1 Capuile ngacije ha ntsimbu ije, kuli Sezale Angushitu kua humine lizi lia kushika, linga vasonekese vantu voshe mu vumuene vua Loma. 2 Eci cikeco kusoneka cije ca kulivanga civa lingile omo Kiliniu uapuile nguvulu ua Siliya. 3 Kaha voshe vayile ku membo avo, linga va kavasonekeleko.

4 Yosefa uahumine ku nganda ya Nazaleta mu Ngalileya, uayile ku nganda ya Mbetelehema mu Yundeya ku limbo lia semukilile Muene Ndaviti, muomu uapuile muka muyati ua Ndaviti. 5 Uayile nakumusoneka hamo na Maliya uje ya lamene, uje uemitile. 6 Kaha tele vacili kuje matangua endi a kusema ahetele. 7 Kaha uasemene munendi ua ntuatua ua yala, kaha ua muzengelele ha vintanga, kaha uamu hakele mu cikasa ca kulila vangombe muomu kukuakele mulili mu cihela ca vangenzi.

8 Ku mutambela uje vene kuakele tuniungi mucana, vakele nakuniunga vampanga vavo vutsiki. 9 Kangelo ua Muene uasholokele kuli vakevo, kaha vumpau vua Muene vuatuile ceke hakati kavo. Vovuile liova liakama cikuma. 10 Vuno honi kangelo uahandekele kuli vakevo nguendi, "Keti muvue liova! Muomu njinaneha muzimbu uacili kuli yeni, uje ukaneha kujolela cakama ku vantu voshe. 11 Ha litangua lino vene mu nganda ya Ndaviti munasemuka Muyoyesi ueni, ikeye Kilistu Muene! 12 Kaha eci cikapua cimueso ceni, mukauana kakeke vanamuzengela ha vintanga vana mulangeka mu cikasa caku lila vangombe."

13 Hajevene kuasholokele civunga cakama ca masualale ca tungelo va muilu vemanene hamo na kangelo uje uanehele muzimbu, vembile na kushangazala Njambi nguavo,

14 "Vumpau vukale kuli Njambi uakuhiana vioshe ua muilu,

ciyulo cikale hano ha mavu ku vantu vaje vazanga!"

15 Omo tungelo vahilukile muilu kuhuma kuli tuniungi, kaha tuniungi valihandekesele umo na mukuavo nguavo, "Tuyeni honi ku Mbetelehema linga tuka mone eci cuma cinalingiuako, cije cana tusholuela Muene."

16 Nankuma, vayile hajevene vuasi vuasi vakauanene Maliya na Yosefa na kakeke vana mulangeka mucikasa caku lila vangombe. 17 Omo tuniungi vamumuene, vambuluile mezi aje avalekele kangelo hali kakeke. 18 Kaha voshe vaje vovuile valikomokelele ha viuma vije vivahandekele tuniungi. 19 Vuno honi Maliya uaniungile mezi oshe aje naku ayongola mu mutima uendi. 20 Kaha tuniungi vahilukile oku vahana vumpau na kushangazala Njambi ha viuma vioshe voviule, na vije vamuene. Viuma vioshe vialingiuile ngue vene muje muavalekele kangelo.

21 Hanima ya matangua atanu na atatu, omo ntsimbu yahetele yakulovola kakeke, kaha vamulukile lizina liendi Yesu, lizina lije lia mulukile kangelo ntsimbu kanda vamuimite.

22 Omo ntsimbu ya kulilelesa yahetele, Yosefa na Maliya valingile ngue ku Lishiko lia Mosesa. Nankuma, vatualele muanike ku Yelusalema linga vaka mukundike kuli Muene, 23 ngue muvanacisoneka mu lishiko lia Muene nguavo, "Muana uoshe ua ntuatua ua yala vaka mukundike kuli Muene." 24 kaha naua vaka kombelele nkombelo ya tutela vavali cipue vana va mavembe vavali, kuya ku lishiko lia Muene.

25 Kaha honi kuakele yala umo mu Yelusalema lizina liendi Simoni. Uapuile muka vusunga kaha naua uazangele Njambi, uavandamanene kuovoka ca Isaleli. Cimbembesi Uakulela uakele hali ikeye, 26 vavisholuele kuli ikeye kuli Cimbembesi Uakulela ngeci kakatsi kuakuhona kumona Kilistu ua Muene. 27 Simoni ha kumutuamenena kuli Cimbembesi Uakulela, uakovelele mu Njivo ya Njambi. Omo visemi vanehele kakeke Yesu mu Njivo ya Njambi linga va mulinge ngue kuya ku lishiko lia Mosesa. 28 Simoni uatambuile kakeke mu mavoko endi, uatsantselele kuli Njambi na kuhandeka nguendi,

29 "Honi Muene unaniungu cikulaheso cove kuli yange,

honi tava ngamba yove linga aye mu ciyulo,

30 muomu mesho ange anamono kuovola cove,

31 cije ci unavuahesela vantu voshe.

32 Cikapua ceke cakusholola kuli vaje keti Vayunda,

nakuneha vumpau ku vantu vove Vaisaleli."

33 Vaishe na vaina vali komokelele ha viuma vije viahandekele Simoni hali Yesu. 34 Ambahoni Simoni uavakuisuile na kuhandeka kuli Maliya vaina ya Yesu nguendi, "Tala! kakeke ou vamuhanguile kuli Njambi mukunongesa nakuovola vavengi mu Isaleli. Akapua cimueso ca kuhuma kuli Njambi, cije vantu vavengi vakaluisa, 35 ngeci cikasholole viyongola viavo via vushueke. Kaha vusiua vukatuva mitima yavo ngue mukuale uakuhomona."

36 Kuakele umo kananguizi uakukuluvala uampuevo lizina liendi Ana muna Fanuele uaku muyati ua Ashele. Uje uashombokele lika ha miaka itanu na ivali, 37 kaha honi uapuile ntuluue ha miaka makumi atanu na atatu na miaka iuana (84) Ikeye kahumine mu mbalanda ya njivo ya Njambi, uakele nakulemesa Njambi mu kuliumina kulia na malombelo vutsiki na mutania. 38 Ha ntsimbu ijevene uahetele kuli Maliya na Yosefa uahanene citsantsela kuli Njambi, uahandekele hali uje muana kuli voshe vaje vavandamenene Njambi kupatula Yelusalema.

39 Omo Yosefa na Maliya vamanusuile vioshe ngue ku lishiko lia Muene, vahilukile kuimbo liavo ku Nazaleta mu Ngalileya. 40 Kaha muana uakolele uakele na nzili. Uakolele mu mana, kaha kavumbi ka Njambi kakele hali ikeye.

41 Ha muaka na muaka visemi va Yesu vakele nakuya ku Yelusalema ku ciuano ca Paseka. 42 Omo Yesu uakele na miaka likumi na ivali, kaha vayile nendi ku Yelusalema ku cilika ca ciuano ngue ku ntsimbu yoshe. 43 Omo matangua aje a ciuano ahuile, omo vakele na kuhiluka kuimbo, vuno honi muanike Yesu uasalele munima mu Yelusalema. Visemi vendi ku vazicivukile, 44 vayonguele nguavo hamo ali ha cendo, nankuma vendele vungezi vua litangua limo, kaha vaputukile kumutonda hakati kava vushoko vuavo nava vusamba vavo, 45 vuno honi kuva muuanene. Nankuma, vahilukile naua ku Yelusalema mukumutonda. 46 Kaha ha litangua lia mu citatu vamuuanene mu Njivo ya Njambi, natumama hakati ka valongisi, na kuvovuilila naku vehozola vihula. 47 Kaha voshe vaje vovuile vali komokelele cikuma mangana endi naku kumbulula cendi. 48 Visemi vendi omo vamumuene valikomokelele, kaha vaina vahandekele kuli ikeye nguavo, "Munange, nkuma vika unatulingilamo? Tala! Isho nange tunaliniengele nakukutonda."

49 Yesu uavakumbuluile nguendi, "Vika munanjitondela? Nkuma kumuazivukile ngueni njinapande kukala mu njivo ya tate ndi?" 50 Vuno honi vakevo kuvevuisisile vije via vakumbuluile.

51 Yesu uayile navo ku Nazaleta, kaha kuje uatualeleleho kuvononoka. Vaina vaniungile vioshe evi mu mutima uavo. 52 Kaha Yesu uakolele mu muvila, na mu mana, uauanene kavumbi kakama kuli Njambi naku vantu.