1 Ha litangua limo Yesu uakele ku cihela cimo na kulombela, omo uamanusuile kulombela, umo ua vandongisi vendi uahandekele kuli ikeye nguendi, "Muene, tulongese kulombela ngue muje Yiuano muka kumbuitika mualongeselele vandongisi vendi."

2 Yesu uavalekele nguendi, "Omo mulombela kuli Njambi lombeleni ngueni,

"Tatetu

valemese lizina liove

Vumuene vuove vuije.

3 Tuhane lelo kulia cetu ca ha litangua na litangua.

4 Tukonekele ku vipi vietu,

muomu netu tukakonekela vaka kutuvulumuina,

keti ututuamenene muvieseko."

5 Ambahoni Yesu uahandekele kuli vakevo nguendi, "Singanieka ngue uli na kavusamba kove kaha uyako mukati ka vutsiki na kuhandeka nguove, ‘Kavusamba, njatsantsela njilombako vimbolo vitatu lika, 6 muomu kavusamba kange neja mukunjimenekela kaha kunjesi na viakulia viaku mujumbula!’ 7 Kaha uje kavusamba kove oku ali mu njivo akutava nguendi, ‘Keti unjitanganese njapata laja ku njivo kaha yange na vana vange tuakosa laja, kunjasa kuhinduka na kukuhana cimo naua.’ 8 Njimileka nguange, cipue ngocovene kakahinduka na kukuhana viakulia muomu uapua kavusamba kove, vuno honi akahinduka na kukuhana vioshe vije viutonda muomu kuuesi na shuamua yakulomba kushuakumo. 9 Kaha njimileka nguange, lombeni, kaha vakamihana, tondeni kaha mukauana, toteni kaha vaka mishokoluela. 10 Muomu uoshe uje alomba akatambula, kaha uoshe uje atonda akauana, kaha kuli uje atota vaka mushokoluela. 11 Iya ishe hakati keni, nga munendi amulomba intsi, kaha ikeye amuhana linoka? 12 Cipue nga amulomba mayaki kaha amuhana linieue? 13 Nga yeni, vaka vupi muzivuka kuhana viacili kuli vana veni, nkuma honi cikafua vati kuli Ishueni ua muilu uje akahana Cimbembesi Uakulela kuli vaje vamulomba!"

14 Litangua limo Yesu uakele nakuhumisa lihamba lije lialingisile muntu kupua kaveveve. Omo lije lihamba liahumine kaha uje yala uaputukile kuhandeka. Omo vantu vamuene evi valikomokelele. 15 Vuno honi vamo vavo vahandekele nguavo, "Nahumisa lihamba mu nzili ya Mbelezembulu muene ua mahamba."

16 Vamo vatondele kumueseka, kaha vamulombele linga alinge cikomoueso cije cimuesa ngue Njambi ikeye namutumu. 17 Vuno honi Yesu ha kuzivuka voyongola viavo, kaha uahandekele kuli vakevo nguendi, "Vumuene vuje vulitepa hakati na kuliluisa vukevuo vavenia vukaua. Nga vantu vanjivo imo valiluisa hakati kavo kaha ije njivo ikaua. 18 Nga vumuene vua Satana vuli na vivunga vililuisa vikevio vavenia, nkuma vumuene vuendi vukakola vatihoni? Njinehula eci muomu yeni muhandeka ngueni, njikahumisa mahamba mu nzili ya Mbelezembulu. 19 Kaha nga njihumisa mahamba mu nzili ya Mbelezembulu, kaha vandongisi veni vaka likuasesa nzili yeya omo muvakahumisa mahamba? Eci cikeco vandongisi veni vaka mihisa. 20 Vuno honi nga njikahumisa mahamba mu nzili ya Njambi, kaha Vumuene vua Njambi vuneja kuli yeni.

21 "Omo nga yala ua nzili nalivuahesela laja vitua viendi aniunga njivo yendi, kaha vupite vuendi vuoshe vukaniungiua muacili. 22 Vuno honi nga uje ali na nzili yakumupulakana eja nakuluisa nakumuhiana kaha akambata vitua vioshe via uje muntu vije via tsilielele. Kaha akalipangezela na vakuavo vije vioshe vianevi.

23 "Kaha uoshe uje kesi kumutambela uange, muavusunga ikeye anjiluisa, kaha uoshe uje kakungulula nange ashandola.

24 "Omo cimbembesi cacipi cihuma muli muntu, kaha cendakana mu mpambo kutalezeka cihela cakuhuimina. Nga kucasa kuuana cihela kaha cilihandekesa cikeco vavenia nguaco, ‘Njihiluka ku njivo yange kuje njahumine.’ 25 Kaha omo cihiluka ciuana ije njivo vanaikombo nakuihaka muacili. 26 Ambahoni ciya na kukaneha vimbembesi vitanu na vivali vieka vakupihia cikuma kupulakana cikeco kaha vikovelamo na kukalamo. Kaha kupihia ca muntu uje cakukotokela cikapua cacipi cikuma kupulakana cije cakulivanga!"

27 Omo Yesu uakele nakuhandeka evi, mpuevo umo uamuje mu civunga uje uakele nakuvuilila evi uatambakanene cikuma na kuhandeka nguendi, "Uakukuisula uje mpuevo uakusemene na kukulela!"

28 Vuno honi Yesu uamukumbuluile nguendi, "Vakukuisula cikuma vaje vovua lizi lia Njambi naku liononoka!"

29 Omo civunga ca vantu calivuezelelele, Yesu uahandekele nguendi, "Vantu vavapi va matangua ano vatonda lika cimueso vuno honi kuvacimono, kuvanga lika cimueso ca Yona. 30 Ngue muje Yona uapuile cimueso ca vantu vamu Ninive, mucifua cimo vene na Muna Muntu akapua cimueso ca vantu va matangua ano. 31 Lisano uaku Shemba akemana nakuluisa vantu va matangua ano ha litangua lia kusompa na kuvahisa. Muomu uahuminine kulahako kuakuvua mana a Solomoni. Honi taleni! Umo uakupulakana Solomoni uno alikuno. 32 Vantu vaku Ninive vaka katuka nakuluisa vantu va matangua ano ha litangua lia kusompa naku vahisa. Muomu vantu vaku Ninive vatengulukile ku vilinga viavo via vipi omo vovuile kuambulula ca Yona. Honi taleni! Uakama cikuma kupulakana Yona uno alikuno!

33 "Naumo uahi asa kushuameka ndeya yendi nakuishueka cipue kuihaka muintsi ya liendeko, vuno honi ihaka ha citumbiko, ngeci uoshe uje akovela mu njivo amone ceke. 34 Mesho ove akeuo ceke ca muvila uove. Nga mesho ove amona muacili kaha muvila uoshe ukashula na ceke, vuno honi nga mesho ove kuamono kaha muvila uove uoshe ukashula na milima. 35 Nankuma zangama ngeci ceke cije cili muli yove keti cipue milima. 36 Nga muvila uove uoshe uashulu na ceke, kua kuhona kapenga ka milima, kaha ukashula na ceke ngue muje ndeya muikaneha misha ya ceke hali yove."

37 Omo Yesu uamanusuile kuhandeka, Kafaliseo umo uamulaniene linga akalie nendi. Kaha Yesu uakovelele na kutumama nakulia hamo nendi. 38 Kafaliseo ualikomokelele omo uamuene Yesu katanene ku mavoko endi mukulia. 39 Muene uahandekele kuli ikeye nguendi, "Taleni, yeni Vafaliseho muka lelesa nganja na lilonga hambanza, vuno honi mukati keni muashulu na lizangamena na vupi. 40 Yeni vilema! Kumuzivuka ngueni, Njambi uje uatangele helu lieni, ikeye naua uatangele mukati ndi? 41 Vuno honi haneni ku vihutu viuma vije vili mukati, kaha viuma vioshe vikapua via vakulela kuli yeni.

42 "Tuyando kuli yeni Vafaliseho! Muomu mukahana kuli Njambi ca vulikumi ha viuma vije mukashingasana ha via kulia ngue minte, na luku, na visapa sapa vikuavo, vuno honi yeni muakala na civembulu ku vantu naua kumuazangele Njambi. Evi munapande kuvilinga kuakuhona kuecela vije vikuavo.

43 "Tuyando tueni, Vafaliseho! Muomu muazanga kutumama ha vituamo viacili mu vinjivo via malombelo, kaha muazanga vantu kumikandelela na kasingimiko mu vihela viakulandesela. 44 Tuyando tueni, muomu yeni muapua ngue vihilo vije viakuhona kumoneka. Vantu vakendeho kuakuhona kuzivuka."

45 Kaha umo ua valongisi va mezi a lishiko lia Mosesa uahandekele kuli Yesu nguendi, "Mulongisi, omo uli nakuhandeka evi, uli nakushaula yetu naua."

46 Kaha uahandekele kuli vakevo nguendi, "Tuyando tueni, yeni naua valongisi va mezi a mashiko a Mosesa! Muomu mukatuika vantu viteli via kulema vuno honi yeni vavenia kumuekukuatako cipue na munie umo kukuasa vaje vajundula vije viteli. 47 Tuyando tueni, muomu mukavuahesa ha vihilo via tunanguizi vaje vavatsihile vakukuluila veni. 48 Nkuma yeni mulina vukaleho vuje mutava vije vivalingile vaje vakukuluila veni. Muomu vatsihile vaje tunanguizi kaha yeni muatungile vihilo viavo. 49 Nankuma ha cuma eci mana a Njambi ahandekele nguauo, ‘Njikavatumina tunanguizi na tunganda kaha vamo vavo vakavatsiha na kuvapakesa cikuma.’ 50 Nankuma vantu va ntsimbu ino vaka vazangamesa ha kutsiha tunanguizi voshe hume hakutanga ca mavu, 51 hume ha maninga a Avele nakuheta ha maninga a Zakaliya, uje ivatsihilile mukati ka mutula na Cihela Cakulela. Njimileka nguange, vantu va ntsimbu ino vaka vazangamesa voshe hali evi.

52 "Tuyando kuli yeni, valongisi va mezi a lishiko lia Mosesa! Muomu munanieke vantu sapi yakushokoluesa ku cikolo ca mangana, vuno honi yeni vavenia kumua kovelelemo, kaha muka vindika vaje veseka kukovelamo!"

53 Omo Yesu uamanusuile kuhandeka evi, uahumine ku cihela cije. Kaha valongisi va mezi a Lishiko lia Mosesa na Vafaliseho vaputukile kumuluisa cikuma na kumuhula vihula viavingi viaku munienguesa, 54 vavandamenene indi nga ahandeka viavipi linga vamukuateleho.