1 Ambahoni Yesu uatelelele vandongisi vendi cisimo eci kuvalongesa nguendi, vanapande kulombela ntsimbu yoshe kuakuhona kuecela. 2 Uahandekele nguendi, "Mu nganda imo muakele muka kusompa uje kakele nakuvuila Njambi liova cipue kusingimika vantu. 3 Kaha naua mu nganda ijevene muakele ntuluue uje uakele nakuija kuli ikeye vintsimbu viavingi na kuhandeka nguendi, ‘Njiluileko ku vitozi vange!’ 4 Ha ntsimbu yaindende uje muka kusompa uavianene, hajevene uahandekele kuli ikeye vavenia nguendi, ‘Cipue vene kunjiteue Njambi cipue kusingimika vantu, 5 vuno honi ou ntuluue nanjishupu cikuma, njapande kumuluilako, muomu nga atualelelaho kuija kaha aka njihonesa!’"

6 Kaha Muene uahandekele nguendi, "Ivuilileni vije viahandeka uje muka kusompa uakuhona vusunga! 7 Nkuma Njambi kasa kuluila mu vusunga ku vantu vendi vaje valina kulilila kuli ikeye vutsiki na mutania ndi? Nkuma ngueni akasimbula mukuvakuasa ndi? 8 Njimileka nguange, hajevene akavaluila. Vuno honi omo Muna Muntu akeja, nkuma akauanaho vaka lutsilielo hano ha mavu ndi?"

9 Yesu uatele cisimo eci naua ku vantu vaje vaka kutsiliela vusunga vuavo vavenia nakushaula vakuavo. 10 Uahandekele nguendi, "Vamala vavali vayile ku njivo ya Njambi nakulombela, umo uapuile Kafaliseo, mukuavo uapuile muka kutambula lisimu. 11 Kaha Kafaliseo uemanene na kulomba nguendi, ‘Njikutsantsela Njambi, yange kunjafuile ngue vakuetu vantsintsa, vaka kuhona vusunga, vaka vupangala. Yange kunjafuile ngue uje muka kutambula lisimu nemana kuje. 12 Njikaliumina kulia ha matangua avali musondo, njikahana cimo kulikumi ca vioshe vinjikauana.’ 13 Vuno honi uje muka kutambula lisimu uemanene ku lahako, kaha kasele cipue kutala kuilu, vuno honi ualipupile ha ntulo na kuhandeka nguendi, ‘Njambi, njivuile ngozi yange muka vupi.’ 14 Njimileka," nguange, "uje muka kutambula lisimu uayile kuimbo liendi mu vusunga kupulakana uje Kafaliseo, voshe vaje valijundula vakevo vavenia vaka vakehesa, vuno honi voshe vaje valikehesa vakevo vavenia vaka vajundula."

15 Vantu vanehelelele Yesu vanike vavandende linga avasaleke mavoko, kaha omo vandongisi vendi vacimuene, vesekele kuvindika vaje vantu. 16 Vuno honi Yesu uasanene vanike vavandende veje kuli ikeye, uahandekele nguendi, "Eceleni vanike vavandende veje kuli yange keti muvavindike, muomu Vumuene vua Njambi vuli ku vantu ngue ava vanike vavandende. 17 Muavusunga njimileka nguange, uoshe uje katambula Vumuene vua Njambi ngue muanike uamundende, kakakovela mu Vumuene vua Njambi."

18 Ha litangua limo umo mukuluntu ua Vayunda uehuile Yesu nguendi, "Mulongisi uacili, nkuma vika njinapande kulinga linga njikauane muono uayaye?"

19 Yesu uamukumbuluile nguendi, "Vika unjitumbuila nguove uacili?" Naumo uahi "Uacili kuvanga lika Njambi. 20 Uzivuka mashiko a Njambi aje ahandeka nguauo, ‘Keti ulinge vupangala, keti utsihe, keti uive, keti uvangeye mukueni vukaleho vua makuli, singimika isho na noko.’"

21 Kaha uje yala uakumbuluile Yesu nguendi, "Mashiko oshe aua njaononoka laja hume kuvuanike vuange."

22 Kaha omo Yesu uevuile evi, uahandekele kuli ikeye nguendi, "Kunasupila cuma cimo ci unapande kulinga. Ya ukalandese vioshe vi ulinavio kaha ukahane vimbongo vioshe kuli vihutu, kaha ukakala na vufuko muilu, kaha uije, unjikave." 23 Vuno honi uje yala omo uevuile evi, uanienguele muomu ikeye uakele na vufuko vuavuingi.

24 Omo Yesu uamuene nguendi naniengua, kaha uahandekele nguendi, "Cinapu cacikalu kuli vaka kufuka kukovela mu Vumuene vua Njambi! 25 Cacasi kuli kamelu kukovela mu lisho lia nguya vuno honi cacikalu cikuma ku muntu muka kufuka kukovela mu Vumuene vua Njambi."

26 Vaje vantu vovuile, vamuihuile nguavo, "Nkuma iya honi akovoka?"

27 Vuno honi Yesu uavakumbuluile nguendi, "Cije cacikalu ku vantu capua cacasi kuli Njambi."

28 Petulu uahandekele nguendi, "Tala! Yetu tunaseza vioshe vituli navio, nakukukava."

29 Yesu uahandekele kuli vakevo nguendi, "Eyo, muavusunga njimileka uoshe uje naseza njivo yendi, cipue mpueyendi, cipue munaina, cipue visemi vendi, cipue vana vendi, muomu ya Vumuene vua Njambi, 30 akatambula viavingi cikuma mu muono ou na muono uayaye mu miaka ije ikeja kulutue."

31 Yesu uatualele vandongisi vendi likumi na vavali kualikaliavo lika, kaha uahandekele kuli vakevo nguendi, "Evuilileni! Tulinakuya mu Yelusalema kuje viuma vioshe vije vivasonekele kuli tunanguizi hali Muna Muntu linga vika lishulisise. 32 Muna Muntu vakamuhana ku mavoko a vaje keti Vayunda vaje vaka mushendumuna na kumutuka na kumujekuila. 33 Vaka mupupa, kaha vaka mutsiha, vuno honi hanima ya matangua atatu vakamusangula."

34 Vuno honi vandongisi vendi kuvovuisisile nacimo cahi ha viuma evi, muomu kulumbunuka ca mezi aua vava shuekeleleco linga keti vazivuke vije viahandekele Yesu kuli vakevo.

35 Omo Yesu uahetele kuyehi na Yeliko, kuakele yala umo ua kapuputua uakele kumukulo ua ngila nakulomba. 36 Omo uevuile civunga ca vantu cili nakuhita, uehuile nguendi "Vika vili nakulingiua?"

37 Kaha vamulekele nguavo, "Yesu uaku Nazaleta ali nakuhita."

38 Kaha uatambakanene nguendi, "Yesu! Muna Ndaviti! Njivuileko cikeketima!"

39 Vantu vaje vakele kulutue lia civunga, vamulekele linga aholoke. Vuno honi ikeye uatambakanene cikuma nguendi, "Ove Muna Ndaviti! Njivuileko cikeketima!"

40 Yesu uemanene nakushika nguendi, "Muneheni kuno". Omo uje yala uashuenene kuyehi, Yesu uamuhuile nguendi, 41 "Vika utonda linga njikulingile?"

Kaha uamukumbuluile nguendi, "Muene njitonda linga njimone naua."

42 Yesu uahandekele kuli ikeye nguendi, "Mona! Lutsilielo luove luna kukanguisa."

43 Kaha hajevene uaputukile kumona, uakavele Yesu, nakushangazala Njambi. Omo vantu vacimuene, kaha voshe vashangazalale Njambi.