1 Ha litangua limo Yesu uemanene ha ntunda ya cisali ca Ngenesaleta tele vantu vakele nakulisindika kuya kuli ikeye linga vovue lizi lia Njambi. 2 Kaha uamuene mato avali vana atutika ku mukulo ua cisali. Vaka kuta vatsi vahumine mu mato na kukusha manda avo. 3 Yesu uakovelele mu vuato vumo, vuje vuapuile vua Simoni, kaha uamulombele ngeci avusindikile halahako kamandende na hantunda. Yesu uatumamene mu vuato, kaha ualongesele cije civunga ca vantu.

4 Omo Yesu uamanusuile kuhandeka, kaha uahandekele kuli Simoni nguendi, "Sindikila vuato haje ha mema a kulova, kaha yove na vakueni teni manda eni linga mujevele vantsi."

5 Simoni uamukumbuluile nguendi, "Muene, tunapanga cikuma vutsiki vuoshe vuno honi nacimo citunakuata cahi. Vuno honi nga yove unahandeka ngoco, kaha tukata manda." 6 Vatele manda avo kaha vakuatele vantsi vavengi cikuma, kaha manda avo aputukile kutavuka. 7 Nankuma, vaniatelele vavusamba vavo vakele mu vuato vukuavo linga veje vaku vakuase. Vezile vashulisile mato oshe na vantsi mukemo vaputukile kuvombela. 8 Omo Simoni Petulu uamuene vije vialingiuile, uatsikamene ha mavuli ku mesho a Yesu nakuhandeka nguendi, "Muene, huma kuli yange, muomu yange njimuka vupi!"

9 Simoni na vakuavo vali komokelele cikuma ha kumona vantsi vavengi vava kuatele. 10 Simoni uakele na vavusamba vendi vavali Yakomba na Yiuano vana va Zembendeo, na vakevo valikomokelele cikuma. Kaha Yesu uahandekele kuli Simoni nguendi, "Keti uvue liova, hume hano ukata vantu."

11 Vatutikile mato avo ku ntunda, vasezele vioshe, kaha vakavele Yesu.

12 Tele Yesu ali mu nganda imo muje muakele yala umo uje uakele nakuyanda na mushongo ua mbumba. Kaha omo uamuene Yesu, uavulumanene ha mavu nakumulambelela nguendi, "Muene, nga utonda, uasa kunjikanguisa!"

13 Yesu uoluele livoko liendi nakumukuata kaha uahandekele nguendi, "Njitonda, kanguka!" Hajevene uakangukile. 14 Yesu uamushikile nguendi, "Keti ulekeko muntu umo cuma eci, vuno honi ya ukalisholole kuli kasasendote, ambahoni ukakombelele nkombelo ije yashikile Mosesa linga vantu voshe vazivuke nguavo vakukanguisa."

15 Vuno honi muzimbu ua hali Yesu uashandokelele kuoshe, kaha vivunga via vantu vezile nakumuvuilila na kuvakanguisa ku mishongo yavo. 16 Vuno honi Yesu vintsimbu viavingi uakele nakuvaseza nakuya kuali kaliendi lika nakulombela.

17 Ha litangua limo omo Yesu uakele nakulongesa, Vafaliseho vamo na valongisi va mezi a Lishiko lia Mosesa vatumamene kuje, vaje vahumine mu vinganda vioshe mu Ngalileya na viamu Yundeya na viamu Yelusalema. Nzili ya Muene yakele hali Yesu mukukanguisa vantu. 18 Kaha vamala vamo vanehele yala muka kalepa vamulangekele ha citala tala, vesekele kumukovelesa mu njivo linga vamulangeke ku lutue lua Yesu. 19 Muomu ya civunga ca vantu, kuvauanene ngila yaku mukovelesela mukati. Nankuma, vamutualele helu lia njivo, vatuvile mbengua mu mateya, kaha vamusoselele na citala tala cendi ha mavu mukati ka civunga kulutue lua Yesu. 20 Omo Yesu uamuene lutsilielo luavo, uahandekele kuli uje yala nguendi, "Kavusamba kange, vipi viove vana vikonekela."

21 Valongisi va mezi a Lishiko lia Mosesa na Vafaliseho vaputukile kulihandekesa vakevo vavenia nguavo, "Iya ou yala alinakushaula Njambi? Njambi lika ikeye muka kukonekela vupi!"

22 Yesu uazivukile viyongola viavo, kaha uahandekele kuli vakevo nguendi, "Vikahoni mulina kuyonguela viuma via ngacije? 23 Nkuma cacasi cika, kuhandeka nguange, ‘Vipi viove vana vinavikonekela,’ indi kuhandeka nguange, ‘Katuka uende?’ 24 Njimimuesa linga muzivuke ngueni Muna Muntu ali na nzili yakama hano ha mavu ya kukonekela vipi." Kaha uahandekele kuli uje muka kalepa nguendi, "Njikuleka nguange katuka, ambata citala tala cove, uye kuimbo liove!"

25 Kaha hajevene uakatukile hakati kavo, uambatele citala tala cendi uayile kuimbo nakushangazala Njambi. 26 Kaha voshe valikomokelele cikuma! Vovuile liova, vashangazalele Njambi vahandekele nguavo, "Lelo tunamono viuma via kukomouesa!"

27 Hanima yeci, Yesu uahumineko kaha uamuene muka kutambula lisimu, lizina liendi Levi, natumama mu njivo yendi ya kutambuila lisimu. Kaha Yesu uahandekele kuli ikeye nguendi, "Njikave." 28 Kaha Levi uakatukile, uasezele vioshe na kumukava.

29 Ambahoni Levi ualingilile Yesu ciuano cakama mu njivo yendi, kaha hakati kavaje vangenzi vavalaniene hakele vaka kutambula lisimu vavengi na vantu veka. 30 Vuno honi Vafaliseho vamo na valongisi va mezi a Lishiko lia Mosesa vaje vakundamene ku mpunga yavo valiniengelele kuli vandongisi va Yesu. Vehuile nguavo, "Vikahoni mulila hamo na kunua hamo na vaka kutambula lisimu na vaka vipi?" 31 Yesu uavakumbuluile nguendi, "Vakangule kuvekutonda cimbanda, vuno honi kuvanga vaka kuvavala lika. 32 Nankuma yange kunjezile mukusana vaka vusunga, vuno honi vaje vaka vipi linga vatenguluke."

33 Vantu vamo vahandekele kuli Yesu nguavo, "Vandongisi va Yiuano vakaliumina kulia vintsimbu viavingi na kulombela, na vandongisi va Vafaliseho naua vakalingi cuma cimo, vuno honi vandongisi vove vakali na kunua ntsimbu yoshe."

34 Yesu uavakumbuluile nguendi, "Nkuma yeni mutalelela vangenzi ku ciuano ca vulo linga vaye na njala ndi? Muavusunga vene houe! Omo vavenia vulo acili navo kuvapandele kulinga ngacije. 35 Vuno honi litangua likeja omo vakahumisa vavenia vulo hakati kavo, ambahoni vakaliumina kulia."

36 Yesu uavatelele naua cisimo eci nguendi, "Kuuasa kutavula citopeko ku kazaku kakaha na kucitongela ha kazaku ka laja. Nga ulingamo, kaha utavula kazaku kakaha, citopeko ca ntanga ya iha kucilitombola na ntanga yalaja. 37 Naua vene kuvekulongela viniu via viha mu vinjeke via vilambu via laja. Nga ulingamo vije vinjeke via vilambu vitavuka kaha viniu vihitila muangoco, kaha vije vinjeke via vilambu vikapihia. 38 Vuno honi viniu via viha vaka vilongela mu vinjeke via vilambu via viha. 39 Naumo uahi asa kunua viniu via viha hanima yakunua viniu via laja, muomu kahandeka nguendi, ‘Viniu via laja vikevio viacili cikuma.’"