1 Omo Yesu uamanusuile kuhandeka viuma vioshe evi ku vantu, kaha uayile ku Kapenauma. 2 Mu nganda ije muakele mukuluntu ua masualale va Loma uje uakele na ngamba yendi uaseho cikuma kuli ikeye. Uje ngamba yendi uavavalele kaha uatondele kutsa. 3 Omo uje mukuluntu uovuile lutsimo lua Yesu, uatumine vamo vakuluntu va Vayunda kuli ikeye nakumulomba linga eje mukukanguisa ngamba yendi. 4 Vezile kuli Yesu vamulambelelele cikuma nguavo, "Ou yala uapande kumukuasa. 5 Ikeye uazanga vantu vetu, naua uatutungilile njivo ya malombelo."

6 Yesu uayile navo, vuno honi omo uahetele kuyehi na njivo, uje mukuluntu ua masualale uatumine vavusamba vendi kuli Yesu nakumuleka nguavo, "Muene, keti ukaluuise mutima uove muomu kucanjipandele yove ukakovele mu njivo yange. 7 Ngecivene nange naua kucanjipandele kuheta kuli yove. Handeka lika lizi, kaha ngamba yange akakanguka. 8 Njizivuka eci muomu nange uana nji lisualale uje ononoka vaje vanjituamenena, kaha nange naua njili na masualale vaje vanjikatuamenena, kaha njihandeka kuli umo nguange, ‘Ya!’ kaha aya, kaha naua kuli mukuavo nguange, ‘Ija!’ kaha eja. Njikahandeka kuli ndungo yange nguange, ‘Linga evi!’ kaha acilinga."

9 Yesu ualikomokelele omo uovuile evi, kaha uatengulukilile kuli cije civunga camukavele, uahandekele nguendi, "Njimileka nguange, cipue vene mu Isaleli kunjauanenemo lutsilielo luakama ngue olu."

10 Omo vaje vamala vavatumine vahilukile ku njivo ya uje mukuluntu vaka uanene uje ndungo yendi nakanguka.

11 Munima yevi Yesu uayile ku nganda ya Naine, vandongisi vendi na civunga cakama vamukavele. 12 Omo ikeye uahetele kuyehi na cikolo ca nganda, kaha vantu vatuhuile civimbi hambanza, uje yala uatsile uapuile muana umolika uaumo ntuluue, kaha civunga cakama cahumine muje mu nganda cakele hamo na uje ntuluue. 13 Omo Muene uamumuene, kaha uamuvuilile cikeketima, kaha uahandekele kuli ikeye nguendi, "Keti ulile." 14 Ambahoni Yesu uayile uakakuatele ku citala tala, kaha vaje tufunde vemanene. Yesu uahandekele nguendi, "Ove mukuenje, njikuleka nguange, hinduka!" 15 Uje yala uatsile uasangukile uatumamene nakuputuka kuhandeka, kaha Yesu uamuhanene kuli vaina.

16 Vantu voshe vovuile liova, kaha vashangazalele Njambi, vahandekele nguavo, "Kananguizi uakama neja kuli yetu na Njambi neja nakuovola vantu vendi!"

17 Kaha lutsimo olu lua Yesu luashandokelele mu Yundeya muoshe naku vinganda vioshe via kulihata.

18 Omo vandongisi va Yiuano vamulekele viuma vioshe evi, kaha uasaneneko vandongisi vendi vavali. 19 Uavatumine kuli Muene nakumuhula nguavo, "Nkuma yove vene ukeja? Indi tuvandameneko ueka naua."

20 Omo vamala vezile kuli Yesu vahandekele nguavo, "Yiuano muka kumbuitika natutumu kuli yove nakuihula nga yove uje eja indi tucivandameneko ueka naua."

21 Ha ntsimbu ijevene Yesu uakanguisile vantu vavengi ku kuvavala cavo, naku mishongo yavo nakuhumisa vimbembesi via vipi nakuimuisa tupuputua vavengi. 22 Kaha uakumbuluile vandongisi va Yiuano nguendi, "Yemuye mukahandeke kuli Yiuano vimunamono nevi vimunovu. Tupuputua vamona, vilema venda, vaka mbumba vanalele, tusinda matuitui vevua, vatsi vasanguka, kaha Muzimbu Uacili vauambulula kuli vihutu. 23 Vakukuisula vaje kuvatsuntsuka mu lutsilielo luavo muomu yange."

24 Omo vandongisi va Yiuano vahilukile, kaha Yesu ualekele cije civunga hali Yiuano nguendi, "Nkuma omo muayile kuli Yiuano mu mpambo vika muatondele kukamona? nkuma muayile mukumona lihongo litepuzoka na mpunzi ndi? 25 Nkuma muayile nakumona vika honi? Muntu nazala vuzalo vuasenga ndi? Vantu vakakuzala vuzalo vuasenga na kukala muacili vakala mu mapela a muene. 26 Njilekeni nkuma muatondele kukamona vikahoni? Muatondele kukamona kananguizi ndi? Eyo, ikeye vene, vuno honi muakamuene viakama kupulakana kananguizi. 27 Ou ikeye Yiuano uje visoneka vihandeka nguavio, ‘Njikatuma kanganda kange kulutue luove. Akavuahesa ngila yove.’ 28 Njimileka nguange, ku vantu voshe vaje vanakeleko, naumo uahi napulaka Yiuano. Vuno honi uje uamundende kumanusuilila mu Vumuene vua Njambi ikeye napulakana Yiuano."

29 Vantu voshe hamo na vaka kutambula lisimu vononokele vusunga vua Njambi, kaha vavambuitikile kuli Yiuano. 30 Vuno honi Vafaliseho na valongisi va Mashiko a Mosesa vavianene vilinga via Njambi hali vakevo, mukemo kuva vambuitikile kuli Yiuano.

31 Yesu uahandekele nguendi, "Kuliveya njasa kusetekesa vantu va matangua ano? Nkuma vanapu ngue vika? 32 Vakevo vanapu ngue vanike vanatumama ku cihela ca kulandesela, kaha valitambakana umo na mukuavo, ‘Tunamimbilile miaso ya vushombolua, vuno honi kumuakinine! Tuamimbilile miaso ya vusiua vuno honi kumua lilile!’ 33 Omo Yiuano muka kumbuitika uezile, kalile mbolo cipue kunua viniu, kaha muahandekele ngueni, ‘Ali na mahamba!’ 34 Kaha omo Muna Muntu uezile, ikeye ualile nakunua, kaha muahandekele ngueni, ‘Taleni ou yala! Uapua muka mutupu na kupenda, kaha kavusamba ua vaka kutambula lisimu na vaka vipi!’ 35 Vuno honi mana a Njambi vana amuesa kupua a vusunga kuli vaje voshe va atambula."

36 Omo umo ua Vafaliseho ualizina lia Simon ualaniene Yesu kulia nendi, kaha uakovelele mu njivo ya uje Kafaliseo nakutumama nakulia. 37 Kuakele mpuevo ua mu nganda ije, uapuile muka vupi. Omo uovuile nguendi Yesu ali na kulia mu njivo ya Kafaliseo, uanehele kantsazi ka mazi aluengo luakunika muacili. 38 Kaha uemanene kuyehi na viliato viendi, na kulila kaha uaputukile kujulisa viliato via Yesu na misozi yendi, ambahoni uavihundile navi nkambu viendi nakutsemba ku viliato viendi, kaha uamuitilile mazi ku mikono. 39 Omo Kafaliseo uje uamusanene uamuene eci, ualihandekese ikeye vavenia nguendi, "Nga ou yala uapuile kananguizi, ngue nazivuka cifua muka cou mpuevo na mukuata. Ngue nazivuka nguendi uapua muka vupi."

40 Yesu uamulekele nguendi, "Simoni njili na cuma cimo njitonda kukuleka."

Kaha uatavele nguendi, "Nkuma cikahoni Mulongisi?"

41 Yesu uamutelelele cisimo nguendi, "Kuakele vamala vavali vakumuine vimbongo kuli muka kukumuisa. Umo uakumuine vimbongo via Siliva viakupua vihita vitanu, mukuavo naua uakumuine vimbongo via Siliva makumi atanu. 42 Omo vahonouele kuvihiluisa, uava konekelele voshe vavali. Hakati kavo iya uje akamuzanga cikuma?"

43 Simoni uamukumbuluile nguendi, "Njasinganieka nguange uje ya hanene viavingi ikeye ya konekelele cikuma."

Kaha Yesu uahandekele kuli ikeye nguendi, "Unahandeka muacili." 44 Ambahoni uatengulukilile kuli uje mpuevo nakuhandekele kuli Simoni nguendi, "Uamumono ou mpuevo? Njakovelele mu njivo yove, ku uanjihanene mema akutana ku viliato viange, vuno honi natanesa viliato viange na misozi yendi na kuvihunda na vinkambu viendi. 45 Unahonouele cipue kunjitsemba, vuno honi kuhuma ntsimbu njakovelele muno mu njivo yove kecelele kutsemba viliato viange. 46 Ku uanjivuavesele na mazi ku mutue uange, vuno honi ikeye nanjitila mazi aluengo ku viliato viange. 47 Nankuma njikuleka nguange, vipi viendi vije viavingi vanavikonekela muomu na muesa cizango cakama, vuno honi uje ivanakonekela muvundende, akamuesa cizango ca cindende."

48 Kaha Yesu uahandekele kuli uje mpuevo nguendi, "Vipi viove vana vanavikonekela."

49 Kaha vaje vakele nendi ku mesa vaputukile kusinganieka nguavo, "Nkuma iya ou, uje asa kukonekela vipi?"

50 Kaha uahandekele kuli uje mpuevo nguendi, "Lutsilielo luove lua kuovola. Ya mu ciyulo."