukumbuluile nguendi, "Yove Kilistu ua Njambi."

21 Ambahoni Yesu uavashikile nguendi keti valekeko muntu umo cuma eci. 22 Kaha uahandekele naua kuli vakevo nguendi, "Muna Muntu napande kuyanda cikuma, na kumuviana ku vakuluntu naku vakuluntu va vasasendote, naku valongisi va mezi a Lishiko lia Mosesa. Kaha vakamutuala ku kutsa, vuno honi hanima ya matangua atatu, vaka musangula."

23 Ambahoni Yesu uahandekele naua ku vantu voshe vaje vakele kuje nguendi, "Nga muntu atonda kunjikava, napande kuliviana ikeye vavenia, ambate cilindakano cendi ha litangua na litangua, kaha anjikave. 24 Muomu muntu uoshe uje atonda kuniunga muono uendi akauzimbalesa, vuno honi muntu uoshe uje azimbalesa muono uendi muomu ya lizina liange akauovola. 25 Muomu seho muka iliho nga muntu anganiala mavu oshe, vuno honi anongesa muono uendi? 26 Nga muntu anjuvuila shuamua na vilongesa viange, kaha Muna Muntu naua nendi akamuvuila shuamua omo akeja mu vumpau vuendi na mu vumpau vua Ishe na mu vumpau vua tungelo vakulela. 27 Muavusunga njimileka nguange, kuli vamo kuno, vaje kuvakatsi kuvanga vanamono Vumuene vua Njambi."

28 Hanima ya matangua atanu na atatu omo uahandekele viuma evi, Yesu uayile hamo na Petulu, na Yiuano, na Yakomba ku munkinda nakulombela. 29 Tele ali nakulombela, cihanga cendi cahimpukile, kaha vuzalo vuendi vuatokele too ngue ceke. 30 Hajevene vamala vavali vasholokele vaputukile kuhandeka nendi, vapuile Mosesa na Eliya, 31 vaje vasholokele mu vumpau vua muilu kaha vakele nakuhandeka na Yesu ha ngila ije muakashulisisila vutumbe vua Njambi ha kutsila mu Yelusalema. 32 Petulu na vaje vakele navo vakele mu tulo, vuno honi omo vahindukile vamuene vumpau vua Yesu na vamala vavali vaje vemanene navo. 33 Omo Mosesa na Eliya vatonde kuya, kaha Petulu uahandekele kuli Yesu nguendi, "Muene, cacili kuli yetu nga tukala kuno! Tukatunga vintsingi vitatu, imo yove, imo ya Mosesa na imo ya Eliya." Kazivukile vije viakele nakuhandeka.

34 Tele Petulu acili nakuhandeka, lishelua liezile na kuvafuika, kaha vandongisi vazivile liova omo lishelua liavafuikile. 35 Kaha lizi liahumine mu lishelua liahandekele ngualio, "Ou ikeye Munange injinahangula, muvuilileni!"

36 Omo lizi liaholokele, Yesu uakele halikaliendi lika. Kaha vandongisi vaholokele kuluu ha viuma vioshe evi, kaha ha ntsimbu ije kuvalekeleko muntu umo viuma vije vivamuene.

37 Omo kuacele Yesu na vandongisi vendi vatatu vasikumukile kuhuma ku munkinda, civunga cakama caliuanene na Yesu. 38 Yala umo ua haje ha civunga uatambakanene nguendi, "Mulongisi, njikulomba tala munange, muomu ikeye lika muana umolika. 39 Evi vikevio vikalingiua nga lihamba limu uana, kaha atambeka na kushinia na kututumuna lifulu ku kanua, lika muvetuesa cikuma kaha ku liekumuecela vuasi. 40 Njalambelelele vandongisi vove ngeci vamuhumise vuno honi kuvasele."

41 Yesu uakumbuluile nguendi, "Yeni vaka kujeneka kutsiliela na vantu vaka vupi! Nkuma lungahi honi njikakala neni? Lungahi honi mukeseka kusimpa kuange?" Kaha uahandekele kuli uje yala nguendi, "Neha kuno munove."

42 Omo muanike uakele nakuija, kaha lihamba liamu uisilile ha mavu kaha uaputukile kushinia cikuma. Yesu uashikile cije cimbembesi ca cipi, uje muanike ua yala uakangukile kaha uamuhanene kuli ishe. 43 Kaha vantu voshe vali komokelele ha nzili yakama ya Njambi.

Tele vantu voshe vakele nakulikomokela ha vioshe vije Yesu uapangele, kaha uahandekele kuli vandongisi vendi nguendi, 44 "Ivuilileni keti musuve evi njimileka! Muna Muntu vakamuhana ku mavoko a vantu." 45 Vuno honi vandongisi kuzivukile mucalumbunukile cuma eci. Vavashuekelele linga keti vacivuisise, kaha naua vovuile liova liakumuhula vije viahandekele.

46 Vandongisi vakele na vimpata hakati kavo ngeci iya honi uakama cikuma. 47 Yesu uazivukile viyongola via mu mitima yavo, nankuma, uasanene muanike uamundende, uamuimikile kuyehi nendi, 48 kaha uahandekele kuli vakevo nguendi, "Uoshe atambula muanike ou mu lizina liange, kaha natambula yange vene, uoshe uje anjitambula, natambula naua uje uanjitumine. Muomu uoshe uje napu uamundende hakati keni muva voshe, ikeye napu uakama cikuma."

49 Yiuano uahandekele nguendi, "Muene, tuamuene yala umo uakele nakuhumisa mahamba mu lizina liove, kaha tuamulekele linga alikele, muomu kakundamene ku civunga cetu." 50 Yesu uahandekele nguendi, "Keti mumuvindike, muomu uoshe uje kamiluisa ikeye ali hamo neni."

51 Omo matangua ashuenene kuyehi linga Yesu vamutuale muilu, uatenguluile viyongola viendi, nakuya ku Yelusalema. 52 Uatumine tunganda vendi kulutue, kaha vayile na kukovela mu limbo lia vaka Samaliya linga vaka muvuahesele vualumo kuakutulila. 53 Vuno honi vantu vakele kuje kuva mutambuile, muomu vungenzi vuendi vuapile vuakuya ku Yelusalema. 54 Omo vandongisi vendi Yakomba na Yiuano vamuene evi, vahandekele nguavo, "Muene, nkuma utonda linga tusane tuhia tua muilu tuije nakuvanongesa ndi?"

55 Vuno honi Yesu uatengulukile kuli vakevo na kuvavindika. 56 Kaha vayile ku limbo likuavo.

57 Omo Yesu na vandongisi vendi vakele nakuya mu ngila, yala umo uahandekele kuli Yesu nguendi, "Njikakukava kuoshe kuje ukaya."

58 Yesu uahandekele kuli ikeye nguendi, "Vambanje vali na vina, na tuzila vali na mashua, vuno honi Muna Muntu kesi naha kusatela mutue uendi."

59 Kaha Yesu uahandekele kuli yala mukuavo nguendi, "Njikave."

Vuno honi uje yala uahandekele nguendi, "Muene, cakulivanga njitave njihiluke njikatsinde tahi tate."

60 Yesu uamukumbuluile nguendi, "Seza vatsi valitsinde vakevo vavenia. Yove ya na kuambulula via Vumuene vua Njambi."

61 Yala mukuavo uahandekele nguendi, "Njikakukava Muene, vuno honi ca kulivanga njitave njiye njikasalese tahi vavushoko vuange."

62 Yesu uahandekele kuli ikeye nguendi, "Nga umo naputuka kulima na vangombe kaha atala kunima, kaha vipangi viendi kuvikapu viaseho mu Vumuene vua Njambi."