1 "Njahandeka evi kuli yeni, linga keti mukahilukile munima mu kutsiliela ceni. 2 Vaka misheka mu vinjivo via malombelo. Cilivene ntsimbu ikaheta omo vaje vaka mitsiha vakasinganieka nguavo mukulinga evi vali nakuhana mulambu uakulemesa kuli Njambi. 3 Kaha vakalinga evi muomu kuvazivuka Tate cipue yange. 4 Vuno honi njinamileke evi omo ntsimbu yavio ikeja linga mukavuluke ngueni njamilekelevio.

"Kunjahandekele viuma evi kuli yeni hambangelo, muomu njakele neni. 5 Vuno honi hano njilinakuya kuli uje uanjitumine, vuno honi na umo uahi hali yeni anjihula nguendi, ‘Nkuma kuli ulina kuya kuli?’ 6 Muomu njinahandeka evi kuli yeni, vusiua vunashulu mu mitima yeni. 7 Cipue ngocovene njimileka vusunga, cacili kuli yeni nga njiya, nga kunjiyi, Mukuasi kakeja kuli yeni, vuno honi nga njiya, njikamutuma kuli yeni. 8 Kaha omo akeja, akamuesa vaka mavu ha vupi na vusunga na cisompelo, 9 ha vupi, muomu kuvanjitsilielele, 10 ha vusunga, muomu njilinakuya kuli Tate kaha kumukanjimono naua, 11 ha cisompelo, muomu muka kuyula mavu vanamuhisa laja.

12 "Njicili navia vingi via kuhandeka neni, vuno honi vimilemena cikuma. 13 Omo Cimbembesi ua vusunga akeja, akamituamenena ku vusunga vuoshe, muomu kakahandeka mu nzili yendi, vuno honi akahandeka vije via kevua, nakuhandeka kuli yeni viuma vije vikeja. 14 Akanjijundula muomu akambata viange nakumilekavio. 15 Vioshe vije viali navio Tate vinapu viange. Mucifua eci vene njahandekele nguange Cimbembesi akambata vije viange nakumilekavio.

16 Yesu uahandekele nguendi, "Muka ntsimbu kakandende lika, kumukanjimono, kaha naua muka ntsimbu kakandende lika, mukanjimona."

17 Kaha vamo va vandongisi vendi valihandekesele umo na mukuavo nguavo, "Nkuma vika alinakulumbununa mukuhandeka kuli yetu nguendi, ‘Muka ntsimbu kakandende lika, kumukanjimono, kaha naua nguendi muka ntsimbu kakandende lika, mukanjimona’, muomu ‘Njilinakuya kuli Tate?’" 18 Vahandekele nguavo, "Nkuma vika alinakulumbununa omo alinakuhandeka nguendi, ‘Muka ntsimbu kakandende lika?’ Kutuzivuka evi alinakuhandeka."

19 Yesu hakuzivuka nguendi vatondele kumuihula, kaha uahandekele kuli vakevo nguendi, "Nkuma muli nakulihula yeni vavenia ngueni vika njalumbununa omo njahandeka nguange, ‘Muka ntsimbu kakandende lika kumukanjimono, naua muka ntsimbu kakandende lika mukanjimona?’" 20 Muavusunga vene njimileka nguange, mukalila na kusikoka cikuma vuno honi vaka mavu vaka vuahelela, muka pihilila, vuno honi kupihilila ceni cikahimpuka kuvuahelela. 21 Nga mpuevo ali ku cihela ca kusemena, akevu kuvavala, muomu ntsimbu yendi yahete. Vuno honi nga muana nasemuka, kekuvuluka naua kuje kuvavala ca nevuile muomu yakuvuahelela cije cakuneha muntu ha mavu. 22 Muvua kuvavala hano, vuno honi njikamimona naua, kaha mitima yeni ikavuahelela, naumo uahi akambata kuvuahelela ceni.

23 "Ha litangua lije nacimo cahi cimukalomba kuli yange. Muavusunga njimileka nguange, nga mukalomba cuma kuli Tate mu lizina liange, akamihanaco. 24 Hume haje na kuheta lelo kumualombele nacimo cahi mu lizina liange. Vuno honi lombeni kaha mukatambula, linga kuvuahelela ceni cikapuemo.

25 "Njahandeka viuma evi kuli yeni mu visimo. Ntsimbu ikeja omo kunjikahandeka neni mu visimo, vuno honi njikamilekesa via Tate na mezi aje amuasa kuvuisisa. 26 Ha litangua lije mukalomba mu lizina liange. Kunjahandekele kuli yeni nguange njikamilombelela kuli Tate, 27 omo Tate ikeye vavenia ua mizanga, muomu muazanga yange kaha munatsiliela ngueni njahuma kuli Njambi. 28 Njahumininine kuli Tate kaha njezile ha mavu naua, njili nakuseza mavu kaha njilina kuhiluka kuli Tate."

29 Vandongisi vendi vahandekele nguavo, "Haaa! Ulina kuhandeka muacili kaha honi tulina kuvuisisa, kuuesi nakulikuasesa visimo! 30 Kaha hano tuazivuka nguetu uzivuka viuma vioshe, kaha naumo uahi asa kukuihula vihula naua, ha viuma evi tuatsiliela nguetu uhuma kuli Njambi."

31 Yesu uavehuile nguendi, "Nkuma honi muatsiliela ndi? 32 Ntsimbu ikeja, kaha ineja laja, omo mukalishandozoka muntu na muntu ku njivo yendi, kaha mukanjiseza lika liange. Vuno honi kunjesi lika liange muomu Tate ali nange. 33 Njahandeka evi kuli yeni, ngeci kuhitila muli yange linga mukale na ciyulo. Ha mavu mukamona mapakeso. Vuno honi simpeni, njahiana mavu!"