1 "Keti mulinienge mu mitima yeni, tsilieleni muli Njambi kaha tsilieleni muli yange naua. 2 Mu njivo ya Tate muakala milili yaingi, nga keti mukemo, nga njamileke nguange njiya nakumivuahesela cihela ndi? 3 Honi nga njiya nakumivuahesela cihela, njikeja naua nakumiambata yange vavenia, linga kuje kunjakala neni mukakaleko. 4 Kaha honi mukazivuka ngila ya kuje ku cihela kunjilina kuya."

5 Tomasi uahandekele kuli ikeye nguendi, "Muene, kutuzivuka oku ulinakuya, nkuma honi tukazivuka vati ngila?"

6 Yesu uahandekele kuli ikeye nguendi, "Yange ngila, na vusunga, na muono. Naumo uahi eja kuli Tate, kuvanga kuhitila muli yange. 7 Nga muazivuka yange, kaha na Tate muamuzivuka naua, kuhuma hano kutuala kulutue muamuzivuka kaha mua mumono."

8 Filipu uahandekele kuli ikeye nguendi, "Muene, tumuese Tate, kaha tuapuisamo."

9 Kaha Yesu uahandekele kuli ikeye nguendi, "Filipu, kunjakele nove ntsimbu yalaha, nkuma na ntsimbu ino kanda unjizivuke ndi? Uoshe namono yange namono na Tate naua, nkuma uhandeka vatihoni nguove, ‘Tumuese Tate?’ 10 Nkuma ku uatsilielele nguove njakala muli Tate, na Tate uakala muli yange ndi? Mezi aua njihandeka kuli yeni," kunjesi nakuhandeka mu nzili yange vavenia, vuno honi Tate uakala muli yange ikeye akapanga cipangi cendi. 11 Njitsilieleni ngueni njakala muli Tate kaha na Tate uakala muli yange, vuno honi nga kumunjitsiliela, kaha tsilieleniko lika vipangi vije njili nakulinga. 12 Muavusunga vene njimileka nguange, uoshe atsiliela muli yange na ikeye akalinga vipangi vinjilina kulinga, cilivene akalinga vipangi viakama kupulakana evi, muomu njilinakuya kuli Tate. 13 Njikalinga coshe mukalomba mu lizina liange, linga Tate vaka muhane vumpau kuhitila muli Muana, 14 Nga mulomba cuma coshe mu lizina liange, njikamilingilaco.

15 "Nga munjizanga, mukaniunga mashiko ange. 16 Njikalomba Tate, kaha akamihana Mukuasi mukuavo, uje akakala neni miaka yoshe. 17 Ou ikeye Cimbembesi ua vusunga, uje vaka mavu kuvasa kumutambula, muomu kuvekumumona cipue kumuzivuka. Yeni mu muzivuka, muomu uakala neni, naua akakala muli yeni.

18 "Kunjikamiseze ngue vantsiua, njikeja kuli yeni. 19 Muka ntsimbu kakandende vaka mavu kuvakanjimono, vuno honi yeni mukanjimona. Muomu njayoya, neni naua mukayoya. 20 Ha litangua lije mukazivuka ngueni njakala muli Tate, kaha yeni muakala muli yange, nange naua muli yeni.

21 "Voshe vaje vali na mashiko ange naku aniunga vakevo vaje vanjizanga, kaha voshe vaje vanjizanga na Tate akavazanga, nange naua njikavazanga kaha njikalisholola yange vavenia kuli vakevo."

22 Ambahoni Yundasa (keti Sakaliote) uahandekele kuli ikeye nguendi, "Muene, nkuma cikapua vati linga ukalisholole yove vavenia kuli yetu, vuno honi keti ku vaka mavu?"

23 Yesu uamukumbuluile nguendi, "Uje uoshe uanjizanga akaniunga lizi liange. Kaha na Tate akamuzanga, kaha tukeja kuli ikeye nakutumama hamo nendi. 24 Uoshe uje kanjizanga, kaniungu mezi ange, na mezi munevu keti ange, vuno honi a Tate uje uanjitumine.

25 "Njahandeka evi viuma kuli yeni ha ntsimbu ino njili neni. 26 Vuno honi Mukuasi, Cimbembesi Uakulela, uje Tate akatuma kuhitila mu lizina liange, akamilongesa vioshe, nakumianukisa vioshe njinahandeka kuli yeni.

27 "Ciyulo cikale neni, ciyulo cange njamihana. Kunjicihana kuli yeni ngue muje mavu akahanenamo. Mitima yeni keti ilinienge, naua keti muvue liova. 28 Muevuile omo njahandekele kuli yeni nguange, ‘Njilinakuya, kaha njikeja naua kuli yeni.’ Nga muanjizangele, ngue muavuahelela ngueni njiya kuli Tate, muomu Tate uakama kupulakana yange. 29 Njimileka viuma evi ntsimbu kanda vilingiue, linga omo vikalingiua mukatsiliele. 30 Kunjikahandeka cikuma neni, muomu muka kuyula ua hano ha mavu alinakuija. Kaha kesi na nzili hali yange, 31 vuno honi njilinga ngue muje muananjishikilamo Tate linga mavu akazivuke nguauo njazanga Tate.

"Katukeni, tuyeni tuhume kuno ku cihela.