1 Ha litangua limo lia Sapalalo omo Yesu uayile ku njivo ya mukuluntu ua Vafaliseho na kulia, vantu vakele na kumutalela muyehi linga va uaneneho kashuilo. 2 Ha lutue luendi hakele yalauje uakele nakuvavala kuzimba mikono na mavoko uezile kuli Yesu. 3 Kaha Yesu uehuile Vafaliseho na valongisi va mezi a lishiko a Mosesa nguendi, "Cinapu cacili kuli Lishiko lietu ku kanguisa vantu ha litangua lia Sapalalo, indi houe?"

4 Vuno honi vaholokele. Kaha Yesu uambatele uje yala uakuvavala na kumukanguisa, nakumuecela aye. 5 Ambahoni uahandekele kuli vakevo nguendi, "Nga hakati keni hali umo ali na muana cipue ngombe uje nauila mulisima ha litangua lia Sapalalo, nkuma hajevene kumuasa ku muhumisamo ndi?"

6 Kaha vahonouele kumukumbulula.

7 Omo Yesu uamuene vangenzi vanahangula vihela via vituamo via vulemu, uavatelelele cisimo nguendi, 8 "Omo nga vanakulania ku cilika cavulo, keti ukatumame ha cituamo ca vulemu, muomu hamo kuli umo ua vulemu kupulakana yove ivanalania, 9 kaha uje uamilaniene muva voshe akahandeka kuli yeni nguendi, ‘Huma aha haunatumama linga ou yala atumame ha cihela cove.’ Kaha na shuamua ukambata cituamo ca cindende cakumanusuilila. 10 Vuno honi nga vanakulania, ya ukatumame ha cituamo ca cindende ca kumanusuilila, nga vavenia cilika akeja, akahandeka kuli yove nguendi, ‘Kavusamba, tumama ku cituamo ca vulemu,’ ambahoni uka tumama na vulemu ku voshe ukatumama navo ku mesa. 11 Muomu voshe vaje vaka lijundula vakevo vavenia va kavaneha ha mavu, kaha voshe vaje vakalikehesa vakevo vavenia vaka vajundula."

12 Ambahoni Yesu uahandekele kuli uje uamulaniene nguendi, "Nga uhana viakulia ha ciuano, keti lika ulanie vavusamba cipue va vamunanoko cipue vavushoko vove cipue vaka kufuka, vamua lihata navo, ngeci hamo navakevo vakamisana naua, kaha eci cikamuesa ngue vali nakumifueta. 13 Vuno honi nga uhana viakulia ha ciuano, lania vihutu, na visualonda, na vilema na tupuputua, 14 nga ulinga muje, kaha ukapua uakukuisula muomu kuvakasa kukufueta, kaha vaka kufueta ha kusanguka ca vaka vusunga."

15 Omo umo ua vaje vangenzi vavalaniene kukulia uovuile eci, uahandekele kuli Yesu nguendi, "Uakukuisula uje akatumama ku ciuano mu Vumuene vua Njambi!"

16 Yesu uahandekele kuli ikeye nguendi, "Kuakele muntu umo uje ualingile ciuano cakama kaha ualaniene vantu vavengi. 17 Ha ntsimbu ya ciuano uatumine vangamba kuli vaje vavalaniene nguendi, ‘Ijeni, muomu vioshe vinavua laja.’ 18 Vuno honi umo na umo uakele nakuhana lisesa. Uakulivanga uahandekele nguendi, ‘Njinalanda lihia, kaha njitonda linga njikalimone, tambula lisesa liange.’ 19 Mukuavo uahandekele nguendi, ‘Njinalanda vangombe likumi, kaha njili nakuya na kuveseka, tambula lisesa liange.’ 20 Mukuavo naua uahandekele nguendi, ‘Njinambata mpuevo hano vene, nankuma kunjasa kuija.’ 21 Kaha uje ngamba uahilukile na kuambulula kuli muene uendi. Ambahoni uje vavenia njivo uanienguele kaha uahandekele kuli ngamba yendi nguendi, ‘Ya hano vene mu vingila na mu vitapalo via nganda unehe vihutu, na visualonda, na tupuputua na vilema.’ 22 Omo ngamba yendi uahilukile uahandekele nguendi, ‘Muene, viunashikile via lingiua, vuno honi hanga kucili cihela.’ 23 Ambahoni muene uahandekele kuli ngamba yendi nguendi, ‘Ya mu vingila via mumikulo na mu vitapalo via mumikulo, usindiye vantu veje vakovele mu njivo yange linga ishule. 24 Kaha njikuleka nguange naumo uahi kuli vaje vanjalaniene vaka makela ku viakulia viange!’"

25 Litangua limo omo vantu vavengi vayile na Yesu, kaha uatengulukile na kuhandeka kuli vakevo nguendi, 26 "Uoshe uje eja kuli yange vuno honi kazindi vaishe na vaina, na mpueyendi na vana vendi, na vamunaina va vamala na vamunaina va vampuevo, cilivene, cipue muono uendi, kasa kupua ndongisi uange. 27 Uoshe uje kambata cilindakano cendi na kunjikava kasa kupua ndongisi uange. 28 Nga utonda kutunga njivo yalaha, unapande kutumama ha mavu na kumona vije vitondeka, kumona nga uasa kuimanusula. 29 Vuno honi nga uputukila kuhinda luvula, kuhumaho ku imanesa, kaha voshe vaje vakaimona kaha vakakujola 30 na kuhandeka nguavo, ‘Uje mukuetu uaputukile kutunga vuno honi nahonoua.’ 31 Cipue muene, nga aya ku nzita na kulua na mukuavo muene, nkuma kasa kutumama ha mavu na kumona nga asa kulua na vantu va kupua makulukazi likumi na uje mukuavo eja na vantu vakupua makulukazi makumi avali. 32 Nga kasa, kaha omo mukuavo acili kulahako, akatumako vantu linga vakahandeke via ciyulo. 33 Mucifua cimo vene," "Naumo uahi hali yeni apua ndongisi uange nga kaseze vioshe vianafuku.

34 "Muongua uapua uacili, vuno honi nga uanashamuka kaha kutovala cauo cikahiluka vati? 35 Ku ukapu uacili ku mavu cipue ku vuilo, vaka umbila kuti. Uoshe ali na matuitui, ovue!"